THLAHMI NIH THLAHTU AI A AWH TAWNasinain
THLAHMI KHA THLAHTU A SI BAL LO
THLAHMI KHA THLAHTU A SI BAL LO
 |
| Evan. Rual Uk |
Tutan ah fb ah cațialtu Oneness lei nih a tu le a tu an lâkmi Baibal cacãng cu Johan 8 câng 24 ah 'amah kha ka si' timi le dal 14 ah 'aka hmutu cu Pa hmutu a si, Ka chungah Pa a um i Pa chungah ka um, Pa le Kei cu pumkhat kan si' timi hna hi a si.
Thawngțha Johan le cakuat Johan hi Jesuh cu Pathian Fapa a si tiah a zûm duh lotu Judah biaknâk â tlaihtu Judah mi hna le Grik fimnâk Gnostic cawnpiaktu hna nih Jesuh cu Khrih Pathian Fapa a si lo tiah a titu hna chungin zûmtu kilvennāk caah AD 90 hnu ah țialmi an si.
Jesuh chan in nihin tiang Judah biaknâk â tlaihtu Judah mi hna nih an cohlân khawh hrimhrim lo mi cu 'Jesuh hi YHWH Pathian nih a thlahmi Messiah le Khamhtu a si' timi hi a si.
A ngai ngai tiah Messiah cu chan tamtuk an rak hngahmi a si ko.
Cu hna cu fak tak takin Lamkaltu chan zûmtu a tuaitâm i hnahnawhnâk a petu an si caah Johan nih Thawngțha le kuat khat kuat hnih kuat thum a țialmi ah a hramthawk in a dongh tiang fianter a timhmi cu Jesuh cu Jehovah Pa Pathian nih a thlahmi Fapa, Messiah le Khamhtu a si ti hi a si.
A ngai ngai tiah mizapi cu chim lo Jesuh Lamkaltu 12 hmanh nih an zulhmi Jesuh kha Jehovah Pa Pathian nih a thlahmi Fapa, Messiah ( Khrih) a si ti hi an zûm kho hrim hrim lo.
Cucaah Jesuh nih Ka chung ah Pa a um, Kei zong Pa chung ah ka um, aka hmutu cu Pa hmutu an si, Pa le kei cu pumkhat kan si tiah a Lamkaltu sinah atu le atu dal 14 chungah a chim lengmang mi cu a si.
Dal 16 ah cun Jesuh chimmi kha an lung a pem cang i "Pa sinin a chuakmi na si kha kan zumh cang" tiah an ti 16:30
Cucaah Jesuh nih a thlahtu Pa ai awh in bia tampi a chim.
Asinain voi khat te hmanh Pa ka si, tiah a ti bal lo.
Ti phung zong a si lo.
Leicung bawi pakhat khat nih hmun pakhat khat ah amah aiawh in mi a thlah khawh.
Thlahmi nih thlahtu aiawh in bia a chim i tuah a herhmi zong aiawhtu sinâk in a tuah.
Asinain aiawhtu i thlahmi kha aiawh i a thlahtu a si bal lo.
Jesuh zong Pa Pathian aiawhtu ah thlahmi a si. Asinain aiawh ah a thlahtu Pa a si bal lo.
A chungah Pa a um nain a chungah a ummi Pa a si bal lo.
Jesuh a hmutu cu Pa a hmutu an si nain Jesuh cu Pa a si bal lo.
Ka chungah Pa a um, Pa chungah ka um, aka hmutu cu Pa hmutu an si, Pa le kei cu pumkhat kan si timi bia hi:-
"Aiawhnâk leh Pehtlaihnâk" bia an si.
Jesuh nih fiang tein a chim bangin a thlahtu Pa sin in vulei ah a ra i a thlahtu Pa sinah van ah a kir cang.
Ni ni khat cu a thlahtu Pa nih a mithiang la dingin a rak thlah țhân lai.
A miphun kha kum 1000 a uk hnu ah vulei donghnâk bia kha a ceih lai.
Cu hnu ah biaceihnâk nawl a petu Pa Pathian sinah Pennâk kha Fapa Jesuh nih a pek țhân lai.
"Cuticun biaceihnâk vialte, nawlngeihnâk vialte le țhawnnâk vialte kha a donghter tikah donghnâk tak tak kha a phân lai i Pa Pathian sinah (Fapa Jesuh Khrih) nih Pennâk kha a chanh lai" 1Kor.15:24
Thlahmi cu thlahtu a si bal lo.
![MS Office 2013 [ALL] Product Keys [LATEST!](https://lh3.googleusercontent.com/blogger_img_proxy/AEn0k_tX3-5ahEQCR4mSTQdcYzWUmfRAQLYX_CJgnLipnmQpmeDlxidRrJs0ISay4Dtq4fsHfRvi4Y0U2BIswm99L1Ui6C0L93Biw5AtDlK52v0qgBZ5sG0r61ulWDg=w72-h72-p-k-no-nu)
0 Na ruahnak rak chim ve.:
Na Ruah Nak Rak Chim Ve Caah Ka lawm!