Bible Code Part 1 BIBLE CODE HI ZEIDAH A SI?

 Dear Bawi Khrih ah Unau hna,

A rel huammi hna caah tiin a tu lio Vawlei nih a buaipi ngai vemi BIBLE CODE kong ka vawn thlah tthan. Ka vawn thlah tthannak chan cu a hmasa i ka vawn thlah mi kha mi cheu nih an hawn khawh lo caah a si. A rel tu paoh Pathian nih a biatak hngalhnak thluachuah in pe ko hna seh ti hi ka thlacamnak a si. A men.

                                                   

Even Lian Hlun

                                BIBLE CODE HI ZEIDAH A SI?

                                                                                           

                                                                                                  BIBLE CODE HMUH THAWKNAK

                        

                        Pathian nih thil a thuh hi a sunparnak a si. Sihmanhsehlaw Siangpahrang hna sunparnak tu cu thil fianter hi a si. Phungthlukbia 25:2

Naite ah khan Israel mithiam rual hna nihcun Bible-ah hin khuaruahhar thil a si mi an hmuh i. Cu thil cu: Hebru holh in ttialmi Bible ah hin hmelchunhnak biathli-thup (hidden codes) khuaruahhar ngaingai a rak i thup tung ko timi le, cu biathli-thup hna cu computer setthluaknei attha bikmi hna hmangin an hmuh khawh i an fianter khawh cang' timi hi a si. Cu biathli-thup phum mi hna an rak i thuat ning a tthat ning le sullam thukpi an rak neih ning an hmuh khawhnak nihcun hi Hebru Bible hi Zeizawng tikhotu Pathian kutneh a rak si hrimhrim ko!' tiin a lungthin a hak bik mi hna hmanh kha an lungthin a tit ter khawh hna ti a si.

             

               Vawlei fimthiamnak le science mihna nih an hmuhmi thil hna nih hin cun atlangpiin Pathian hlatnak leiah a kan hruai deuhbik ttheu. Tahchunhnakah, Vansang lei kong le a hla deuhmi arfi kong cawnnak le ruahkhahnak (astronomy) nih aitinh bikmi cu arfi dang hna ah khin minung dang an um ve le um ve lo kawl i, abing tein hi Vawlei lawng hi minung le thilnung hna umnak dingah Pathian sermi kan si khunnak (uniqueness) lungput le ruahnak le biaknak nih a cawnpiakmi hi adik lo ti lei i thangchiatpiak hi ai tinh bik mi pakhat cu a si.

               Vawlei kong cawnnak (geology) nih thil an kawl tikah hmuh an timh vening cu, sertu Pathian tel loin Vawlei le a chung i a um mi thil vialte an chuah kehning le an ni thlenning le rak tthan ning(evolution) kawngkau kha an kan thlurpi tawn. Bible critics-hna cawn ning le ruahkhah ve ning ahcun Pathian Cathiang bia hi Pathian kutneh ning set si loin, minung kutchuak tu a rak si deuh ning hmuhkhawh timhnak a si deuhbik fawn.Cubantukin Vawlei fimnak hmang i cawnnak le thiamnak nih hin cun Pathian in a hlatnak bik leiah zeizawng vialte hi a phichuah a timh dih ko.

               Amahbelte Hebru Cathiang bia i Cafang i thuat ning biathli scientist-hna nih an hmuh khawhmi tu nih hincun Pathian kutchuak-kutneh a si ning zumhnak leiah a kan hruai. Pathian bia a lianngan mi le a sunglawi tukmi a cauk in ttial a si pinah, a karlakah sullam ngei ngai i biapi taktak a si mi, zeitluk in dah a tam ti hngalh khawh cawk lo tiang i a rak i phum dihmi vawnhmuh ah hincun, minung fimnak nih a phak khoh lo mi pin lei ah a si i, van tthat ruangah(random chance)ruang i arak um kho mi le arak si kho naisai ttung lo i, minung hna nakin khuaruahnak fim deuh le lianngan deuhmi kutchuak-kutneh a si hrimhrim ko ti hi i hngalhter loin cun um khoh a si hrimhrim lai lo. Pathian bia thiang dal tampi hna le caang tampi hna nih Pathian kutchuak-kutneh a si ning an chim mi hna hi scientist-hna thil hmuh mi thengte nih hin a fehter i cucu hi thil an hmuh mi a sunlawi biknak le ai dan khunnak zawng a si.

               Mi cheukhat nih cun,'ka zum hlei lai lo,' asiloah, an ni chimsek len le, zei pipa va si hawi fawn hlah,' tiin a elnak ding i damhkhang in chirhchan zawng an rak i ser diam cang kho men. mah le ruahning te hi kan kalnak lam, thihnak tivaral tiang i a kan hruaitu cu a si ttung le; a hohmanh kan i hnek kho lai lo. Amahbelte mah ruahning i chirhchan rak i ser hmaisa lo in, lungthin i hawng ngai in biadik kawl a duhmi hna caah cun Bible hi Pathian kutchuak-kutneh a rak si hrimhrim ko ti mi science thiamnak hmangin a fiang bakmi fian ternak cu, hmuh khawh lak khawh dingin a um ko.

                A hlan lio piin cozah biathli kengtu le vengtu le ngiathlaitu (spies) hna nihcun mi an hlen khawh hna nak hnga biathli hna hi an rak i pe ve tawn i. Tahchunhnak ah, America ram ah ramchung i doh(Revolutionary War) lio ah khan British ralhruang chung i a ttuanmi America ngiathlaitu nihcun a nu sin ah a dam le dam lonak kawng le, a um harnak kawng le a huahalomi bia tete hna cu chimin cakuat sawhsawh te khi a hei kuat i, cu cakuat nihcun a nu sin phan loin an bawipa sintu a phan diam i; cu cakuat cu an bawipa nih a vawn reltik ah cun: cafang 12 dan i thuhmi biathli ah: "ralkap 400 le miakpi 22," timi hi a rak i thilchih diam ko.

                 Bible- zawngah hin hi ti i kan vawnrel khawhmi pin ahhin, a biafang arak i phum mi hna hmangin a tuahtawnh a fawnhtawnh zia a thiam mi hna nih cun sullam a ngei ngaingai mi hna kha an hmuh khawh hna. Mi cheukhat hna nihcun hi ti i kan vawn rel i kan hngalhfian khawh mi(surface text) pinah hin zei biathli-thup hlei cu hme um hlei hnga? Tiin kan ruah khawh men ko. Cauk dang hna kan rel bantuk i kan rel ahcun hi'code' ai thupmi hna hi hngalh fian khawh ding a rak si lo. Amahbeltecu computer sehfim le khuaruah khawhnak tthawng bakmi tu hmang in cun hi Hebru cafang an rak i thuat ning nih sullam thukpi a rak ngeih khawh ning hna hi hmuh khawh ceo a rak si; cuhmanhahcun theih duhmi lei hawih in computer programme hna cu timhtuah piak hmaisak a hau. A hramthawk i Hebru hawl i Biakam hlun hmasa panga hna ttialning cu coma hna, fullstop hna le paragraph zawng tthen a rak si lo i, a karlak zawng um hlei lo in i pehtlai dihin ttialmi a si. Bible khawizei caang paoh i biafang (letter) 5 dan 10 dan 15 dan 20,30,110 etc. dan i a um mi hna kha vawn la usihlaw, minung min maw, hmun min maw rak chuak sehlaw, sullam a ngeimi hmelchunhnak vawnhmuh khawhmi tlaih khawhmi cu Bible code an timi cu a si.

                  

                  DonStanton-nih cun Bible code min taktak ding tu cu," The Handiwork of God in the Fabric of the Word (Cauk chung i Pathian kutneh thuat ning) si seh' tiah a ti. Grant R Jeffrey-nih cun mah hi hi'The Signature of God(Pathian kut ttial)' tiin, chim fawideuh dingin a min a phuah i, Pathian nih cun a thaw a chuahhnawhmi Cathiang bia ah hin a kutneh a chiah hrimhrim ko tiah a ruah. A hawipa, Bible code kongkau a buaipitu(researcher) minthang Yacov Rambsel' nih a min ttialnak(His Signature) ti mi hi Bible code ah a rak um ve peng ko hiteh!timi kha a vawn hmuh i; Isaiah 52:7 i cafang palinak i relin cafang 49-nak kha vawn char diahmah in 'a kut ttial'( his signature) ( Hebru hawlh i me'chatimo') ti mi bia hi a rak chuak ko. Cucaahcun Bible code hna hi Pathian kutneh hrimhrim a si ning elawk ttha lo in a fian tertu a si.

                                                                         BIBLE CODE HMUH HRAMTHAWKNAK

                                                    Peh tthan ding mi.

                                                    Lian Hlun ( Meme Pa)