BAWI KHUAL TLAWN HMANH A TLINGLO NAIN KAN I NGAI HNA.

Kan sang i pumh lio

May 3/16 zaan in nidang bangin kai tim cuahmah nain ka zawhmi zalam aa dang cang chikhat cu ngongko in ka dir zedik ka ruat, zeidang a si lo ka umnak ka dirnak le ka zawhmi zalam tu chikhat loah ai dangruangah asi. Khawzei kan umkalnak le rian kan ţuannak zongah mithar si cu anuam lo pin ah hmai zong a hngal lo taktak, Arthar nun le vengral Uico nun ko ka hluan, sihmanhseh-law kai hne hramhram, a ruang cu caan tlingin mithar ka si lai lo ti kai hmuh catuah asi.

Zei saantlailo te vasi hmanh usih law, tappi, lungthu hna le chumhtual i khat nana cu nihnih khat a van liam cun, a hlan kan umnak hmun le kan hmun hma teah ka van khuasak ti lo hnu cu inbox tete zong ka van don pah. Aw kei saantlailo te tiin mah tluk in an lungtak a si zongah a si lo pek ah aanka ţha tein inbox hna in chatting an ka tuah cu aw tiin khua fakpi in ka ruat ka saantlaih lo le zei ka silonak fiangtein an ka hmuhter ţhan zei tiin ka leh hna lai ti awk zong ka thei lo kei mah tu kai phuhrung i an hmai zong ka khap hrim hna lo.

Aw kei saantlailo te hi aw!! ka titawn, a rengah kei mah tu nih ka ngai in ka hlam deuh hna ka lungchung ummi tu ka phuanthiamlo le ka chim thiam lo tu a si deuh. Khat lei ah cun ka umhna anti nuam lo sihmanhsehlaw vawlei kan nun chung caan tawite ah cun kan pawte a khimnak ding cu fuhpanh cu a herh ve mi asi caah theihthiamnak nun tu kan ngeih aherh.

Zarhhnih ţha a van liam kai benh kho tive lo, zaankhat tel cu, ka chumhtual ah kai khrih a hau a hrim ah a ngaih zong ka ngaituk cang hna tiin 17/4/16 Sunday zaan cu a hlan kumpi kum 4 ka cenbualnak ah arbangin ka va lawi cu kapkhat lei ah cun ka nuam kapkhat lei ah cun ka lunghna arawk i ka umhna anuam lo.

Khawzei khual lian bang pakhat hnu pakhat nih ka kut an ka tleih. E!! kan in hlamtuk cuti i ruah lopi cun, ţangdang le ruun dangah na kan lawitak timi aanka ka tawn a tlawm lo zeiti leh awk hna ka harh hringhran ka thawpi an ka khar ko!

ANRAK ŢHANG CHO TUK MANH!

---------------+++--------------------

Chikhatte a si ko nain anrak ţhangcho tuk manh, kumpi kum 4 ka umlio i kan ngeih bello mi hna le adang lei zongin ţhan chohnak an rak ngei manhtuk. Kan fale nau ka hmuh hrim ah ka di ariam i kai nuam a hlan ah antuahbel lomi, Sunday school hngakchia hna nih thangţhatnak hlamremh dawhhna pehtlai tein an rak ngei kho cang. Kailawmhnak a ngantuk nakah kapkhat lei cun ka umhna anuam lo a ruang cu ka nuamhtuknak ah asi.

Kan i pumh hna nidang a lo lo, a nuam khun i thiangthlarau nih a kan umpi khun, kan hlasak le kan tuahsernak tete zong nidang bang a si ruam lo. Thiangthlarau nih a kan umpi khun. Pumh kan van i lim cu, pakhat hnu pakhat nih a thar in kuttlaih ka tongţhan andih lak in ka kut an ka tleih, aw hi tluk dawtu veng le sang Unaurual khrih ah pumkhat hawidawt hna hi vawlei ka nun chungah hin ka tong kho ti hnga maw? timi khurkhua ruahnak nganpi ka thinglung chungah biahalnak nganpi a van um. Aphi kai pek mi cu UMTI LAI LO timi hi asi. zaan caan asibantuk in le ka pawkhimnak kawlnak lei ah kir ţhan ding ka si caah kan i ngaihnak hna lungdi riammanh lo le lungkil ah a tap mi phuang thlu manh lo in taxi chungah a tlai cang mi KL khualipu zalampi cungah holh hmanh holh huam lo in duhsah tein lamthar ka zawhnak lei cu panh in ka liamtak hna.

Khrih ah pumkhat lawng si loin caan saupi chungkhar khat unau khat in arak lengţimi hna e lamdang ka zawhtak hna ni cu nunthiam a har lawng si loin tuar a har ko BAWI KHUAL TLAWN can hmanh a thang lo nain, kan i ngai manh hna i kan i hlam tuk rih hna.

Pathian nih a kan umpi lai i tawnţhannak caan ţha aumrih lai.

Kan ngaituk hna, kan tleih chantuk fawn rih hna.

Bawpa nih in umpi ko hna seh.

April 17/2016

Teinak nun

 

Biahmasa

Teinak nun ti in caṭial ka van i timhtikah hin abiatlang zong fiangfaitak in ka khengkho lai lo sihmanhsehlaw ka ti khawhchungin ṭial khawh ka van i zuam lai, ramdang dirhmun deuhin hram (hmunhma) ka van khuar lai cu caah adih donghtiang in relkhawh cio rakka zuampiak uh.

1. Hawikomh he

 Minung kan nun nak ah hin hawi kan hreh hawi nei lo cun kan si kho lo cu caah cun, kan hawidawt kupṭhi rual hna he hmun khat kaa khat kanum tamdeuh le biazaa kan iruah tam deuh zingzaan atam deuh tik ah hin, pakhat le khat karlak ah buaibainak i sik elnak a chuak tawn, cu i sik elnak pakhat le khat hmuhthiam lonak caan aum tik ah kan i hua kan i (reem) tawn, lamlen khawlak kan i hmuh zongah kan i chawn ṭhaṭhi duh tawn lo cu ti cun minung kan nunnak ah thil a cang tawn, cu kan i hmuhthiam lonak cu zeitiindah kan tei khawh lai, zeitin dah teinak nun kan neihkhawh hna lai, cu teinaknun cu thilharsa tuk ah kan ruah sualtawn minung nunnak cun thilhar cu asi ko e kan palh cukmak lio caan zongah kan teih khawhnak dinglam aum.

2. Fellowship’s(Bu) kar lak ah

Ramleng kan chuahhnu hnu cun mah fellowship, Pengtlang, khua tbk. Ṭanh afak ngai ho pohnih kan khua kan fellowship kan ṭanhdih ngawt ti usih law kan palhtuk lem la lodah ka ti,cu ti kan kal cuahmah lio ah cun, pakhat khat kan cungah thil atluntik ah, khuami sin ah siseh fellowship ah siseh pehtleihnak zong kan pek ve konain kan i ruahningin kan cungah rian an ṭuan lo tik ah kan lung a awi tawn lo, kei cu zeiah an ka rel lo kei cu mi sifak ka si, cu lo zongah fellowship (bu) caaah phurrit men ka si tiin kan lak tawn ningzahnak ah kan hman tawn fellowship sin ah kan chuakvak(lang ngam) ti lo ai ningzahnak ah kan hman tawn, a kan hruaitu le muihmai zong kan khaphna lo kan mui fellowship sinah kan langh ti lotik ah cun kan i phuhrung cang cu ti cun fellowship sin in kan tlau lan.

A. Khua mi he kar lak ah

Ruahlopiin lai lei ah kan chungkhar le nih van chiat antong ai, kan umnak veng le hawi komh polnih topinak hnemhnak le thlacamnak te he kan in ah kan ka ṭutpi, khuami zong an lang hna veng hlapipi zongin an phaisa dihin an rahna, an hmaizong kan khap linglet hna lo an rianṭuan mizong kal takin an ra cio hna tikah kan khua asimi ka inn pong teh ah a um vemi Khua hruaitu Chairman a lang kho ti lo a manh lo caah zong asi kho maw arian ṭuan a off khawh lo caah zong asi kho a phun phun in aum ko lai, cutik ah cu a tlamtlin lonak zawnte cu i lak in lungfahnak ah kan hman khua mi nih an ka ngaih sak lo tiin kan puh tawn hna, an sinak zohpiak loin an tlamtlin lonak tu kan kawlpiak tawn hna, cu ti cun heelnak ah kan hman khua fand pek duhlonak ah kan hman tawn.

Phundangin kan chim asiah cun UN nih kan laklai tithawng athang tik ah a kan hruatu te nih nan min chuak ni thla van up dih tuh an ti, kan min zong cu kan up ko an van kan halṭhan kanpek ṭhan hna, cu tik ah kanmin kha an ṭialpalh sual i asi loah an rakhrelh sual tikah UN nih lakdingmin cazin ah kan i tel ti lo kan lo ko UN bawmh cun ramdang kal cu kan sifom cu, kan min a um lotik ah cun kan lung adong cang khua fakpi in kan ruah kan thin a hang kan i ngaihchiat kan i fahsak, kan mawh lo voi khat long hmanh si loin voi 2/3 kan pekhna hnu ah rakphilh le rak palh cu i ngaihchiat zongah aphung asi ko lungfak lo awk zong aṭha lo kan mawh lo cu tah. Khua hruaitu le upa le nih lamkan in kawlpiak hna lai kan ti khawh chung in zungnan lut khawh nakding lam kan in kawlpiak hna lai kan palh asi kan ngai thim u an timi koko nih kan thin hannak aṭhangh deuhdeuh ai, a ziah keimah cung thengte ah mah thil hi atlun midang zong nanhrelh hna lo nan palh hna lo khua fand zong tlamtling tein ka pek thawhburh zong ka si khawhtawk in ka zuam, tiin i lungsi lonak kan nei ṭheu asi mi asi thin hangh zong kan mawh lo, aphungzong asi fawn vuivai zong a phung asi.

Cu ti asi tik ah cun hmai lei ah khua nih duhsak mi anei a nih zong kha damdawi inn aum lio ah an zoh ko anih kha cu an zohlo ti thawng kan theih duhsak an ngei tiin, hruaitu le tlamtlin lonak kha kan kawl i cu ti cun khua misin ah kan ipehtlai duh ti lo khuami sin ah kan lung a awi kho tilo kan thin lungmuru chungah thlaici ṭha lo a kheu cang. Asa kawng khan tawnghnak le hawi lekomh sin ah kan chim tawn kei cu khuaminih duhsak mi an ngei ka duhlo khua fand fee(pehtlainak) zong kape lai lo, zei khom ah an ka rel lo timi lungput kan nei cang cu thawk cun khua min siin kan tlau cang.

Biafunnak

Hlaphuah thiam nih cun kan tonmi poh ah hin Amen! Kan ti kho hnga maw? Ati minung kan nunnak ah cun kan ti kho nai sai lo acung lei kan langhter mi chung zongah kan ti kho lo Amen! Ti hnek in kan hua hna kan ralhna cu ti cun Amen tupek loin kan tlau thluahmah cang. Cu amen kan ti khawhlomi hna cu zeitiin dah amen kan ti lai i zeitiin dah teinak nun kan neih khawh lai.

1. Kan hawi le komh he kan karlak ah irem lonak achuak tikah kan i hua kan i ral tawn, cu i teinak cu kan palhbu zongin remnak va ser le keimah palh asi ka ngai thim i hua ti hlah sih i komh ṭhan usih irem cang usih, tiin ngaihthiam va hal khi teinak nun cu asi kan palh maw palh lo zongah kan mahnih remnak kan vatuah hmasat tik ah cun teinak kan hmuh ṭawngkam thiam deuh lebang cun (hawi le hawi , chungkhar) cungah Upanih an tibangin huatnak maw i sekelnak maw thil pakhat khat a um loah cun kan cungah huatnak khuadi(chum) atlun(zam) loah cun dawtnak taktak chuak kho lo an ti va ti chap.

Ngaihthiam va hal cu kan nih zumtu nih cun kan tuah awk asi i kan Bible nih a kan cawnpiakmi zong asi fawn, kan Pathian zongnih aduh mi asi fawn cu ti ngaihthim kan hal tik hna ah cun an nih zongnih ngaihthiam lo cun an kan um lai lo an kan ngaihthiam ve lai cucu teinak nun cu asi.

2. Bu Fellowship pakhatkhat cungah kan lung atling lo tikah an mah zongnih an kan remset lo zongah zeitluk in an kan rem lo zongah, a hlannak in na umnak Bu Fellowship ah khan vaizuam law thazang va pe thawhbur an ti zongah ahmaisa pol si vai zuam zei an tinak tuah ṭuannak poh ah telkhawh le tlawmngaih chuah in pumpek in na ti khawh tawh in vai zuam law zeitluk an in remlo zongah thin fualte in vai dorlaw a donghnak ah cun nang mah ṭhiamṭhiamnih teinak ti mi cu na co lai remlo an in tumzongah rem lo kho loding in nai va siam(tuah) ah cun na teihna lai i na cungah an lungput an pupeng kho lai lo, ni ni khat ah cun an piangthar hrimhrim lai. Cu ti tawidornak le thinfualnak he kar na hlan asi ah cun nang mah nih teinak cu a donghnak ah cun na co hrimhrim lai.

3. Na hawi le kom in siseh nan fellowship in siseh khua in siseh an in huatnak le na cungah an tuahṭuanmi vialte an i chir lai i teinak cu na co ko.

Khua mi cungah ah Bu cungah na cungthil tlungmi na lungtlin lomi ah khan i lung chiah loin kal tak hna loin le khua pehtlaihnak kha chat loin, na lungfah lio na lamzawhmi kha zawh thai loin le tlauthai loin na zawhmi lam khan kirzau law ahlan na raktuah mi nak leng khan i zuam law hmai cem ah a chuak kho pengmi zeikhom ah tlawmngaih lei ah cun tlawm a ngai pengkhomi si izuam law tawidornak he khuana sak ah cun adih donghnak ah cun na cungah an hua tu hna le an remlo tu hna kha nun chirin an um lai i ngaihthim tu nangmah kha an in hai lai cucu teinak nun kan timi cu nangmah nih na co cang lai.

PATHIAN zongnih ka fa tiah an auh lai.

Salai CinZah 13/7/2015

Chuak Awk a Țhati Lo

2006 ah malaysia ka phan ka phan zarhkat rian lo in um, a zarhhnih nak ah rastorent ah kahawi lenih rian an ka hmuhsak vanțhat ah ka ti la maw ? Kawlpa kuttang ah țuanding kan si, holhthiam kathiam rih lo ka zenhngai ni khat ni harka tingai nain ka hnechom ni khat ni cu a liam veko.

Zarhkhat a ka țuannak a si cang ka theih lomi tete kawlpa nih cun a ka chim peng keizong nih kan mahkawl rammi a sicâh ka theih lomi tete ka hal vepeng a nih zongnih a ka chimve, cân a sua kan i nel,kan ni ngamh ngai keizong nih ka nel ka ngamh ngai, zingzan a tam hmunkhat ah cun kan țuanti lawikal pah zonghmun khat ah kan tlungkal kan boss le nih inn an kan pekmi ah kan umți hna nu adang khan ah pa adang khan ah chunzan in kan i pachiah hna, zingzan a tamtik ah cun ka sinah duhnak bia a ka chimh kalau ngai kathin khi phudutphudut tikhin aa suk ka hmur ka bohnawh ka khat hmanh ka let lo, chunni tlak ka chawn lo an nih rawlchum an si kei rawlpetu kan si an umnak lei ka va kal poh ah a rakka chawnh tawn ka chawn hlei lo.

Thlakhat fai aliam cang ka sin ah cun a chimpeng rih ka um kho veti lo kan si kho la lo tiah ka leh, a mâ hlei lo zeidah kan si khawh lonak ding cu a um a ka ti? Kei cu miphun dangvat ka timlo a hrimah kei cu khrihfa mi ka si câh khrihfa mi long ka vak la ka ti, nang he cun kan biaknak zong â khat lo ka ti, ti hin a ka leh kanpa hnih kan i duh a cun cu hnatham cu zeidah buaiding a um a ka ti.

Cu thawk cun ka pumhnak zongah a ka zul a pumve zei paohah ka câh a țhat nak ding a si ah cun a zuam ka nuamhnak ding a si ah cun tuah hreh mizong angei lo voi tam ial ka sin ah a pum biaknak ah cun buaiding a umlo a kati a herh ah cun khrihfa zongah ka lutko la  kati, cu ti cun a ka zulhdoi tikah cun keizong nih cun zingzan a tamtik ah cun ka rak duhve ka tiko lai pheh awk a um lo, kum 1 ial kan kal hnu ah kan i um nuva kan si cang,

Pumh nak lawnghmanh siloin khau fellowship rian țuannak zong ah a tel ngai rih ka duh chinchin thawhbuarh zongah a huam, a țulherh mi ah cun a nunzong a siang ngai.

Nuva kan sinak caan a sau tikah cun pathian thlaw chuah fapa kan ngei fa neih hnun cun laimi sin ah ka chuak vaktuk khoti lo ka tel kho tilo kan pa zongcu a mizia a dang ngai cang caan a sau deuhdeuh a dang deuh deuh kan fa zong cu holh a van thianpah cang ka fa zoh khenh he cun ka buaingai cang kan panih le a kan dawtko na in pumhkhawmh kan duh zongah a rian he cun a kan zul khoti lo kan nufa he cun kan chuak vakkho ti lo.

Kum hneh a liamhnu ah fanu kan nei tthan cu hun lebang cun hawi sin ah a langh chimhlah thawngpang zong kan i thei kho tihna lo tuandeuh i kan pa nih a ka duhdawt tukmi kha a tuah cun mahban tukkhan a si naisai tilo kan fale minhmanh ah laimin a langti lo kawlmin lawngte an si cang zeiti hmanh in a ka kaltak tilai loti khi a hmuh tuk cang cuti cun in chungkhar zong a dangngai cang zinzan sik elnak a um cang tthat chuah zongah pa kan ti cu zukam an nams cangah cun zei an tuak tan tilo bia rumrum an ka in a chuak cawlh tthen ding le kar lak ah fa le an um cang tthen lo ding le celh ding a siti lo caah khua tampi in ka ruat ka chirti ah le san a tlaiti ttunglo.

Inn chungkhar ah dawtnak mui hmai a cuangti lo kirdingah le si kha tilo biaknak nih le a dangcang pakhat le khat theih thiamnak aleng khoti lo!!

Nifa tiin te nun chir in ka um cang hivial laipa an tampi ko kawlpa ngelcel ka rak vatmi hi cu.. voi khat khuaruah nak nih thil kan rak timi hi poi taktak a si, cu caah cun lainu ka hawi le vial te hna hi caa a relmi vialte hna a ttial zia zong ka thiam lo caah ka chimnak nih cun  chimzia zong ka thiam lo ka tonmi hi cu ton veding hin cun ka sianghna lo cu caah cun caan na neih lio ah hin miphun dang cu a vat hrimhrim hlah kan laipa cu zu an dindeoh a si zongah a tamdeuh cu dawnnak theih thiamnak tampi a um lai ngeih chiat nak na tawn caan zong ah an hnem kho tuding an si cu caah cun miphun dang hna na vat a siah cun zeimaw can cu na nuam kho ko lai a si nain a donghnak lai kha na ruah hmasa ah ka duh , miphun dang kawlpa ka vat ah cun zeidah a phi q chuak la timi ruat bu tein na tuah kha saupi in na tuah hlan ah ruathma sa ti kha kan sawm duh.

A chim zia ka thiam lo caah na duh lo a siah cun raak i ot ve hmanh na theih ko la !!!!!!!!!!

Mipi ai awh thlakancam tik ah

“Mipi ai awh in thla kan caam tik ah” timi tlangtar in ka ṭialmi hi a thei cangmizong tampi kan um ko lai, kan theih dihmi zong a si ko. Sihmanhsehlaw mitam pinih “ka” hi kan hmanṭheo caah  ka lungcung ah a umngai caah ma ca hi ka ṭialnak a si.

Laimi cu thlacam a ṭhawngmi kan si, kan umnak hmun cio in thla a cam mi kan si, pa hnih khat kan umnak zong thla a cammi kan si, kan hawi le lung re theih nak an tawn caan zong ah i leng kai in thlacam piak hi kan nunphung kan kokek a si caah thlacam tik ah kan i ralrin a herh taktak in ka thei.

A hmaisa deuh ah BAWIPA THLACAMNAK zoh hna usih, “vancung khua i a um kan pa,” timi hi mi cheu nih cun {vancung khua I a um “mi” kan pa} mi khi kantelh tawn a um i umlomi a si caah a telh in telh ti lo dingmi asi.

A cung lei kan chimcang bantuk in laimi cu kan umnak hmun kipah thlacam mi kan si caah, kan hawi le nih lungre theih nak an tawn caan ah siseh, lawmhnak an tawn caan ah siseh, a si loah kan mah pumpak zongin kan tonzong a tampi ve, cu tik ah miza pi ai awh in thlacam an kan thiah(fial) tawn cu caah ah kan i ralrin awh ah ka timi cu KA le KAN timi hi a si miza pi ai awh thlacam mi kan siah cun KA timi hi cu hrial ah a ṭha KAN timi tu hi hmang cio hna usih law a ṭha hringhran dah.

Tahchunh nak pakhat in kan fellowship chung pumh khawmnak ah hramthawk maw a siloah thawhlawm hlan(chanh) a zei poh vasi seh zapi ai”wh in nini khat cu thlacam nak zongkan nei te la biachim relnak zong kan ngei tengteng te la cu caah cun kan i ralrin awk a si mi cu KA hmannak ding le KAN hmannak ding hi ral rin awk taktak a si, KA timinih cun a mahpumpak ca lawngah a chimduh nak a si cucaah zapi aiawh tu kan si caah tlamtlin nak a um lo.

KAN nih cun a chung i ummi kan dihlak in a huamtel dih caah ah a ṭha taktak mi a si. A si zong asi dingmi a si cu caah ah cun mipi aiawh tukan si nak khan KAN timi hi kan hman hrimhrim awk a si.

NOTE : Mah ca ka ṭial mi hi keimah pumpak ruahnak a si, mi va soi le va thangchiat nak ah ka tial mi a si hrimlo, a theicang mi zong kan um ko lainain, a thei rih lo mi hnih khat kan rak umrih caah KA le KAN hmannak ruat deuh hna usih ti hi tawitein ka van langhter.