JESUH DANG. 2Kor.11:4

JESUH DANG. 2Kor.11:4

Evan. Rual Uk

Biakam Thar Baibal ah Jesuh timi pathum an um.

Jesuh pakhatnâk:-

Cathiang ning tein:----Van le vulei ser hlân ah zungzal zungzal in van ah a rak um cangmi, "Hngalhpitu pathum, Pa, Fapa, Thiang Thlarau" tiah Cathiang nih a timi chung in mi pakhat a simi Jesuh:---

Khiahmi cân a tlin tikah Pa Pathian nih vulei ah a thlah i ngaknu thiang Mary nih a pawi i a hrin hnu ah vanmi nih a rak chimchung bangin Jesuh tiah min an bunhmi Jesuh:-

Profet sinâk dirhmun in Pa sin in a hmuhmi Bia minung sinah a phuang i a liannganmi khuaruahharnâk phunkip a tuahtu Jesuh:--

Tlângbawi sinâk dirhmun in a sunglawimi a thisen misual tlanhnâk ah vailamtahnâk thing cung in Pa Pathian sinah a petu Jesuh:--

Nithum ni ah thihnâk thlânmui chung in Pa Pathian nih a thawhter i lei le van nawlngeihnâk vialte le min cungnung bik Pa Pathian nih a pekmi Jesuh:--

Zûmtu kan aiawh in Pa Pathian hmai ah dirin a kan nawlpiaktu dingah van ah a kai i Pa sinah a ummi Jesuh:--

Pa Pathian nih a khiahmi Ni le Cân ah a mithiang la dingin a ra laimi le Messiah a sinâk in a miphun hna kum 1000 a uktu ding Jesuh:--

Vawlei dongh bia a ceih hnu ah A Pa Pathian sinah Pennâk a chântu ding Jesuh cu Biakam Thar Baibal i Jesuh pathum hna lakah pakhat a si.

Jesuh pahnihnâk:-

Saiparas tikulh ah a ummi Pafos timi khua a a ummi a si i a min pum cu Bar-Jesuh tiah ti a si. Paul chimmi Pathian Biatak a ralchanhtu a si caah Paul nih Thiang Thlarau țhawnnâk hmangin mit caw lak in a sikmi pa a si. Lam.13:6-11.

A tuanbia dang Baibal nih a țial ti lo.

Jesuh pathumnâk:-

Kolos khua Kawhhran hna sin ah Paul nih ca a kuatmi ah a chimmi a si i a min pum cu Jesuh Justus ti a si.Kol.4:11 Lam. 18:7 ah Luka nih a chimmi Justus he â khatmi a si ah cun Korin khua ah a ummi Jesuh zûmtu mi pakhat a si.

A konglam dang Baibal nih a țial lo.

Jesuh dang:--

Paul chan ah Paul chimmi Jesuh si loin Jesuh dang a chimtu an rak um bangin atu chan zong ah Jesuh dang chimtu an um.

Cu hna nih an chimmi Jesuh cu:--

Amah lawng tein a ummi Pa zong a ngei lo tiah an ruahmi Jesuh:-

Vancung mi nih an bunhmi Jesuh a si ko nain Pathian min a si rua tiah an ruahmi Jesuh:-

Țonchom in Pa le Fapa le Thiang Thlarau min ah an ruahmi Jesuh:-

Pa a um ko nain a um lo tiah an ti i mihrut bangin amah le amah 'Ka Pa" tiah an kawhter lengmangmi Jesuh:-

Ngaihchia vansâng au in Gesimani dûm i a umlio zongah amah le amah 'Ka Pa' tiah an titermi Jesuh:-

Vailamtahnâk cungah bawmtu dang a ngeih lo lio zongah amah le amah "Zeicadah naka kaltâk" tiah an autermi Jesuh:-

Thihnâk thlânmui chungin thawhtertu Pa a ngei lo tiah an ti i amah le amah an thawhtermi Jesuh:-

Lei le van nawlngeihnâk vialte le min cungnung bik zong a petu Pa a nei lo tiah an ti caah amah le amah â pe tiah an ruahmi Jesuh:-

Van i a kai hnu ah zûmtu caah Pa sinah a kan nawlpiaktu a si ko nain amah sin lila ah amah nih akan nawlpiak tiah an ruahmi Jesuh:-

A mithiang hna la dingin a ratnâk ni a hngaltu Pa a um lo an ti i amah Fafa Jesuh zong nih a hngalh lo caah awlok chongin an umtermi Jesuh:-

Mithiang lâk i a rat hnu ah Messiah a sinâk in a miphun hna kum 1000 a uk hnu ah vulei dongh biaceihnâk a dih in Pennâk cu Pa Pathian sinnah a pek lai timi zong Pa Pathian a um lo an ti caah amah le amah â pe lai tiah an ruahmi Jesuh:-

Cu Jesuh cu Baibal Cathiangah a um lomi, Cathiang lila nih Jesuh dang a timi, tuchan ah cheu khat nih an chim lengmang mi Jesuh dang cu a si

Na Hawi Le Sin Ah Share Ve!

• Tweet
• Share
• Share
• Share
• Share