Pa le Fapa le Thiang Thlarau min in tipil pek hi Jesuh min tipil in a si.

Pa le Fapa le Thiang Thlarau min in tipil pek hi
Jesuh min tipil in a si.

Evan. Rual Uk

Zeicatiah:-

"Nawlpetu nawlpek ning te in tuahmi kha Nawlpetu min a si zungzal"

Tipil cu mah lawng in in phung le pek phung a si lo.

Cucaah Tipil in tik pauh ah mi phun hnih, tipil a ingmi le tipil a petu an um tawn.

Kei zong 1969 Oct. Ni 15 zan ah Thiang Thlarau ah Hrințhânnâk ka co i Nov. Ni 20 ni ah tipil ka ing. Cuni ah tipil a ka petu cu Rev. Thangve a si.

Rev. Thangve nih ti chung i a ka pilter lai te ah bia aka halmi cu " Vailamtahnâk thing cungah a nunnâk a pe i thihnâk in thawhter a simi Jesuh Khrih kha ka Khamhtu le ka Bawipa a si tiah na zum maw?" tiah a ti i kei nih "Ka zumh" tiah ka ti.

Cutikah "Pa le Fapa le Thiang Thlarau min in tipil kan pek" tiah a ti i ti chungah aka hnim i ti chungin aka thawh ter țhân.

Cucu Jesuh min tipil in cu a si.

Zeicatiah Jesuh nawlpek ning tein a tuah caah nawlpetu Jesuh min a si.

Rev. Thangve nih khan "Jesuh min in tipil kan pek" tiah rak ti seh law Jesuh min tipil in a si lai lo.

Zeicatiah Jesuh nawlpek ningin a tuah lo caah Nawlpetu Jesuh min a si kho lo.

Cucaah Lamkaltu hna nih khan Jesuh nawlpek ning tein an rak tuah caah "Jesuh min in tipil ing u, Jesuh min in tipil an ing" tiah Luka nih a țialnâk hi a si.

Thawngțha pali lakah pakhat a simi le Lamkaltu cawlcanghnâk cauk a țialtu Luka hi Kolos 4:24 ah "Luka dawtmi sibawi" tiah a țialmi hleiin Baibal nih a tuanbia a țial ti lo.
Tuanbia nih a țialning ah cun sibawi a cawn lio ah a thiam bik a si lengmang caah Medițherenian Rili kam ram vialte a zim in a uktu Rom khua siangpahrâng Sizar nih a inn chungkhar ah sibawi rian țuan dingin a siangpahrâng hmelhchunhnâk sui zunghruk in a hammi pa a si.

Asinain sibawi cawn ka dih tik ah ka țhit te lai tiah a hammi a ngaknu nih ruah lo pi in a thih tâk tik ah zûn ngaiin an Grik milem pathian thong 30 reng lo kha a ton hnu ah a zûnngaih le lilên le lungsivanghnâk kha an chãng kho lo.

A hnu ah Jerusalem ah a phân i Judah mi le Rom mi an țih ruangah a thlithup in lungkua ah â pummi Kristian sinah a phân i Jesuh Khrih nih vailamtahnâk ah a nunnâk misual caah a peknâk le a thawhțhânnâk thawngthâ, Peter nih a chimmi hmangin thoțhân Khrih kha a nunnâk nih a ton.

A zûnngaih le lilên lungretheihnâk vialte an tla dih i Sizar sinah "Siangpahrâng pa ka ngaithiam. Na inn ah sibawi rian țuan in ka ra ti lai lo. Zeicatiah lei le van ah nawlngeitu Bawibik, ka zûnngaihnâk le lungretheihnâk aka chângtu kha ka hmuh cang i a caah ka nunnâk le ka cân dihlak ka pek cang" tiah a zunghruk kha khirh in a kuat țhân.

Hihi Baibal ah ruah ding a si lo. Baibal pawng te ah a ummi tuanbia nih a chim ning a si.

Cucaah Sibawipa Luka nih Sizar min a khah dih nâk Medițherenian Rili kam ram vialte ah Jesuh min khahter dih kha a saduhthah ngan bik le a tinhmi a si.

Cu ram dihlak ah "Sizar min" tiah an ti lengmang mi a sullam tak tak cu "Sizar Nawlngeihnâk" tinâk a si. Phundangin chim ah cun "Sizar nawlngeihnâk" ti can ah "Sizar min" ti kha hman a si.

Cu kong cu Sibawipa Luka nih fiang te in a hngalh tik ah "Jesuh Nawlngeihnâk" timi can ah a tawinâk in "Jesuh min" timi a hman nâk hi a si.

Cucaah "Jesuh min in tipil ing u" timi cu "Jesuh nawlpek ningin tipil ing u" ti he a khat bak mi a si.

Cun "Jesuh min in tipil an ing" timi zong "Jesuh nawlpek ningin tipil an ing" tinâk bak a si.

Zeicatiah Sizar min in an ti ah cun Sizar nawlpek ningin ti he a khat bak a si.

Cucaah tipil petu nih "Pa le Fapa le Thiang Thlarau min in tipil kan pek" tiah a timi khi Jesuh min i tipil in timi cu a si.

Zeicatiah Jesuh Nawlpek ningin an tuah caah nawlpetu Jesuh min a si.

Na Hawi Le Sin Ah Share Ve!

• Tweet
• Share
• Share
• Share
• Share