"Cu miding cu an lak ah khua a sa i ningcang lo i nifatin an nunnâk le an tuahsermi a hmuh i a theihmi nih khan a dingmi a nunnâk kha a fahter tawn" 2Pet. 2:8.

"Cu miding cu an lak ah khua a sa i ningcang lo i nifatin an nunnâk le an tuahsermi a hmuh i a theihmi nih khan a dingmi a nunnâk kha a fahter tawn" 2Pet. 2:8.

Evan. Rual Uk

Zumhnâk i kan pa a simi Abraham chan ah Sertu Pathian nih Sodom khualipi ah khua a sami minung kha Mei le Kât hmangin a rak hrawh lai ah Abraham unaupa Lot kong Biakam Thar Cathiang nih a chimmi hi ni hin kan Chinram, a hlei in Lai holh a hmangmi Chinram khualipi Hakha le Thantlâng thil a cang cuahmahmi he cuai ah thlai in ruah le khah hi a herh tak takmi a si.

Sodom khualipi ah khua a sami sermi minung hna nih Sertu hngalhnâk le țihzah upatnâk um loin khua an sak lio ah khan Sertu Jehovah Pathian a rak hngal i țihzah le upatnâk a ngeitu mi pakhat Lot timi cu an lak ah khua a rak sa i Sertu Pathian hngalhnâk le țihzah upatnâk a ngei lomi hna nih ningcang lo le dinlonâk in an cawlcanghnâk le an tuahsermi nih khan Pathian a hngal i a țihzahtu Lot chung i a ummi dinnâk kha a fahter tawn, tiah Cathiang nih a ti.

Kawlram chung ah State hna lak ah Eihmuar le Ziknawh a tamnâk bik State ah thim kan simi thawng nih hin Chimram ah khua a sami Kristian hna kan chungah a ummi dinnâk, Sertu le Baibal Cathiang cawnpiaknâk in kan hngalh i Thiang Thlarau nih kan chungah a fehtermi Dinnâk hi a fahter bal maw?

Kan khualipi a simi Sii Zung ah zângfah awk tlâk a simi le bomh a herh tak takmi khuate lei mizaw hna operation an tuah tikah cozah nih cu rian a kan țuanpiaktu dingah tling tein lahkhah a pekmi sibawi le sayamah te nih zangfahnâk le zawnruahnâk um bak loin phaisa, a tlawm bik thonghra an hal tawnmi hna thawng kan theihmi nih ta kan chungah a ummi dinnâk hi a fahter bal maw?

Thantlâng Lah-uah-kah zungah hmatpungțin a kan tuahpiaktu dingah cozah nih tling tein lahkhah a pekmi rianțuantu hna nih hmatpungțin a tuahtu hna sinah thlachiat ruat bak loin phaisa thong sawnsarih an hal tawnmi thawng kan theihmi nih ta Sertu Pathian le Cathiang in kan hmuhmi dinnâk, Thiang Thlarau nih kan chungah a fehtermi dinnâk hi a fahter bal maw?

Inn hmun loram kongah siseh rian pakhat khat hmuh khawhnâk dingah siseh Pathian le Cathiang nih a huat bikmi ziknawh le tlonhtlamhnâk lo cun hmuh khawh a si lomi thawng kan theihmi nih ta Pathian le Cathiang in kan hmuh i Thiang Thlarau nih kan chungah a chiah i a fehtermi dinnâk hi a fahter bal maw?

Sodom khua chungah dinlonâk le ningcang lo in an cawlcanghnâk le khuasaknâk nih khan Lot chungah a ummi dinnâk, a țihzah i a upatmi Sertu Pathian sin in a hmuhmi dinnâk kha a fahter dah kaw!

Hi tluk in kan Chinram ah dinlonâk le ningcang lo khuasaknâk, eihmuar le ziknawhnâk thlichia le tilet nih akan tlunhnawh cuahmah lio ah Pathian le Cathiang in kan hmuh i Thiang Thlarau nih zûmtu chungah a chiah i a fehtermi dinnâk hi a fahter lo a si ah cun Pathian le a Biatak ah Thiang Thlarau nih a bunhmi zûmtu si loin Pathian le a Biatak ah Thiang Thlarau nih a bunh lomi zûmtu deu kan si tinâk a si.

Phun dang in kan chim ah cun dinlonâk le ningcang lo in cawlcanghnâk le khuasaknâk nih a fahter tawnmi Lot chung i a ummi dinnâk kha kan chungah a rak um lo tinâk a si.

Lam dang in kan fianter ah cun ningcanglo le dinlonâk le eihmuar le ziknawh zong poi a ti theng lomi, milem a biatu kawl he kan i dang hlei lo tinâk a si.

A sullam tak tak cu eihmuar le ziknawh zong poi a ti theng lomi milem a biatu kawl nih eihmuar le ziknawh huat tak tein a huatu Pathian nung a biatu chinmi hi an kan tei cikcek tinâk a si.

Na pawngkam i ningcang lo le dinlonâk le eihmuar le ziknawknâk nih khan na biakmi Pathian le Cathiang in na hmuhmi dinnâk, Thiang Thlarau nih na chungah a fehtermi dinâk kha a fahter bal maw?