"BAIBAL AH A UM LO"

"BAIBAL AH A UM LO"

Evan. Rual Uk

Baptisma (tipil) a petu nih zûmtu pakhat khat Baptisma a pek lio ah a chim tawnmi

"Pa le Fa le Thiang Thlarau min in Baptisma kan pek"

tiah a ti tawnmi le

"Jesuh min in Baptisma kan pek"

tiah a ti tawnmi bia hi:-

BAIBAL AH A UM LO

Pa Pathian nih lei le van nawlngeihnâk vialte a pekmi Fapa Jesuh Khrih nih van a kai lai te ah zûmtu hna Baptisma a petu ding Lamkaltu hna sinah hmadung bik bia a cah tami cu:-

"Cucaah kal u law, miphun kip kha ka zultu va siter hna u, Pa le Fapa le Thiang Thlarau min in Baptisma (tipil) pe hna u law..." Mt. 28:19 tiah nawl a pek hna.

Ni 10 a rauh hnu ah Peter nih "Jesuh Khrih min in Baptisma (tipil) ing u" tiah a ti hna i mi thong thum hrawng nih Baptisma an in" tiah Baibal nih a ti, Lam.2:38-41.

Asinain kha mi thong thum hrawng Baptisma (tipil) a petu (Lamkaltu hna an si kho men) hna nih Baptisma (tipil) an pek lio ah an chimmi bia kha:-

BAIBAL AH A UM LO.

Samaria ram ah Filip nih Thawngțha a chim i zûmtu nih Baptisma (tipil) an innâk kong kha Baibal nih a chim, Lam.8:12.

Asinain tipil a petu (Filip a si kho men) nih tipil a pek lio ah a chimmi bia kha:-

BAIBAL AH A UM LO.

Paul kha Damaska haukâ i a lung â thlen tikah Baptisma a innâk kong kha Baibal nih a chim, Lam.9:18

Asinain Baptisma a petu (Ananias a si kho men) nih Baptisma a pek lio ah a chimmi bia kha:-

BAIBAL AH A UM LO.

Gentel mi Kornelia chungkhar ah Peter nih Thawngțha a chim i a zûmtu hna kha Bawipa min i Baptisma (tipil) in dingin nawlpek an sinâk kong kha Baibal ah a um, Lam.10:48.

Asinain Baptisma (tipil) a petu (Peter a si kho men) nih Baptisma a pek lio ah a chimmi bia kha:-

BAIBAL AH A UM LO.

Asia Minor ah a ummi Efesa khua zûmtu hna Bawipa Jesuh min in Baptisma an innâk kong kha Baibal nih a chim, Lam.19:5.

Asinain Baptisma a petu (Paul a si kho men) nih Baptisma a pek lio ah a chimmi bia kha:-

BAIBAL AH A UM LO.

Cucaah biahalnâk a um hrim hrim a herhmi cu

"Baptisma a petu nih Baptisma a pek lio ah

"Pa le Fapa le Thiang Thlarau min in Baptisma kan pek"

tiah a ti lai maw

"Jesuh min in Baptisma kan pek"

tiah a ti lai dah?"

Zeicatiah a pahnih tein

BAIBAL AH A UM LO.

Na duh deuh mi pauh na zumh khawh!

Zeicatiah a pahnih tein:-

BAIBAL AH A UM LO

Hi ca a țialtu nih pumpâk in ka zumh deuh mi cu Baptisma a petu nih Baptisma a pek lio ah,

"Pa le Fapa le Thiang Thlarau min in Baptisma kan pek"

tiah a ti hrim hrim lai tiah ka zumh.

Zeicatiah cucu Pa Pathian nih lei le van nawlngeihnâk vialte a pekmi Jesuh Khrih biacah hmadung bik a si.

Note:-

"Pa le Fapa le Thiang Thlarau min in Baptisma pek hi Jesuh min Baptisma in a si"
timi hi Lamkaltu cauk a țialtu Sibawi pa Luka tuanbia le Baibal Background he ka rak țial țhân te lai.

Na Hawi Le Sin Ah Share Ve!

• Tweet
• Share
• Share
• Share
• Share