Vaw leipi kong

Kan umnak vawlripi hi ti le vawlei tiin then hnih ah kan then. Vawleipi i thumchuahhnih (then thum then hnih) hi ti a si i, thenkhat lawng hi hi vawlei a si. Then hnih a simi ti hi “Rihlipi” tiah kan auh i, thenkhat a simi vawlei hi “Leithen” tiah kan auh. Vawlei cungah Leithen 8 le Rihlipi 5 an um.

I. LEITHEN

Leithen kan timi cu minung, thingkung le leicung um saram hna nih kan umnak vawlei hi a si.

Asia Leithen

Asia timi min hi hlanlio Greek holh in latin Latin holh ah a rami a si. Cu hnu a Mirang holh ah aa thlengmi a si. BC 400 hrawngah Herodo ralkap hna nih Asia Minor tiah an rak auh hmasa bik. Asia Leithen ah ram 48 an um.

An umnak

Asia Leithen cu vawleipi i nichuahlei ah a ummi Leithen a si. Asia Leithen hi “Suez” kahcham le Ural tlaang i nichuahlei le Caucasus tlaang i thlanglei, Caspian Rilipi,thlenglei ah India Rilipi, chaklei ah Arctic Rilipi le nitlaklei ah Europe Leithen hna he ramri an i tlai.

A bitkauh
Asia Leithen hi vawlei cung Leithen vialte lakah a ngan bik a si. Asia Leithen cu 17,212,000 meng vuakvel a kau.

Miluzat

Asia Leithen ah milu 38,879,000,000 (3.879) an um i mengkhat vuakvel ah minung 225 tluk an um i vawlei pumpi milu i (60%) tluk a si. Kum zabu 20 chungah hin Asia Leithen ummi milurel cu a letli tiang a karh.

Africa Leithen

A umnak

Africa Leithen hi vawlei cung Leithen vialte lakah pahnihnak a ngan bik a si. A bitkauh tuak tikah 11, 668,599 meng hrawng vuakvel a kau.

Miluzat

Kum 2010 milurel cazin ning incun Africa Leithen ah minung 1,022,234,000 an um i, buaktlaak in mengkhat vuakvel ah minung 80 an um.

Chaklei America Leithen

A umnak

Chaklei America Leithen hi vawleipi chaklei ah Arctic Rilipi, thlang lei ah Rilipi le nitlaklei ah north Pacific Rilipi hna nih an kulh. Chaklei America Leithen a ngan bik leithen a si.

A bitkauh
Chaklei America Leithen hi 9,540,000 meng vuakvel tluk a kau. Vawleipi i zatuak 4.8 (4.8%) tluk a khuh. Vawlei cung Leithen vialte lakah pathumnak a ngan bik a si.

Minsaknak

Chaklei/Thlanglei (North-South) America minsaknak kongah ruahnak a siloah zumhnak pahnih a um.
Pakhatnak cu Italy ram zuksuai thiam Amerigo Vespucci philhlonak ah an chuankhaanmi a si. Amerigo Vespucci nih, America Leithen hi India nichuahlei Leithen siloin Europe miphun hna nih an hmuh bal lomi vawlei thar a si tiin mipi sinah phuang hmasa biktu a rak si.

Pahnihnak cu Miraang chawleh riantuantu Richard Amerike min philhlonak ah an rak auhmi a si ti a si. Richard Amerike nih Newfoundland khi 1497 ah a rak hmuh.

Miluzat

Kum 2008 milurel cazin ning incun Chaklei America Leithen ahhin minung 528,720,588 an um i, buaktlaakin mengkhat vuakvel ah 59 an um.

Thlanglei America Leithen

A umnak

Thlanglei America Leithen cu Chaklei America Leithen i thlanglei kamah a ummi Leithen a si. Thlanglei kap le vawlei pumcheu thlanglei kapah a um. Nitlaklei ah Pacific Rilipi, nichuahlei le chaklei ah Caribbean Rili a um. Thlanglei America Leithen cu ram 12 umnak Leithen a si.

A bitkauh

Thlanglei America Leithen hi 6,890,000 meng vuakvel a kau.

Miluzat

Kum 2008 milurel cazin ning incun Thlanglei America Leithen ah minung 385,742,554 tluk an um i, buaktlaak in mengkhat vuakvel ah 56 an um.

Atarctica Leithen

A umnak

Antarctica Leithen hi vawleipi thlanglei bikah a ummi Leithen a si i, Southern Rilipi nih a kulh. Antarctca Leithen hi buaktlaak in tuak tikah Leithen dang hna vialte lakah hi a kik bik, a rocar bik le thli a hraanak bik Leithen a si. A kihlum ah -89′ C (-129’F) tiang a phan.

A bitkauh

Antarctica Leithen hi 5,400,000 meng vuakvel a kau. Vawlei cung Leithe vialte lakah a panganak a ngan bik Leithen a si. Australia Leithen i a lehnih tluk a ngan. Antarctica Leithen hi 98% tluk hawhra nih a khuh. Hawhra hi meng 1 tluk a chah.

Miluzat

Hi Leithen ah a zungzal in umhmun a khuar khua a sami a hohmanh an um lo. Asinain hlathlainak tuah duh ah hi Leithen a rak phanmi hi kumkhat ah minung 1 000 in 5 000 tiang an si zungzal.

Europe Leithen

Europe Leithen cu chaklei Arctic Rilipi le rili dangdang hna nih an kulh. Nitlaklei ah Atlantic Rilipi a um. Thlanglei ah Mediterranean Rili le nichuahlei-Thlanglei ah Rilinak hna he pehtlaihnak tilam a um. Europe le Asia Leithen hi Ural le Caucasus tlaang, Ural tiva, Caspian Rili pehtlaihnak tilam hna nih a thencheu hna. Europe Leithen cu ram 50 umnak Leithen a si.

A bitkauh

Europe Leithen hi vawlei cung Leithen vialte lakah a hme bik chang a si i, 3,930,000 meng vuakvel a kau.

Miluzat

Kum 2009 milurel ning incun Europe Leithen ah minung 731,000,000 an um i, mengkhat vuakvel ah minung 181 tluk an um.

Australia Leithen

Australia Leithen hi vawlei hi vawlei cung Leithen vialte lakah a hme bik Leithen a si. Australia Leithen cu vawlei pumcheu thlanglei kapah a ummi a si. Australia cu Indonesia, Papua New Guinea, East Timor hna nih chaklei in, the solomon Islands, Vanuata le nichuah thlanglei in an karcehmi ram a si.

A bitkauh

Australia Leithen hi 3,269,629 meng vuakvel a kau.

Miluzat

Kum 2009 milurel cazin ning incun Australia Leithen ah minung 31, 260,000 an um. Buaktlaakin mengkhat vuakvel ah 7 tluk an um.

Hivial hin za rih seh law, Pathian dawtnak thawng in caan ka ngeih than a si ahcun, ka peh than lai….

Ka khua ka tlung

        Ruah lipi khin ṭuan kan relnak nak kuala lumpur chuah tak dingdir hmu ah ka van dir ka ruah lo tuk thilcangmi aasi caah ka um hna nuam lodeng khin zei tikin maw dik khin ka um. Cu ah thil pakhat ka ruatmi cu ruah lotuk thil cang cu si kaw ka hawi le hna thanh manh lo le chim manh lopi hi ti thil avang cang mi a si caah ka khupṭhi rual hna ka hlam khun hna abik in ka thinlung nih kaa hammi ka mitsir in ka ven mihmanh chimchawn manh loin hi ti ṭian lai dingmi hi asi kho lo tuk ah ka ruah ka relh lo bu khin kan umnak cun Taxi bawmhpah cun kei mah le kei mah cu bia kaa ruah len, tanglei in tlung ding ka si caah Taxi pa sinah cun (jln Imbi) ka van ti RM - 30 a ti ok ka van ti i Imbi lei ah cun Taxi Driver pahe cun kan chawi cawlh.

Hawi le ti chim ta lo cu ka ti i ka phone chia te cu kai van chuah i ka mit sir in kaven pengmi cu a hmaisa cem ah cun ka van call a phone a tlai kho lo a rian ṭuan liopi a si i si la dah ka ti, voi thum tiang ka call lennain a tlai kho lo caan ka ngeihmi atlawm tuk caah mi dang chawnhmanh nak caan ka ngeiti lo a tu le tu puaisa pa nih naphan deng cang maw? A tu le tu a van ka call ho hmanh chawnh le chimh ta loin ka semnak khua ah tlungding cu si thiam lo tiin na nuam ah ka nuam ve lai na ngaihchiat ah kan tuarpi ve lai ka ta cu na ta asi tiah a ka ti pengmi ka hawiṭha kawilian tel nih phone a tlai kho hnga maw ka ti i ka van call ṭhan van ṭhat ah hello! Hello! Kawi zeidah mah tluk tlaipi cun a van ka ti, ka sining cu ka chim i a nih zong nih cun aa ruah lopi in cu ti cu tuan deuh in pei chim ding asi cu ati, asi kei zongruah lopi in pei kaa timh fom cu hi, ka ti cu ti cun bia tampi a ka cah i Imbi cu kan phan.

Kan tlunnakding motor nih cun ready cun a rak ka hngah cang ka kai cawlh i duhsah tein kuala lumpur cu hnu lei chit in thailand lei a kan panhpi hohmanh i chawn lopi cun thailand cu kan van lut rawlhna kan van kan ei khim cun an kan tlanpi ṭhan i sau lak an kan kalpi hnuah tinbaw umnak hmun kan phan i tinbaw cun kan kalṭhan i kawhtawng ah an kan ṭhumh kawh tawng cun motor nih an kan lakṭhan i yangon lei an kan panh pi i yangon ah cun puaisa inn ah an kan chiah. Buss laitlang lei tlungding mi a um a landuh mi nan ummaw ? An kan ti i tluncolh ka duh ko kati hna i kan puiasa nih phone a van chawnh hna i Hakha Direck a um caah vanṭhat ka ti i tixi an hlan i buss stop tian puisa nih cun a ka thlah i Hakha cu athaizing ka teah ka phan.



Tu tan ruah lo tukin khua ka tlun hi thildangpi asi lo ka Nu le Pa nih phone in an van ka chawnh i kan nih cu chun hnu minung kan si cang caah zei kan tawn lai zei tik ah dah kan inn kan hlamcang lai kan i thei lo, cu caah chunhlan minung kan si cang caah kan dam lio teah Nupi kan in ṭhitpiak lai an ka ti caah an bia ka al len ko hna nain Nu le Pa bia hrat cu al awk an ṭha thlu lo caah kan Nundam chungah na caah kan saduh tha mi kan in ṭhipiak lai an ti caah khua ka tlunnak hi asi,

Kei zong nih cun Nu le Pa dawtnak cu al ngam loin hi ti thil ka timh tuah hi asi ve duhsak ngai in le ruahchan nak ngeibu tein ka caah ka Nu le Pa nih ka caah khua an khan mi hi thildik tukmi asi ti in kei zong nih Nu le Pa an ka duhsak piak mi cu zulding in ka timtuah ve hi asi, hi vawlei kan nun chung caan tawiteah hin kan Nu le Pa hna hi kan Pathian an si i kan caah lamṭha lamdik an kan kawhhmuh tu lawmsia tu an si caah kan caah thilṭha lo an duh lo kan caah thilṭha tuahpiak an duh bikmi le an Fanu/pa hna hi misang cathiam mifim si dingin an kan duh piak viar cu an kan duhpiak mihna cu a puitlin tuding cu Fa le hna kan rian asi ve caah an kan duh piakmi zeipi pa kan tuah khawh lo hmanh ah kan phak khawh lo hmanh ah hi vaw lei kan nun chung ah zungzal caah an kan thimpiak mi cu al ngam a fawivai te lo caah kei zongcu ruah lopi in ka semnak lungrawn khua ah ruah lo tuk in timh lamhnak ngei manh lo in ka tlunnak cu asi.

A caan cu zanlei 6:30pm hrawng asi cang damte in khua cu ka phan cerlian ni nu zong ka rian ka limcang ti phun khin kan lungrawn khua te cu seken 1 khat hnu pakhat in bye bye a van tuah cang, cerlian ni nupi nih a dawhnak a langh ri le ri lo cun vengthlang lei thilzil nih cun duh sah tete cun kei zong cu avawn ka chem ve ka thin lung cu phudut! Phudut! Ti khin a tur a laam len ko zei chim awk ka thei lo ngang ko cun ka dir aw! Ruah lopi cun cu ti na van langh ti pahkhin khu nu khua pa hna nih ka kut an van ka tleih si hi ruah lo tuk in ka van tlunghi tipah cun an kut ka tleih ve hna, na rak dam ko ti? Na cak rih tuk hi ka ruahnak in ti pahcun pakhat hnu pakhat an kut ka van tlaiduah mahhna.

Mizapi an ku tleih ka limhna hnu ah ka hmai ka vun her i ka sir ah sem cawi in arak dirmi ka hmuh mi nih ngang ko in a ka um ter zeiti biahram domh in dah ka chawnh lai ka ti von ot colh ding khin hmuah cilh in, Hmai tawnh in kan dir cang chim awk a har ve cu muuu,......

Kan kar lak kan pahnih kar lak bia chimding tampi a um voi khatpi ah khin a hlan kan tuanbia hna chikhat lopi ah pakhat hnu pakhat in mitthlam ah an vun cuang cawlh a kil le kawi in ka thin lungah avun lang a nih zong amit hmai apanh tuk ve lo sihmanhsehlaw thil singning nih a si kho ti lomi kan pahnih kar lakbia hna le kan tuan biahna cu khirh len hmanh ning law san atlai ti lo cu mu a ca zongah ka ca zongah van khirh len hmanh ning ulaw kan caah ah lunghnur tu men ah acang dingmi ah an cang cang, Kei zong zungzal ca dingah ti in ka Nu le Pa nih an saduh thah cu tlinter ah a tutan khua ka phak cu si cu mu, E!! Nan rak dam maw? A kut ka tleih cawlh um mah hihi na fa nu maw a dawhtuk hi nangmah he nan i lo tuk ka ti, lai khal rian ṭuan cu a kut cu a lo thlawhnak ah a ṭettak ve a phuhrung pah biatam kan chim hlan ah an pa(pasal) nih e dam te navan phan ti? Umm! Kan kut kan i tlai a Fa nu te holhthim a hrawt silin mi nih cun a pa cu ahauh cawlh kalpah khin bia kan i ruah pah bu khin duhsah tein kan ke kan hlanghna, Cer lian Ni nu zong a lang ti lo Vankam senmi long a tang cang luklak ah kum nga leng ka hmuh ti lomi kan inn kan ruun nuam teah cun kan lut hna.


Tlawm pal kan ṭo hna hnu a kafar nu nih ṭaṭa na tak i kholh cang ka tuah cang na batuk la, E! Si maw ka lawm ka ti kholhding in kholhnak khan chung ah ka lut, ka kholh thlu ka van chuak cun, kan sofa cungah a rak ṭomi ka hmuh mi nih dut tiah ah ka thin a ka phawh duh sah tein a van dir a van ka fuk colh a mui fiang tuk in ka hmu kho lo ka van neih deuh ah khin.

J. Ṭha Lian Ssang nih asak mi Nu Nu kan duhtuk mu timi hla ka phone rington nih a van ka hlau!!!

A dawh maw Dawh lodik keizong nih ka fiangmanh lo a sam thlak cu aarem ngai zeitul khi dik asi lai van ruat cio ko uh.

By Salai Cinzah

6 may 2015 zaan

Bible Code 12nk a peh than

   

Even, Lian Hlun

  A huammi rel awkah BIBLE CODE! A voi 12 nak caah ka vawn pehtthan.

Bible nih a chimchungmi bia azum kho lo tu hna nih cun, Khrih arat hmaisah lio i thil arakcang-araktlungmi hna hi, aratcang hnu i a tawnmi hna he irem dingin tlai hnu piah benh chawm mi ah khin an ruah tawn. Asinain profet Zakhariah nihcun cuhlan kum 2500 hrawng akal cangmi ah khan, hihnuah (vawlei caan dongh lai i) thil arak cangding ( a tu lio minung hna zawng nih kan hmuh phak rih lo mi), Israel miphun dihlaknih an Messia an hngah-hlang ngaimi cu 'Jesuh Khrih, an mah hrimhrim nih an khenhchihmi thengte kha arak si ko' timi an vawn hngalhfian-tthan dingmi le, an miphun dihlak nih lungthlennak-anngeihnak ding le, ngaihchia-lungkuai i an Messia an ttahtthan  lainak hna cu fiang tukin arak chim chung dih cang. Tuhnuah Harmageddon ituknak arak chuah tik i Israel miphun hna chanhding le khamhdingin 'Bawi Jesuh arattthan lainak zong fiangtein arak chim chung cang i arak cawnh diam cang' Hibantukhin kan hmuh: " Sihmanhsehlaw david ciruang hna le Jerusalem khua i a ummi hna cungah cun zangfaknak le zawnruahnak thlarau kha ka thlet lai. Khi tikah An rak ka chunhmi keimah kha an ka zoh lai i Mi nih an fa ngeih chunte an ttah bang le an fater an ttah bangin an ka ttah lai"(Zak.12:10).ah a ti. Hi caangi' fa ngeih chunte' (Ha'yachid) timi biafang i'chet' timi cafang i vawn relin cafang 38-nak paoh kha vawn lak ahcun Messia ( Heb. Mashiah) timi hi arak chuak ko.

          

            Leviticus ah hin Jesuh thisen nih kan sualnak vialte chungin a kan tlanhnak abiapi tukmi arak i phum. Moses nihTlangbawi hna an ni thenhhlimhnak ding kong a chimh hnanak caang ah a si. Yacov Rambsel-nih cun leviticus 21:10-12 ah hin Hebru hawlin hain dam Yeshua ( zoh tuah, Jesuh thisen cu) timi ahmuh tthan. Hibantuki Biakam Hlun thluan i Pathian nih secret-code hmang i a Fapa Jesuh Khrih kong arak phum dih komihi minung fimnak nihcun aruah in aruah phak lo mi a si.

           

            Messia kong rak chimchungnak hna lakah cinken-chinchiah awktlak ngaimi cu, amah zultubak a si vemi Juda Iskariot nih a hlawt lainak bia hi a si. Salm 41:7-10 bia ahcun: "A ka huami nih khan a thli tein an ka congoih ka ca i a ttha lo bik ding kha an ruat... Ka hawi ttha bik, ka zumh bikmi, rawl a ka hrawng lengmangmi hmanh kha ka ral ah a cang," timi bia kan vawn rel tikah, hi bia hi a hao kong dah a si hnga? tiah lungchung ah biahalnak a lut kho. Sihmanhsehlaw hi bia phen ahhin code hmangin Jesuh min hi Pathian nih arak phum diam ko. Cafang pakhat dan ah arak si chinchap cu mu.

            

            Jesuh min code i arak langhnak alang-khun mi cu Isaiah 61:1-2 nak i, " Bawipa Pathian nih thlarau in a khahter. Sifakmi hna sinah thawng ttha phorh awk le lung a kuaimi hna damter awk le sal i a tangmi hna sinah chuahnak thanh awk le thong chung i a ummi hna sinah luatnak thanh awkah a ka thim i a ka thlah," timi caang ah hin a si. A umnak ding sidawh ngai zawng a si. Caang hnihnak ah hin cafang 36 danah Oshiyah timi bia hi arak um arak i thuat tthan hawi i; asullam cu "ka khamh lai" tinak a si.

Peh tthan ding mi hna,

 

Vailam-ah khenhchih ko!

Hebru cafang nambar umtuning.

Scientist-hna an lung amit!

Lian Hlun ( Meme Pa)

Bible Code 11nk Savun angki fual

Even, Lian Hlun

Dear all,

           A huammi rel awkah Bible code! Voi 11 nak caah ka vawn thlah tthan.

Savun angki fual. Genesis 3:21-ah hin Pathian nih Adam le a nupi Evi caah savun angki fual a tuahpiak hna i, a aihter hnanak kha kan hmuh. Sual i antluk hnu i, antaklawng huhphenh khuhvurhnak caah a si. Cubantukin, dawhte i ihuhphengnak ding caah cun raithawinak Sa bangin Pathian nihcun Sa pakhatkhat a thah a hau cang. Hi nih hin misual mi hna kan thiannak ding caah le kan ni huhphenhnak ding caah Pathian Tufano nih apum aipeknak kha arak hmuhsak diam cang. Hi caang abiapitukmi phenah hin Pathian biacahmi arak iphum tthan hawi ko. Genesis 3:20- chungah hin Hebru cafang hmadungbik 'heh' timi i vawn relin, cafang 9-nak paoh kha vawn lak ahcun 'Yoshiah' timi bia hi arak chuak i, asullamcu ' A khamhlai ' tinak a si.Yoshiah timi le Yeshua ( Jesuh ) timi hi Hebru ahcun ai khatmi a si. Minung hna an sualnak ruang i antaklawng huhphenh an herhnak bia chimnak caang zawn thengte i 'Yoshiah' ( A khamhlai ) timi bia le, Matthai 1:21-ah Mary sinah Vanmi nih " A min ah Jesuh na sak lai; zeicatiah a mi kha an sualnak chungin a khamh hna lai" timi bia hna hi an ni rem sawhsawh lawng si loin, khuaruah khawhnak afimtukmi nunlung pakhat chungin arak chuakmi a si pinah, cunglei kutchuak a si ning fiangte le fektein alangh tertu cu a si.

          Hika Bible code nih a chim mi abiapit ning cu mahbantukin a si, 'savun angki fual' timi bia i Hebru cafang 'ayin' timi in vawn rel ah, cafang 7 nak paoh kha vawn lak ahcun Yeshua timi bia hi arak chuak tthan hawi ko. Kan uar theng lo mi 'savun angki fual' timi lawng hmanh nih hin Thlarau lei biathuk ngaimi arak ken cuh! Adam le Evi nih hnipuan aihawk nei loin an um lio ah, an taklawng huhphenhnak ding le khuhvurhnak ding ca i Pathian pekmi 'savun angki fual' kha, zeidang-thildang rak si loin Bawipa Jesuh thengte kha arak si ko timi hi secret-code hmangin hmelchunh-chinchiah a rak si. Cupinah savun angki fual ihrukaih khawh ding i ser ding cun Tu nunnak nih a in i, a thisen  a chuah arak herh tthan hawi. Hi nih hin kan nih sualfa hna, taklawng le nun ngeilo mi hna caah nunnak pe dingin Jesuh Khrih nih amah nunnak pekin athisen i a kan tlanh ning le, thlarau lei ah a kan tuamhlawm ning hi arak kan hmuhsak diam mi arak si. Cucaah Bawi Jesuh Khrih cu kan ni thuamnak ding a si.(Rom 13:14).

          Biakam Hlun i Messia arat lainak kong  chimchungnak Bible caang alar ngaimi pakhat ahcun, Khrih cu phaisa 30 ah zuar a silainak kong chimchung a si. Jesuh chuah hlan kum 500 hrawngah khan profet Zekhariah nihcun hibiahi arak chim chung i" A rem nan ti ahcun.... ka ti. Cun ka rianttuam man kha an thlai i ngun phar 30 a si," (Zak. 11:12) tiah arak ti. Hika i 'ka rian ttuanman' timi Hebru hawlhin se'kari timi biafang i 'yod' timi cafang in vawn rel ah cafang 23 lonh diahmahin Yacov Rambsel nihcun Jesuh(Yeshua) min arak um kha ahmuh. Hibantuk i Messia konglam chimchungnak Dal le cang i, abia kalning buai hleng ttung lo i, abiaphen i Jesuh min arak i thuat khoh tuk ning nih hin minung fimnak nih aruah phak lo leng in, hibantuk chimchungbia aliannganmi ttial dingin, a ttialtu profet hna ruahnak le lungthin lawng kha atthithruai hna si loin, an cafang hmanding vialte hna le ai thuat ning ding tiangin thiangthlarau nih hin a theihter hna bia a si hrimhrim ko lai, tiah kan ruah ko lo ahcun; hibantukthil (phenomenon) hi minung vialte lakah afimbik mihna hmanh nih an ttialmi ah a um kho mi le a si fawn ttung loh. Cucaahcun, zeizawng vialte thlenglakin a hmu kho dih tu Pathian nih mithiam hna nih anruah-ankhawl-anhmuh khawh dingin, secret code hmangin Jesuh min hi arak chiah dih hi a si ko hih.

Peh tthan te ding mi

Savun angki fual!

Scientist-hna an lung a mit!

Lian Hlun ( Meme Pa)

Bible Code! 10nk ISAIAH 53!

Even, Lian Hlun

Dear all, 

            A huammi relawkah Bible code! Voi 10 nak bia kha voi hnihnak caah ka vawn peh tthan.

ISAIAH 53!

            

           Yacov- nih ahmuhmi hna lahah icinken awkah atlak ngai mi cu, Messia kong chimnak caang - Isaiah 52:13 in Isaiah 53:12 karlak tawite, caang 15 chung teah hin Jesuh kong he pehtlaiin minung min le thil min abiapi tak tak mi 42 bak a hmuh hna. Cu min hna cu mah hna hi an si. Y'shua, Nazarit mi, Messia, Shiloh, Galili, Zultu hna, Peter, Simon, Johan, Matthai, Andru, Filip, Thomas, Simon, Johan, Matthia, Thaddai, Josep, Mary timi hi (hmun 3-ah a um; vailam pawngah khan Mary pathum an um). A cross Moria vailamah khenhchih ko Tlanhnak Tufano Lanhtak Puai Changreu Mitsurzu Cite Ti Obeda Jesi Herod Sizar Pilat Anna Kaiapha Levia Zion in Bawipa Meiin Amin ttialnak Rom Bawi Misualpa.

            Hi min hna hi, ELS Phungzulhte si ttungin ithuatning a phun phun in, a karlak ai hlatning i lobak ttungin, idang dih fawn ttungin arak iphum dih hna i, acheukhat cu vorhlei kapin kehleiah, cheukhat kehleiin vorhlei ah an ni tlar. Hi min 42 hna lakah 33-hna hi cu i naih te te, cafang 6 in 50 kardan i arak iphummi hna an si. Pakua hna tu cu an ni hlat deuh, cafang 51 in 295 i kardan i a um mi hna an si. Isaiah 53-lawngah si loin, Exodus 29-30 chung zawngah hin Jesuh zultu Peter, Matthai, Johan, Andru, Filip, Thomas, Jeim, Simon, Nathaniel, Judas, Thaddai, Matthia, hna pinah hin Mary pathum min hna, Lanhtak Puai, Messia timi hna a um i, 'Vailamah khenhchih ko(Ex.30:20) timi hna hi code- leiah hin a rak i thuat dih hna.

             

             A caan ahcun Jesuh min hi cafang tlawmte kardan hna ah hin a rak um i, Hmuhsaknakah, Ruth 1:1-ah cun cafang panga dan te lawngah a um i; hmun cheukhat ah  cun cafang ihlat pi pi ah an um. Moses cauk panga-ah hin hmun 12- hrawngah Jesuh min hi cafang 7000 dan ah arak iphummi an hmuh hna. Cafang kardan ailomi lawngah si loin, biafang kardan ai lomi zawngah hin Jesuh min cafang ai phummi hi hmuh a si. 

            Exodus 12:27 hi Lanhtak Puai konglam chimnak a si. Hikaah hin Tufano timi le, cafang 5 danah messia timi zawng hmuh a si. Jesuh min tu cu cafang 777 danah arak um. Genesis 22:8-ah hin Pathian biathuk ngaimi kan hmuhmi cu:"Pathian nih a khan te ko lai, ka fa pa" timi hi a si. Hi chungah hin Jesuh min hi cafang 19 kardanah kehlei in vorhlei ah siseh, vorhlei in kehlei ah siseh, khattilei khattilei ah an um veve. Culawng cu si rih loin, cafang 51 kardanah kehlei le vorhlei a khatleikap veve ah Jesuh timi hi a rak i ttial (encoded) rih. Cucaahcun, hika i raithawinak caah hmandingmi hi kan Bawipa Jesuh Khrih hrimhrim arak si ko timi hi, a bia phenah secret-code in arak i phum diam ko cang! Cun, Hika caang tthiam ah hin biafang (word) panga dan i cafang hmaisabik paoh khan vawn lak ahcun YHWH (Yahweh) timi hi a rak chuak tthan.

Peh tthan ding mi,

Savun angki fual!

Scientist-hna an lung amit!

            

Hi pinah khuaruahhar khun i alangmi cu, Biakamhlun chungah Messia ara dingmi kong chimchungnak Dal le caang kipah khan; abia tluangtlam (plain text) phenah hin Jesuh min hmuh dingmi a rak um dihmi hi a si. Hmuhsaknakah, Yacov-nihcun Isaiah 53:10 in Yeshua min cu a hmuh. Hi a hmuhnak caangah hin kan Bawipa cu sal, milungrethei, kan sual vialte thianter dingin athiangmi raitawinak caah amah pumsa thengte kha a pek lainak kong a chim chungnak a si i;"Bawipa nih aa thawh i, temnak a in cu ka rak duhmi a si ko; thihnak cu ngaihthiamnak a umtertu raithawinak a si. Cucaah a tefa kha a hmuh hna lai i chan saupi a nung lai, cun amah thawngin khua ka khanmi cu a tlam a tling lai". Timi caang chung i, 'Chan saupi a nung lai' A tinak zawn, (Hebru in.Ya'arik) a tinak zawn te i Hebru cafang'yod' timi in vawn rel in, cafang 20 nak paoh kha vawn lak diahmah ahcun 'Yeshua Shmi' timi a biapi tukmi bia a hawng chuak. A sullam cu'Jesuh hi ka min a si' tinak a si. Cucaahcun, hi Messia, lungretheih nakin a khat mi le kan sualnak vialte a phur dih tu hi, kan Bawipa Jesuh Khrih hrimhrim amah thengte kha arak si ko; timi hi abia tluang phenah hin a rak i phum diam ko.

 Sawiseltu cheukhat nihcun afil khawh chungin an rak chim ve.'Jesuh timi min tham cu cafang pali ( Yod, Shin, Waw, Ayin) fonhtonh a si ko le, cauk chahtakmi le cafang hna zawng duhtawk i thim dingmi a umnak ahcun cubantuk cafang pali lawng a si mi kawl te hna cu a har lem hnga hme maw' an ti. Judah mi hna tu nih cun, Yacov-nih a hmuhmi kong ah hin hitihin an el ve i;" Yeshua min hi Isaiah 53-ah rak i phum hmanh khi heisisehlaw 'Jesuh' tinak a si theng lai lo. 'Yeshua' timi tham cu mintlanglawn(common name) pei a si ko cu." an rak ti ve. Hikazawn i Messia arat lainak bia chimchungnak zawn thengte i" Jesuh hi ka min a si" timi code i a rak um khawhnak asullam aruang hi, asisualmi a si khawh lo ning cu, ' chance 50,000,000,000,000,000 lakah chance khat ai ham khawh ve ceo khi a si' tiin mathematician hna nih cun anti- anruah(1/50,000,000,000,000,000).

Mithiam dang hna nih an kawl-hawl lonak leiah, Rambsel-nih hin, Biakamhlun chung i Messia kong chimchungnak Dal-tampi le Caang-tampi chungin Jesuh min hi, a hmuh tawn ruangah hin; sawiseltu hna zawng hi an tam lo ko lo men ko lai. A ruang cu, a rianttuanmi a biapit ning le a lianhngan ning hi Satan hnahchuahtlak a tling mi thil a si i: dohtu a serpiak hrimhrim lai timi cu a fiang mi thil a si ko. Hi a hmuh khawhnak hna zawng hi Bible ttialtu Thiangthlarau tthit-hruainak (inspiration) ruang i a hmuh khawh mi a si lai timi hi zumh awk tlak a si ko.

Peh rih dingmi

1. Isaiah 52;13 in Isaiah 53:12 karlak tawite, caang 15 chung te lawngah hin, Jesuh min he pehtlai in minung min le thil min a biapi mi 42 an umnak kong a si lai. Zultu hna min zong tling tein an rak um.

2. Scientist-hna an lung a mit ai!

Bawi Khrih rianah santlailo bikcem mi

Lian Hlun ( Meme Pa)

Bible code! voi 9 nak. Judah Mifim 34 hna kong.

Even, Lian Hlun

Bible code! voi 9 nak. Judah Mifim 34 hna kong.

Dear all,

            A huam mi rel awk ah Bible code! ka vawn thlah tthan. A reltu hna caah Bible hi minung bia si loin Pathian bia hrimhrim a si i, kan nun chung vialte kan nunnak caah nawl ngei tubik a si hrimhrim awk a si i; pumpak kan caah siseh, chungkhar kip kan caah siseh, Khrih fabu dihlak caah siseh, nawl ngei tubik a si hrimhrim awk a si timi kan fian khawhnak hnga duhfahnak nganpi le thlacam pinak he ka vawn peh tthan. A rel tu hna Pathian nih a lam kipin hngalhfiannak in pe ko hna seh. Amen.

            1994 ah khan Judah mithiam rual hna nihcun aikopmi biafang ai phummi a rak um cang mi hna an ni pehtlaih ning kongkau ah hmuh chapmi an ngeihnak bia an chuah tthan hawi i; cu hna cu, Moses nih Torah a ttial hnu pi ah Vawlei caan aihel-aimer lengmangmi chung i thil a um mi hna an si. An zoh fiannak ah cun kum AD 1900 hla kum thawngkhat(1000)chung i Rabbi a min a thangmi hna le Judah mifim 34 an thim hna. An thim ning hna zawng hi sullam zawng nei tuk hlei lem lo in, Judah mi hna lakah mi lianngan a rak simi hna an min ttialnak cauk Encyclopedia of Great Men in Israel chung i a um mi hna lak ah a konglam a sau deuhmi hna kha an hei thim sawhsawh ko hna. Cubantukin, mi minthang-milar 34 min tawngtawthim i an thim dih hnu ah cun, Torah cauk cungah hi (milar) min hna le an chuah kum maw an thih kum maw a um theng hnga maw tiin an computer cu an vawn kawl ter. (Hebru ni le thla rel ningin Judah mi hna nih hin an mifim hna philhlonak ah an thihni ah hin upatnak an pek tawn hna i), khuaruahhar ngaiin-mak ngaiin cu rabbi 34 an thim mi hna an min cu Genesis cauk-chungah hin a rak i phum dih ko cuteh aw!!

             

           Cu lawng hmanh cu si rih loin. An min umnak pawng te ah, an chuahni maw an thihni maw a rak um chih dih hna i, khuaruahhar a si ko-amak ko timi pin lei ah a si. Hibantuk-mahbantuk thil hi zeizawng hngaltu tuahmi-timi si loin, vantthat bia ah maw, tisual bia ah maw, coincidences ruang i a rak um kho mi a si lo ning cu, a si khawh venak chance khat hei um seh, a si khawh lonak lei cu chance maktaduai 775 a um. (1/775000000).

           Statistical Science journal chuah tu hna mithiam rual, hithil a rak zoh-fiang tu hna nih cun khuaruahhar bak a si ko e an ti. Mak an ti kho tuk! A dik lonak hmuh ding an thei ttung loh. Cuticun, lam dang an kawl i; Judan mifim min thang hna konglam ttialnak cauk Encyclopedia chungin an min an lah lo mi hna, Judah mifim minthang deuh deuh 32 min an vawn char tthan hna. A hmasa i an ti ning bantuk khan computer cu an kawl ter tthan i, a rak zoh-fiangtu hna lakah a rak lunghrinh tu hna khuaruahhar-mak ti awk thlakin cu mifim min an telh chap mi hna min zawng cu Bible code ah tling tein an rak lang dih tthup tthan ko cu teh! Cubantuk, hlathlainak khermei-kherkhiap ngai hmang i an zoh-fiannak nih cun Genesis cauk nih hin cu Judah mifim minthang bikbik 66 hna min le an chuahni maw, an thihni maw cio he a rak langhter peng ko hna hiteh timi kha fiang te in an hmuh khawhnak ah a hawng cang. Cumifim le rabbi hna cu AD 900 le AD 1900 karlak minung an si dih hna. Genesis ttialtu Moses tu cu hi hna an um hlan kum thonghnih hrawng(B.C 1400) hrawng minung kha a si fawn ttung.

          Bible Review lei tu ah seh mu. Bible code an hmuh mi khuaruahhar, Pathian kutchuak bak a si timi fianternak elawk ttha lo mi hi, Khrihfa magazine le theological journal lei hna ah khin hei chuah ve hna seh law, a reltu theologian hna nih an rak cohlang in an rak i lawm theng hnga maw? asiloah, zumlotu hna nakhmanhin an rak doh deuh hnga dah? timi hna hi bia halnak ah a um kho ngaimi a si. Theologian mi cheukhat hna nih an rak pawmpi lo ning le an el hnanak cheukhat cu ka vawn pehtthan te lai mu. Bible review hi theological journal aminthang mi le upattlak a si mi, Pathian bia lei in mithiam hna nih bia tthattha an vawn ttialnak a si i, 1995 October issue-ah khan Dr Jeffrey Satinover-nih article a ttial mi ah, hi Judah mifim 66 hna min le chuakni le thihni cio he khuahlan cauk hlun, Genesis hna bantuk i asisualmi ruang i a rak i phum dih khawhnak chance a niam khawhning hi maktaduaihnih ah pakhat lawng a si! tiah report a tuah ve.

Bawi Khrih rianah santlaihnak a ngei lo cembik mi

Lian Hlun ( Meme Pa)

Bible Code 8nk Gulf i tuknak

Even, LIan Hlun

  

Dear all,

           Thlacam hna u sih. Van cung khua i a um mi kan pa, a zungzal in na min thiang thangtthat in um ko seh. A thuktuk mi na fimnak le na hngalh chung khawhnak hna hi an tamtuk ah hin rel cawk le hngalh cawk an si lo. Na thiang Thlarau in hngalh fiannak hmuh khawhnak kan pe law, namui duhnung fiang chin chin in a kan hmuh ter tuah cang ko seh. Lianngannak le sunparnak cu nang mah ta an si. Jesuh khrih min in. Amen.

Gulf i tuknak kong!

           Bible code ruahkhah-kawlhawl tu hna nih an hmuh tharmi hna lakah mithiam hna khuaruah ahar ter ngai ve mi pakhat cu, cozah tampi hna nih lungrual tein Saddam Hussein-an tuknak kong (kum 1991 lio i a rak um mi) kha a si. Ai dan ngai venak cu, kha i tuknak khuaruahhar ngai mi konglam kha kum 3400 hrawng a kal cangmi, Moses cauk chungah a rak cuang keukuau ko mi hi a si. Genesis 8:12 chungah hin cafang pa ruk dan ah'Saddam'min hi an hmuh hawi cu teh! Genesis 19:1,2 chungah hin'Scud-B' timi le'Russian' timi hi an rak um tti hawi. ( Hi hi Russia Bomb cekei'Scud-B' hmang i Irag-nih Israel kahnak-tuknak ah a hman mi kha a si). Dal 19-ah hin'Lam an phih' 'Inn an khar' timi bia an hmuh mi hi Israel mipi hna nih pakpalawng sivai (chemical weapon) a ra dingmi in an rak i vennak caah an umnak khandang an rak i khar kanh tawnmi kha sawh dawh a si. Genesis 19:29-ah hin'bomb cekei nih a thla alauter tuk lai' timi bia a rah um hawi-fawn i;"Shevat thumna" timi a um tthan. (Cu cu Hebru calendar-ah cun missile hmang i Israel an kah thok ni bak (18.1.1991) kha a rak si.

           An thil hmuh mi hna lakah khuaruahhar khunin a raklang mi cu"America" timi min a rak langh ve mi hi a si. Genesis Dal 29:2 i vawn i thok in cafang 100 dan i a um mi cafang hna cu vawn pum in'America' timi hi a rak chuak ko.Hi Dal chung tthiam ah hin"Irag Ramah" ti hna,"Saudi Arabia ah" timi hna cu cafang ai hlat ning i lobak te te ah hmuh a si tthan. Cu hna lak i zumh awk ah a har ngai ve mi cu Gulf War lio i ralkap hotu lubik"Schwarzkopf" min a rak lang mi hna,"George Bush" ( kha i tuk lio i America President) a rak si kha mu! hipa min a rak i tel ve mi hna hi a si. Numbers cauk chungah hin a tu lio i TV i kan theih tharmi"CNN"timi hi langhter a si tthan i,"Peter Arnet" min zawng ai tel. (A nih kha Gulf i tuk lio caan i a ttihnun saling lio zawng ah Bagdad kuapi chungin CNN news vawn report-tu bik kha a si). Hi hna hi Numbers 36:5 chung i a rak i phum mi an si. 

           Bible i bia aiphummi hna hi kum thawngthum hnu ah chuah mi sihmanhseh a bia hna hi atuchan-tiluan he ai rem ngai ngai i, a caan te bak ah phuanmi si dawh a si. Hmuhsaknakah, America vansang a kai mi hna nih Thlapa cung i an va ttumnak kong (bia) kha Bible ah hin a rak i phum(encode)ve. A rak i ttial ning cu;"Pakpalawng long"timi le"Apollo"timi hna he an rak lang tti hna. Neil Armstrong' nih Thlapa cung lei-lung a vawn lamh ni bak, July 20,1969 zawng kha Bible tthiam ah a rak um. A rak i phumnak hmun zawng Pathian nih Abraham sinah,"Van khi zoh law na rel khawh ahcun arfi khi rel tuah hna,"(Genesis15:5) a tinak caang theng te ah hin a si.

Peh rih ding mi a si.

Peh tthan ding mi hna cu;

Judah mifim 34 hna!

Amin ahcun (khuaruahhar) Bawi Jesuh!

Krihah santlaihnak a nei lo cembik mi,

Lian Hlun (Meme Pa)

Bible code! Voi 8 nak; Pehmi. Gulf i tuknak & Thlapa cung kainak kong

Bible code! Voi 8 nak bia ka vawn peh tthan mi a si.

          Hibantuk i a thukmi le sullam a ngei mi biacah a si ttung mi, a hohmanh nih hngal theng lo i kum thawngthum zanga hrawng Torah chung i a rak i phum viahmah hnu i, a tu lio chan thar hna hmuh khawh ding i vawnhmuh a si mi hi a lianngan tuk hringhren i, Pathian nih hin kan mah ah'tichan''tuahchan'a ngei a si kho men ko. Cu thil vawn kawl-hawl cu kan rian si dawh ngai zawng a si. Tuchan ahcun hi vawlei fimnak le ruahnak nih hin a kan hruai a kan tei ngai i, hi nih hin Pathian bia lei kap paohpaoh zei i rel lonak le nehsawhnak lungthin a kan pek. Vawlei fimthiamnak a cawngtu hna lawngah a ttuan lo i, Bible ca a cawng mi hna le theologian hna hmanh an si khun ko rua ti awkin, Thiangthlarau rian ttuannak zeirel lonak-hrawhhral duhnak(anti-supernaturalism) nih hin a rak uk-ttuan khawhtuk lehpeh-palia ko hi teh ti awk thlak a si.

           A bikin Bible nawlngeihnak (Bible's authority) le Pathian thawchuah hnawhmi (inspiration) a sinak hi, a tu lio Khrihfabu hruaitu hna lakah a tlak lio te a si kheko i, hi caan hmadung ah hin, Pathian zawng nih amah thengte nih a rak chimmi bia hna a dik ning aham chin lengmang ve ti khawh a si ko. minung vial nih fim chin lengmang i i ruat in, a zatawk,pawmtawk, mi ruahning i ai dawh tawk te i kan thei mi lei ah ral ttha ngai ngai in Pathian bia hna hi kan rak sawksam i, a cheuchum te te in kan tan kan rakhman hawi fawn he; caan dong lainak a nai tuk cang caah, Pathian zangfahnak le velngeihnak nih le a tam chin chin. Cucaahcun, atulio vawlei a sang tukmi le computer age i kan um lio i mi cheukhat hna nih Thlarau thil an hlawtnak hriamnam thengte cu hmangin, Pathian Bible hi amah kutchuak bak a si ning zum ti lo tu; a tu lio Khrihfa mipi hna theih khawh le hmuh khawh dingin Bible code hmangin biathli-aithup mi hna hi Pathian nih a kan phuan piak cang khi a si ko hih!

           Pathian bia nakin Vawlei mithiam hna le scientist-hna bia chimmi a zum tak tak tu kan si ahcun, hika i thiamnak adongh mi pa nih a chim mi hi cuan hna hnik u sih mu. David Kashdan, Harvard University (USA) i mathematics department i chairman nihcun, ruah-khahnak tel hleng ttung loin hi Torah code tawngtawhlawt i a hlawt mi hna sinah:'mah hi hi thil tak tak cu a si. Hi thil na pawm-nazumh le zumh lo tu cu nangmah nawl a si,'(The phenomenon is real. What conclusion you reach from this is up to the individual)a ti bak ko. Ai biatak ngai ko hi mu! Cucaahcun hibantuk tiang i fiang tlar i scientist-hna nih an hmuh cangmi hmanh pawm-zumhawktlak i ruah hlei lo, a lung a tthawn ter i a hngawng a tthawm ter mi hna kan um rih a si ko ahcun, David Kashdan nih a chim bang' mah nawl' a si ko cang.

Peh tthan te dingmi hna,

Judah mifim 34 hna!

Amin ahcun(khuaruahhar)!

Khrih arian thiangah santlaihnak a ngei lo cembikmi,

Lian Hlun(Meme Pa)

Bible Code 7nk Torat chungin French Revolution kha!

EVen, LIan Hlun

Bible code! Voi 7 nak. French Revolution & Hanukkah & Hasmonean!

Dear all,

            A rel huam mi hna caah thazaang petu hna thawngin Bible code kong ka vawn thlah tthan. A tlamtlinlonak cu a ttialtu mawh si ko seh law, a rel duhtu hna caah Pathian sunparnak le lenngannak an hmuhnak ah cang ko seh ti hi ka thlacamnak a si. Amen.

Torat chungin French Revolution kha!

           

            Genesis nih French Revolution a rak chimchung mi hi Bible code biacah an hmuh cangmi hna lakah i cinken awk tlak bik pawl a si. Hebru nih French Revolution an chimnak bia "Mapecha HaSarfatit" timi bia hi a rak i phum ve peng ko. Cuka ah cun French Bawipa'Louis' min le,'Beit Bourbon'(Bourbon chungkhar chung mi)timi hna hi a um chih. Cuka hrawng tthiam ahcun'Hamarseilles' (French miphun hna an hlapi min) hna le'Bastillia' (French thawngin a min a thang ngai mi, political prisoner hna an chiah hna nak hmun, revolutionaries hna nih an lak mi) min thengte zawng a rak um chih tthan hawi. French Revolution kong chimnak code a rak i phumnak hi Genesis 39-41 karlak bia-Izipt ram thongin i Josef a tlaknak kong ttialnak ah khan a si. I cinken awktlak a sinak zawng Genesis 39:20 i"...Siangpahrang thongtla pawl an chiah hnanak hmun ah khan an chiah i cuka ah cun a um,"tiah a tinak zawn te ah hin, Hebru hawl i 'Bastillia' tiah thongin min hi secret code in a rak i phum ve cu teh!

Hanukka le Hasmonean Code!

              

             Torah cauk chung i scientist-hna nih biathli-thup ai phum mi an hmuhmi hna lak ah hin, a ttialtu Moses thihnak in kum thong tampi a liam hnu i thil a hawng cangmi le mi mithang tak tak hna i an min zawng ai tel tung hna i, a zum lo tu hna caah vawn zumh awk ah a har tak tak mi hna zawng hi a tam pi ko. Cu hna lakah aitel vemi pakhat cu Hanukkah le Hasmonean min a rak lang ve mi hi a si. 'Hanukkah' timi a sullam cu'lomhnak puai phunkhat chimnak a si'. Syria Siangpahrang a sual takmi Antiochus IV Epiphanes-kut chungin Judah mi hna nih an Temple an chuh khawh tthan ruang i an lomhnak puai cu a si. B.C. 168 ah khan hi Syria Bawi nih nih Judah ram cu lamhchih in,  a thianghlim mi an temple chungah cun Judah mi hna nih an fihcem-bikmi vok hmangin raithawinak a tuah i, milem-mizuk a tuah mi cu pathian bang bia dingin temple chungah cun a hun.

             Milem-mizuk a bia duh lo mi Judah mipi thong tampi a thah hna; cu cu hmu in Judah miphun hna lakah pasal ttha hna nih cun an ing kho ti lo i, putar pi a si cangmi Mattathia nih cun a fapa le panga hna le Judah Makabia hna he an tuk hna. An ral a tthattuk ruang le Judah pasal ttha dang hna nih an bawmhchan ve hna ruangah Syria ralkap bu an mah nak i a let in a lian deuhmi hna cu khuaruahhar ngai le lianngan ngaiin an tei hna i, BC 165 ah khan Temple cu thiang tein an thenh tthan i; a thiangmi raithawinak kha an pek chanh tthan(1Maccabees 4:52-54). Cuticun Hanukkah cu an Temple Pathian sin an pek chanh tthannak puai a si i, khuaruahhar ngaiin cu thil a rak phak hlan kum thongkhat hrawng a liam cia mi ah khan, Moses cauk ttialmi ah Hanukkah timi cu a rak lang diam cang. (Genesis36:24-37 chungah hin cafang 261 kar-dan ah a rak i phum i). Hanukkah pawng te ah hin Hasmonean min hi a rak lang ve i; an nih zawng hi Makabia chungkhar chung mi nung, miral ttha hna i an min tthiam a si.

Peh tthan dingmi hna

Gulf i tuknak kong!

Judah mifim 34 hna!

A min ah cun (khuaruahhar) Bawi Jesuh!

Krihah santlaihnak a nei lo cembik mi

Lian Hlun (Meme Pa)

Hlasak Thiam Miss, Lal Tlan Mawi Online Biaruahnak

"Ka chuahka in Dawn i a um bal mi ka si lo caah, thil tam cu ka thei lo si na in mah hi ka ruahnak cu an si. Fimthiamnak hi biataktein kan kawl a hau, fimthiamnak nihcun, rumnak, ngandamnak, lunglawmhnak le thildang tampi a chuahpi khawh"

Nungak Lal Tlan Mawi, Nangmah cu Pathian dawtnak thawng Australia Chin Idol hlasak zuamnak ah pahnihnak na kan laakpiak caah, na cungah lunglomhnak tampi kan ngei. Pathian tu nih thlua in chuah sehlaw, hmailei caan zongah tha chinchin in lam in hruai ko seh tihi kan thlacamnak a si.

Hi bantukin pahnihnak na kan laakpiak tikah,khualei tarnu, tarpa zong nih na konglam hi rak rel ve hna sehlaw tihi kan saduhthah a si caah, biahalnak kan rak tuahmi hi lunglawm thatho tein na rak kan Cohlan piak tik ah na caan tampi lak ah caan na kan pek caah kan i lawm.

Min                      Lal Tlan Mawi

Miss, Lal Tlan Mawi

Chuah Ni Thla -  18/03/1999

Facebook -           L.t Mawi

Pa Min -               Pu Ro Mawi

Nu Min -              Pi Tial Thai

Unau                    Fanu fangkhat ka si

Phun min -           Hnamler

Uar mi muici (Colours ) phun - Silver le Purple an si

BIAHALNAK (Interview)

A. Kuttlaihnak (Greeting)

CCLD : Pathian dawtnak thawngin na innchungkhar he nan dam lio a si maw?

Mawite :  Bawipa dawtnak thawngin, kan dih lak te in kan dam lio a si ko.

CCLD : Online ah na min kan theih ning ahcun, Lal Tlan Mawi (Mawi Te) ti a si. A (dik) hmaanmi a si maw?

Mawite ; Aw a hman ko.

CCLD : A si ahcun, na min hi mizo min cu va si kaw, laimin tah, na ngei el maw?

Mawite :  Lal Tlan Mawi ti lawng hi ka min ngeih mi a si ko. Ka pa nih ka min hi a phuahmi a si.

CCLD : Na nu le pa nih zeitindah an in auh? Zaangfahnak tein n a kan chim kho hnga maw?

Mawite : Kanu le kapa nih Boihte ti in an ka au.

CCLD ;  Atu hi sianginn hna na kai rih maw? Zaangfahnak tein na kan chim kho hnga?

Mawite : Atu hi High School ah tang hra ka kai lio a si.

CCLD  ; Na kum tah, zeizat dah a si, na kan chim kho hnga maw, zaangfahnak tein ?

Mawite : Ka kum cu Kum hleiruk ka si

Hlasak I Zuamnak Kong

CCLD : Minung hi kan chuahka tein Talent kan ngeihmi aa dang cio. Cheukhat hlasak thiam pawl cu ngakchiat lio tein theih khawh an si. Sihmanhsehlaw, cheukhat pawl mah i zuamnak bakin hlasak thiam zong an um ve. Nang tah, Mawi Te? Hlasak hi Pathian nih Talent an pekmi maw si,siloah hlasak hi na huammi (Hobby)hrimhrim maw si, zeitindah?

Mawite : Mah bia hi keimah te in kai ruah lengmang mi a si ve. Ka hngakchiat te in hla sak cu ka huam mi te a si ko na in ka chuah pi mi talent cu a si thlu in ka zum lo. Natein minung i zuamnak nih hin thil tampi a tuah khawh ve, ti ka theih caah ka si khawh tawkin kai zuam ve.

CCLD : Autralia Chin Idol hlasak zuamnak i, naa telnak ding ahhin zeitindah naa rak timhtuah ning, na kan chim kho hnga maw?

Mawite :  Australia Chin Idol zumnak hi, ruah lo pi in kaa te mi a si ruang ah timhtuahnak ka ngei manh lo. Cu lawng siloin camipuai kan tuahlai zarhkhat bakah final round kha tuah a si i, duhning zongin i timhlamhnak caan ka nei lo.

CCLD : Mah Chin Idol hlasak zuamnak i naa tel hlan ahhin, Biakinn ah siseh, hmun dangdang ah siseh, voizeizat hrawnghraang dah mipi hmai ah hla na rak sak bal cang? Na kan chim kho hnga maw?

Mawite : Hla sak thiam pi cu ka si lo, na in Pathian thawng in i pumhnak tete hna ah hlasaknak caan cu tampi ka ting ve tawn.

CCLD : Cun, atu kum 2015 Australia Chin Idol hlasak zuamnak i naa telnak hi a voikhatnak maw si/voihnihnak...,na kan chim kho hnga maw?

Mawite : Sport tilo ah cun mah hi zuamnak hmasabik ah kai tel mi a si.

CCLD : Mah Chin Idol i hlasak zuamnak i tel ding i naa bia naa khiah hrawnghraang ahhin, ttihphaannak zeital na ngei maw, na kan chim kho hnga maw?

Mawite : Ka chungkhar le nih cun tel cu an ka duh pi lo, ka ca cawnnak lei thazaang dernak ah ka hman sual lai, ti an phan caah, sinain an ka thlauh thlu lo. 

CCLD : Khrihfa na si bantukin, mahhi hlasak zuamnak i naa timhtuahnak ahhin Pathian sinah voizeizat hrawnghraang dah thla na rak cam? Na kan chim kho hnga maw?

Mawite : A voi zeizah cu rel cawk a si ti lo I, sihmanhsehlaw tel hmanh kai tel khawh mi hi amah dawtnak thawng in a si.

CCLD : Cun, i zuamnak caan taktak a phanh lai zan kha, zeitindah i hmuthaw tein naa hngalh kho maw? Cun, zanmang hna ngei maw?

Mawite : Ka ih hmu a thawttuk nak ah ka mang zong ka nenh cih dih.

CCLD : Australia Chin Idol hlasak zuamnak cu va si kaw, mitthla ah kan cuanter tik ahhin, mipi zong an tam lai ti cu aa fiang.Cuhleiah pakhatnak i cuh ding na va si kaw, Mawi Te !!! Kei, ka can ka van siter ah khin, ka lung zong a tur dih... Nangtah, kha pakhatnak si ding i, sa ding i naa van timh i, na van dir ah khan aw, na lung a tur ve maw? Zeitital khin na um maw?

Mawite : Ka ruahnak leng in Bawipa nih a ka cawi san I. Pahnihnak si hi cu a ruah hmanh ka ruah bal lo mi a si tik ah ka lau ngaingai.

CCLD : Zeiruang ah dah Chin Idol ah hin sak dingah Mizo Hla le Mirang hla theng na thim? Zeiraungah dah Chin Hla na sak lonak a si. Na kan chim kho hnga maw?

Mawite : Chin Idol ah si ruang ah Chin hla lawng sa kho sih law a tlam a tling hnga lo. Zeicatiah hla cu kan sak tikah ah, bia fang kheh hi a herhtuk mi a si i, cu tik ah holh phun dangdang in hla ka saktik ah, a bia in siseh, a aw in siseh miphun dang hna tiangin an theih khawh hi a biapi mi a si caah hla phunthum ka sahnak a si.

CCLD : Kha, pahnihnak na van lak ti kan theih le cangka khan, kan dih lakin kan kut kan rak beng dih i, nangtah, Judge nih, “Kha, tukum 2015 Chin Idol hlasak zuamnak ah pahnihnak a kan Laakpiaktu cu Nungak Lal Tlan Mawi!” a van ti bak khan, zeitin dah na rak um? (How did you feel it?).

Mawite : Pahnihnak ngahtlak lo te ka si ruang ah ka lau ngaingai.

CCLD : Kha, pakhatnak nan i zuam lio i, hla na sak lio ah khan aw, na ‘Aw’ kha na tuahsual ruang ah maw si, zeitin a dang buaibainak (problem) pakhat khat nei ruang ah maw si? Pakhatnak na van ngah lonak a ruang kha, na kan chim kho hnga maw?

Mawite : Mah Idol kai tel mi hi ka caah (experience) hlasak lei ah ka than kawhnak lai kai zuam mi a si caah, ka hla pawl a hartuk mi kaithim i, a thiamtuk mi ka si lo tik ah ka duhning in ka thiam manh lo.

Biaza Tlaang Halnak (General Interview)

CCLD : Mawi Te, Minung nihhin tuah peng dingah aurmi (hobby) hi kan ngei cio i, nang tah na hobby hi zei dah a si? Na kan chim kho hnga maw?

Mawite : kan siangin kai pah hin basket ball le kick boxing hna kai tuah tawn.

CCLD :  Facebook ah na hlasak lio hmanthlak kha tlangval pawl nih kan rak zoh i, duh le na nung, dawh zong naa dawh, vaanmi tluk bakin hlasak le na thiam fawn. Malaysia lei tlangval pawh thih viar kan i tim cang i, zualko caa a van phan colh, “Vacancy a si maw?” an ti hih !!!

Mawite : Aw si maw kai lawm, natein kei cu nghakchia ka si rih.

CCLD : Nungak le tlangval kan si bantukin, pa zong nih Nupi caah cu bantuk cu si seh tbk. Kan ngei cio hna.Mawi Te Nang tah,na vapa dingah zeibantuk pa dah na duhmi/uar phun an si? Na kan chim kho hnga maw?

Mawite : Hngakchia ka si rih caah cubantuk leikap ruah zong ka ruat bal lem lo. A caan a zat tikah Bawipa nih khua a ka khan piakte lai ti ka zumh ko.

CCLD :  Meh phun ahhin zeibantuk meh dah na duh bik? Na kan chim kho hnga maw?

Mawite : Kei cu India I a thang mi ka si caah pe le alu ka uar cem.

CCLD : Australia ahhin kum zeizat dah na um cang? Zeitk ah dah na rak phanh?

Cun, Australia um nomhnak hi phunnga hrawngin na kan chim kho hnga maw?

Mawite :  Australia ah hin kum li ka um cang. Australia cu ram nuamtuk a si zei caah ti cun a hmunhma le a thli a thiang, Australia ummi keimah rual pawl caah cun zei poah kan saduhthah i zuamnak lei phun a tling kho, zalawngte i kan tlawnlen khawmi te hna, pakhat le pakhat i nihsawhnak a umlomi te hna, ei le din duhmi phun a tlingmi te hna, a khuapi a thian tukmi te hna hi a nawmhnak cu a si ko.

CCLD : Dawn na siruangah hin Ningzahnak na ngei bal maw?

Mawite : Dawn si ruangah ningzahnak zeibantuk hmanh ka tong bal lo.

CCLD :  Hmaile caan ah hin khuaza ram i a ummi Dawn hrinsor hna hi, zeitiin dah kan lung a rual khawh hnga, zeitindah kan i ṭhithruai ah dah a ṭhat hnga? Ruahnak cheuh ding na kan ngei maw?

Mawite : lungrual dingah cun hmasabik ah pakhat le pakhat i theihthiam a herh.

CCLD :  Dawn khua caah na chuunmang zeidah a si ? Na kan chim kho hnga maw?

Mawite : Dawn khua caah cun biaknak lei in si seh, fimthiamnak lei in si seh, dawtnak le lungrualnak in ṭhang chin lengmang seh ti hi ka chun mang cu asi..

Last question 9. Mipi a rak kan cuantu hna sinah biacahta duhmi na ngei maw?

mawite : Thazaang a ka petu ka chungkhar, uu le nau, hawikom vialte nan cung ah lunglawmhnak tampi ka ngei. Hmai le caan ah dong lo te in thazaang nan ka pek cio nak lai kan sawm hna. Bawipa nih thlawchuahnak in pe dih ko hna seh.

CCLD  ; Kan i lawm tuk hrinhrang, Na caan ṭha na kan pek mi cungah

Mawite : Tuahsual a um si ahcun, Bawi Khrih min in ra kan ngaithiam tiin kan bia kan donghter.

Hlasak lio

Hika ah hin a hlasak mipol zoh khawh asi.

https://www.youtube.com/watch?v=57p45uNYiDk

https://www.youtube.com/watch?v=_DrOJuJaHxM

https://www.youtube.com/watch?v=VtddnMUd5FY

zapi he an saknak https://www.youtube.com/watch?v=_se9yZ-f5BM