Bible Code 2 BIBLE CODE HMUH HRAM THAWKNAK

Even, Lian Hlun

Dear Ka Lai hawi hna,

 

A rel huammi hna caah BIBLE CODE kawng ka vawn thlah tthan. Tinhmi pathum ka nei. 1. Laimi nih mithiam tampi kan nei hna i cauk tthattha kan ttialpiak hna seh asiloah kan leh pian hna seh law Lai hawlhin cattha tampi nei ve usih ti duhnak he. 2. Mail zawng ah hin ca tthattha kan thlah piak hna seh. 3. Bible hi lunghrinh awk a si lonak kha langhter duhnak he a si.

 

BIBLE CODE HMUH HRAM THAWKNAK

 

A liam ciami kum 60 ah khan Czechoslovakia khawpi Prague i a um mi Judah rabbi le scientist minthang tak, astronomy ah si seh, mathematics zawngah si seh, Judah kawng cawnnak lei zawngah si seh, mithiam sang bak miRabbi Michael Dov Weissmandl- nih cun reseach a tuahnak ah thil vawn hngalh thar mi pa khat a nei i, kum zabu 14 lio i Judah Rabbi pakhat,  Rabbeynu- nih a rak ttial mi, kum za tampi a hohmanh hngalh set lo i arak i phum diam cang mi cu a vawn hmuh tthan i; cu cauk ahcun Judah mi hna Nawlbia Cauk Torah chung i ttialmi biafang phen ah hin tlamtling tein cafang remhmi- thuatmi a rak um ve ko ai! ti kha a rak chim. Weissmandl nih mah thil a hmuh hi ralpi 1 nak hlan deuh kha a si i, cu a thil hmuh mi cu a lungah a tap ngai zawng a si kho men, biatak tein a vawn ruah i, Torah Cauk chungah hin thildang zawng hmuh ding tam pi a um kha a zumh.

 

      Cuticun Ralpi 1 nak chungah khan Hebru Bible-ah hin relning tluangtlam te in vawn rel i, a lang kho ttung lo mi, biafang sullam a ngei ngaingai mi an rak i tenh kha a hmuh hna. An hmuh khawh ning cu hibantuk deuh hin a si. Genesis ah hin Moses min hi a um lo na in, a biafang phen lei ah secret code hmangin a rak i phum a rak i thup hnga lo maw? Tiin vawn kawl u sihlaw. Genesis dalkhatnak i vawn i thok in, Hebru Cafang(letter)a ‘M’ a rak um hmaisabik mi in kan ni thawk hnga i, A changtuah ‘(O)’ hi cafang zeizat dan ah dah a rak um tthan? E! cafang 15-dan ah pei a rak um hi; cucah a changtu ‘S’cu hi ka i vawn rel i cafang 15 nak bak ah a rak um awk a si. E! a rak um taktak tthan!! Tiin cu ka hrawng Bible cang tawite chungah cun cafang 15 dan in vawn rel ah ”Mosis” min hi a rak chuak ko. Rak um hlah sehlaw cafang 10 dan ah maw, 20,30,45 etc. dan ta kha hibantuk hin kawl khawh peng a si.

 

 

 Equidistant letter Sequences (ELS)

                 Rabbi Weissmandl-nih cun hibantuk i  a kar dan a hlak ning ai lobak i cafang a rak i phum mi hi  ‘equidistant letter sequences’ (ELS) tiah a min a sak. Biatak te le taimak tein a vawn ruahkhah taktak hnu ahcun Torah Cauk chung lawng hmanh ah hin a karlak i hlat ning i lo bakin cafang vawn chiah in, biafang maw, minung min maw, ram min maw a rak chuak kho mi tampi a rak i phum tung ko ti kha a hmuh chap hna. Cheukhat cu Cafang 5 dan i a um mi hna a si i; cheukhat cu 40 dan i a um mi hna, cheukhat 50 dan, cubantuk vima cun a si.

 

               A hramthawk ahcun Rabbi Weissmandl-nih cun zeitluk in dah a biapit lai ti mi kha a hngalthiam hlei lo; a caan le bang ahcun ai varhning i lobak i vawn lak i, Hebru cafang phun dang dang zeimawzat vawn fawnh-tawnh ko ahcun, thil min le bia sullam nei te hna cu a rak chuak ve leng mang kho ko hnga lo hme maw? Ti hna zawng hin a ruah caan a um ve. Sihmanhsehlaw hibantuk in thil a rak um mi hi cunglei fimnak le khawkhan thiannak(supernatural intelligence and design) hmang i fonhtonh mi a si hrimhrim ko ti mi hi kum 40 hnu ah Israel  mithiam thengte hna nih cun an fehter. Computer a tthabik cem mi hna le  a ran khawh chung i thil a ruah i a phi a chuah kho cawlh thluahmah mi hna cu hmangin an vawn tuah tik ahcun, hi code a rak i phum mi hi a si sual mi tisual thil (coincidence maw,  accidental maw) ruang sawhsawh in a rak  um kho ding a si naisai loh ti kha an vawn hmuh khawh.An hngalh khawh.

 

               A tuahtao ning a kite i tlaih khawh ah cun, Weimandl-zawng nih computer hmang theng lo zawngin biafang sullam a nei tak mi le biapi taktak hna cu a rak char khawh ko hna; sihmanhsehlaw a thanh lem lo.(Tu lio America ram i bible code buaipi  tu khrihfa  mithiam Yacov Rambsel-zawng nih computer hmang lo in, Hebru Bible hmang in tampi a hmuh khawh ko). Van tthat ah Weismandl nih a cawnpiak mi hna chungin mithiam cheukhat hna nihcun a thil hmuhmi cu an rak i cinken peng i; Israel ram ah cun mithiam dang hna sin kha a phan zau. A ruattu hna nih cun an mah thengte nih Torah Cathiang chung ah cun min ai phummi(coded names)a um le um lo kha chettiah an kawl cawlh. Fawite in an duh mi min hna cu an hmuh ko.

 

               Cuticun, mithiam dang pipi hna nih ruahkhah ning a phunphun i an tuahtao hnu zawng ah ai lo bak mi result a phi an hmuh khawh tthiamnak nih cun,  cawnnak tteng khat bantuk in, Bibli code cu a bing tein research tuah tlak a si ning Hebrew University,Jerusalem zawngnih a pawm bak. Cu ka i an hmanmi thilri hna cu computer a tthabik cem mi, chikhat te ah nuai-maktaduai in  aruat kho mi hna an si ttung le, Hebrew University i Judah mithiam rual hna nih an mah le an cauk te a si mi Torah chung i biathli ai phum mi an vawn chuah taktak ah cun mu, an mang hmanh ah an manh ballomi thil lianngan taktak  hna cu hmuhhram an vawn i thok khi a si ko.

 

BIBLE CODE AH ZEIDAH AN HMUH HNA & BIBLE CODE ARAK I PHUM NING

 

Peh tthan dingmi

 

Lian Hlun ( Meme Pa)

Na Hawi Le Sin Ah Share Ve!

• Tweet
• Share
• Share
• Share
• Share