"THIL SINING HI NA RUAT SET SET MAW"?

Evan. Rual Uk

"THIL SINING HI NA RUAT SET SET MAW"?

Kum 2017 donghnâk zong a si i thla donghnâk le zarh donghnâk le ni donghnâk le Zarhpi donghnâk zong a simi 2017, December ni 31 ni ah Chinmi kan khualipi Hakha ah thil a cangmi a hmâkthlâk he fb ah ka postmi cu mi 200 reng lo nih react an tuahmi le mi 90 reng lo nih an commen mi hna zoh tikah cheu khat thil sining fiang tein a hngal i ruah set set hnu ah commen a tuahtu an um lio ah cheu khat thil sining zong a thei theng lo i ruat set set lo in commen a tuahtu, an kut ah Mobile a um i fb an hman ve ko caah commen le react a tuah sawh sawh mi zong an um.

Atu zong hi ngol loin an tuah cuahmah lio a si caah a linhsat lio law law ah "THIL SINING HI NA RUAT SET SET MAW? timi tlângtâr he ka hun post țhân.

Unuh nih khan kawlram ah biaknâk pakhat Buda biaknâk lawng um seh tiah saduh a rak thahmi cu ralkap uknâk nih chanhnih dengmang an kalpi lio ah anmah nih Pura le Buda Țempal hna an sak thluahmah lio ah Pathian nung biaknâk ding biakinn kristian nih kan sak liomi tam nawn an kan ngolter mi hna kha na hngal in na ruat set set maw ?

Var tiva kam tlâng cungah Kristian nih an bunhmi Vailamtah an hrawh i Pura an hnuaimi hna khi na ruat set set maw?

Hakha khua lu Rung tlâng ah Kristian nih an bunhmi Vailamtahnâk tung an hrawhmi le Thantlâng khua pawng Vuichip tlâng ah Kristian nih an bunhmi Vailamtahnâk an hrawhtermi hna kha na ruat set set maw?

Kale Khawleih ah kan fanau le nih dikkiri an lak tik ah Zarhpi ni theng ah an tuah i nu le pa rualchan hawikawm zong i pum kho loin zarhpi ni ah kan fale dikkiri lâknâk ah an kal tawnmi hna khi na ruat set set maw?

Ralkap uknâk tang ah cozah bawi hna Falam Hakha Thantlâng an tlun tik ah Zarhpi ni theng te an i sel i kan mino hna i pum kho loin bawidon an fial tawnmi hna khi țha tein na ruat set set maw?

Buda biaknâk zilawngpuai Hakha i an tuah tikah Lai ngaknu no an lamter tawnmi hna khi teh na ruat set set maw?

Buda biaknâk Upoh ni ah kristian siangngakchia le saya sayamah vial te nih kum chiarte an ulhpiak i sianginn kai loin an um tawnmi khi teh na ruat set set maw?

Ralkap uknâk hnu lei chît in mipi uknâk lei ah kan rampi a châk â mer lio ah vawlei dihlak theih in Kawlram dihlak i thîmnâk Zarhpi ni theng te ah an tuahmi kha teh an palh sual mi ah maw na ruah thei ko nabu in an tuahmi ah dah na ruat set set maw?

Kha tan ah khan Myanmar Christian Council le Convention le Association hna le Reveren viak te le MP chungin kristian a simi tiang in Hluatdaw ah nawlnâk tuah zong i tim loin ritthi bangin an daih dihmi hna kha na ruat set set maw?

Tutan kumdonghnâk le thla donghnâk le zarhpi donghnâk, Decembet ni 31 he â ton ni (Zarhpi ni) ah kan Chinram khualipi Hakha ah thil a cangmi kha kan ram caah sem an ngaih tuk ruang le an pawcawmnâk phaisa hmuh an duh tuk ruangah maw na ruah dih ko lai?

Khua le khua karlak lam hna cu hei siseh law a ruahzia kan thiam ko lai.

Kan Chinram khualipi Hakha khua chung hrim hrim ah kan Pathian biakni ah zapi hmuh bak ah rian an kan țuanpiak tawnmi hmanh a poi lo kan ti peng ko ah cun zungzal ca tiangin a poi laimi dirhmun ah a ummi kan si ca tu ah a si lai.

Cucaah zûmtu hawi dawt kan ram ah thil sining hna khi ruat set set law cu hnu ah rak kawmen te.

Na Hawi Le Sin Ah Share Ve!

• Tweet
• Share
• Share
• Share
• Share