TLÂNGKOMHNÂK

TLÂNGKOMHNÂK

Evan. Rual Uk

"Milem biak le milem a biatu hna i teiter hi Sertu Jehovah Pathian caah a fak bikmi a si"

Jehovah Pathian nih Abraham a kawh ah khan a ram, a rualchan le a pa inn chuahtâk dingin a fial. A chan cu a ram cu milem biaknâk ram a si i a rualchan cu milem a biatu rualchan an si i a pa inn cu milem bialnâk inn a si.

Abraham tefa hna cu milem a biatu hna Izip ram ah kum 400 chung sal an can hnu ah Jehovah Pathian nih Moses hmangin a chuahter țhân hna.

Sunglawi le ropi tak tak in Rili Sen an tan hnu tlawmpal ah Sinai tlâng cungin Jehovah Pathian nih milem bia lo ding le milem a biatu hna i teiter lo dingin ralrin a pêk cawlh hna. Zeicatiah Jehovah Pathian nih a pêkmi Kânân ram cu milem a biatu miphun pasarih hna umnâk a rak si.

Miphun caah a thimtu Jehovah Pathian nawlpêk le ralrinpêknâk kha buar in milem an bia i milem a biatu hna an i teiter caah Samarian Khualipi a totu miphun pahra hna cu Jehovah Pathian nih milem a biatu Asiria cozah kut ah B.C 722 ah sal ah a pêk dih hna.

Jerusalem khualipi a totu miphun pahnih zong nih milem an bia i milem a biatu hna an i teiter ruangah Jehovah Pathian nih B.C. 586 kum ah milem a biatu Babilon cozah kut ah sal ah a pek dih hna.

Jerusalem khualipi le a laifang i Țempal pi zong milem a biatu hna hna hmangin Jehovah Pathian nih vutcam ah a canter dih.

Cucaah Sertu Jehovah Pathian caah a fak bik mi cu 'milem biak le milem a biatu hna i teiter hi a si' ti hi Biakam hlun dihlak biacah chung muru tak tak cu a si.

Cucu Biakam Thar Baibal tlângkomhtu le a donghnâk zong a simi Biaphuan dal 21: 8 le dal 22: 15 ah hmadung bik ralrinpêknâk bangin thoțhân Jesuh nih milem biak le milem a biatu hna i teiter a duh loning le a fahning kha a langhter țhân.

Milem a biatu kawl nih Pathian nung a biatu chinmi phunthum in an kan teining.

1. Taksa le bia le hla ah.

Milem a biami kawl nih Zu an kan phorh i kan ngeihchun, kan thazâng le kan sațil arva man phaisa kha milem a biatu hna nih an zuman ah an kan lâkpiak. Kan ngeihchun kan phaisa man Zu kan hun din tik ah kan chiațha hngalhnâk lungthin thiang kha a kan lâkpiak țhân i mimawlh bangin tawro he kan ril.

A tângmi um loin an kan tei cikcek.

Chinmi khualipi Hakha lamkam ah chawdawr a tuahtu zong Chinmi. Thil a cawtu zong Chinmi. Asinain chawdawr min cu milem a biatu kawl holh in kan țial.

Lakphak dawr a tuahtu zong chinmi a dingtu zong chinmi. Asinain lakphak dawr chung ah kan hmanmi 'chupawh, phân pawh, puaite, puaici tite hna cu milem a biatu kawl holh a si.

Lailei khua te bik zongah a lut chuakmi cu Chinmi. Asinain hauka ah ca an țialmi 'Cusubaih' timi cu milem a biatu kawl ca a si.

Motor cawtu zong Chinmi. Akaltertu le a bawmtu le â citmi zong Chinmi. Asinain motor chungah nitlak in hla an saktermi cu milem a biatu kawl hla.

Motor in țum a duhmi an um tikah bawmtu pa nih 'Pare' a hei ti i motor cu a dir. A țum dih in 'Suai' a hei ti i motor cu a kal țhân. Kawl holh lawng in maw motor hi dirter khawh le kalter khawh a si hei ti bangin.

A tângmi um loin an kan tei cikcek.

2. Chunglei nun ah

Vawlei ralpi pahnih lio ah mirâng nih an phaisa an chiahnâk (treasury) a kilvêngtu dingah Chinmi lawng an rak lâk hna. Zeicatiah Chinmi hi Pathian nung an rak biak hlan hmanh ah an fir bal lo.

Nai Krismas hlan deuh ah fb ah a tu le a tu kan hmuhmi cu Thantlâng khuapi cu Dawrkhân bauh le Saikal fir a tam tuk ruangah an buainâk kong lawng te a si.

Milem a biatu kawl nun ah a țhami tampi karlak ah a țha lo bikmi fir nun kan i lâkmi hi a tângmi um loin an kan tei cikceknâk phun khat a si.

Chinmi hi kan si a fâk nain mah țuanman a si lomi lâk le ziknawh a hmang bal lomi miphun kan rak si. Kristian kan sinâk kum 70 a si hnu in eihmuar le ziknawh lei ah bia tak tein kan châk â mer i naikuam ah Kawlram chungah eihmuar le ziknawh a tam biknâk State ah kan hun canmi hna hi milem a biatu kawl nun a țha mi karlak ah a țha lo tak takmi kan i lâk i a tângmi um lo in an kan tei cikceknâk phun dang a si.

3. Thlarau lei ah

Thihnâk teiin Jesuh a thawhțhânnâk hi Kristian zumhnâk chung muru tak tak a si ti hi milem a biatu kawl nih fiang tein an hngalh.

Cucaah ralkap uknâk tangah Zarhpi ni theng te ah hnekchom in thil an kan phorhter tawnnâk kha a si. Meithal he an si caah kan țih hna i Zarhpi ni ah thothân Jesuh bia thiam loin ralkap thilphorh ah ram tang i kan kal tawnmi khi a tângmi um loin an kan tei cikceknâk phun khat a si.

Milem a biatu kawl bawi Hakha an tlun tikah nidang a um lo bangin Zarhpi ni ngelcel kha an i sel i thoțhân Jesuh bia thiam loin Chin mino hna kawl bawi don ah Lai thilthuam i hruk in kal tawn.

An kan tei cikcek.

Kale khawleih ah kum li an kai hnu ah a theipar an zûn ni dikkiri an lâk ni zong ni dang a um lo bangin Zarhpi ni ngelcel ah an tuah tawn i thothân Jesuh bia thiam loin dikkiri lâknâk ah Chinmi an kal tawn.

A tângmi um lo in an kan tei cikcek.

Ralkap uknâk hnulei chit in mipi uknâk lei ah kan hun i met i vawlei pumpi theih in ram hruaitu ding thimnâk an hun tuah tikah ni dang a um lomi bangin Zarhpi ni ngelcel an i sel țhân i lungmawng rual tûrun hna cu chim lo, tûkhâl a simi reveren tiangin siaremlonâk um loin Zarhpi ni ah me an thla.

A tângmi um loin an kan tei cikcek.

2017, kum dongh ni, December ni 31 cu Zarhpi ni he â tong ngelcel i Hakha khualipi zûmtu hna cu biakinn kip panh in kan kal lio ah milem a biatu kawl kawmpani hna nih khua kenne deuh zong si lo Hakha khua laifang bak ah lam ah kattaya khîng in rian an țuanmi kan hmu dih nain poi tinâk le lungfahnâk a ngeimi kan um theng rua lo.

A tângmi um loin an kan tei cikcek.

Hi kong ka post tikah mi 300 reng lo nih reaction an tuah i mi 170 reng lo nih kawmen an tuahmi ka hmuh tikah a chia lei a si zongah a țha lei a si zongah a biapit ning kha a lang.

A ngai ngai tiah annih cu Pathian nung a hngal loni milem bia an si. Sual kan phawt hna ding a si lo.

Hi tlukin taksa, thinlung thlarau tiangin an kan tei cikcekmi kan hmu ko nain lungfahnâk le poi tinâk a ngei lomi Bawipa rian ka țuanpi ka Chin hawi hna pei a rian ka țuanmi Thoțhân Jesuh min in ka uhțanh ko hna cu.

Cucaah dah kaw ka bia hram ah 'Bawipa rian ka țuanpi ka lai hawi hna...' tiah ka ti kha.

Chinram cu Kristian ram a si.
Hakha cu Chinmi Kristian Khualipi a si.

Cucaah kan biakmi Pathian Nung an hngalh lo hmanh ah a biatu Chin mipi upat hmaizahnâk cu kan khualipi a simi

HAKHA KHUA CHUNG TAL AH CUN

an langhter ve ah a țha bik ko lai

Na Hawi Le Sin Ah Share Ve!

• Tweet
• Share
• Share
• Share
• Share