Sonia Mittial Pum

Lengkawite

A kik bik mi khuasik zaantlai ah Lai taphram kan rak i thim. Kan thlan hripi bakin arak kan paih rih. Mei nih maw akan emh tuk hnga? Asi lo. Kan toh mi mei, a t'il lawng atang cang. Thing hun tih chap dingah atlai hoi cang. Khuasik zaan suimilam 11pm, atuan tilo. Nain lawi ruam aa zaal ding ka si lo. Tuzaan cu sem ka ngai kho ngai. Anih zong nih tuan tin taak ding cu ai ruah thenglai ka zum lo. Kan holh thawng athan lo caah adai mi alo khun. Hngilh aa tim ve hnga mi meitil rual hna zong chemphuut in avan fawrh t'han hna. An zawhte zong t'hanghkhat cu avan it'hang ve rua. A dingdawng avan zam pahkhin a umhmun ai t'hial.

A meichem nak chemphut azoh fatin te amirh zungzal. Aruang cu zahan ahkhan Kawi Luai le an chemphut nih kan paw faak dih hnik in akan nih ter caah asi. Chemphut kua ah akut hrawlh ko kaw achuah kho tilo. Nawisen kan hnuk. Kan nih pah in anu nih sathau he avan bawmh hnu lawngah ai phuak kho. Tuzaan tucu Kawi Luai mui ade lo. Sawm kavan tim ko nain inn dangah arak pelrel diam. Phehlo tecun tuzaan cu ka sawm duh ziar velo. A nih hi mi holh tam sikaw bialamkal tu ah kai sawm tawn. Tuzaan tucu bialamkal ka hau tilo tiko ning. Pasal mah le cangai khawrh ka hei ti ve phawt! Zahan ah aning azah pah ruang zong asi kho. Tuzaan tucu Angun te inn ah ai t'hial. Lawipah sawm te ding tuin kan itiam.

Thingthu bulbeu fonhtonh pah in mei ahun chem. Khuapi um asi caah asi lai cu. Thingthu bulbeu siam athiam lo ngai. Amuih ngai caah cengceh ahmu lo. Akut in avan siam.

" A yah aka duah!"

" Eheu!! khoi kei mah ka siam la "

" ayaa... cu meit'il tetak cudah... phu..."

Akutdong hum pah chem pah in chemphut avan ka pek. Kei laikhal, meit'il luklak hna cu fawi ngai in kavan siam khawh. Aka duah pahve nain kai theihter lo.

" Khoi afaak tuk maw "

Akutdong ka van zoh. Meiceu naih deuh in ka van bih piak. Sen lakin aduah mi akutdong tecu kahun hum piak.

" Hasi ithuh ca...."

" adaih tal adai deuh la "

" Poilo adai colh ko la "

" Khoi kan chem piak lai "

Sen hirhiar tein a kutdong cu ka hun banh. Asia arem lo nain ka bia el ngam lo pah asi lai cu. Din nawn tekhin ka chempiak. Akut hum pah in Kamit cung leiah ka t'hial sin ahkhin kan mit aa tong. Mirh nak hlacaang ahun isa nain ningzah nak nih khuhchih mi mithmai in aa phen.

Sonia hi kan khua asi lo. Kan khua hrinsor asi ti ahkhin adik deuh hnga. Anu hi kan khua he ai pehtlai. Zeiti an hrihhram asi bel fiangin ka hngal thlu lo. Khuapi khua ah saupi an um cang. Kan sianginn kai nak khua zong aa khat fawn lo. Tutan hi kan iton nak voikhat nak bak asi. Aruang cu Khuapi ah a t'han caah asi ruang dangkhat, an hngakchiat lio tein lailei an tlun lo ruang dangkhat asi. Tukum belte hi an chungte in khua lei ah X'mas hman ah an hung tlung. Laikhal caah khual an sunglawi. Ahlei ce in tlangval caah asi khun. Kan khua vialte lakah keimah ca ahleice khun rua. Sianginn kai kan si ve caah X'mas lai ni ah khua kan phan cio hna. Curuang ah kan i hmuh atlai. Vawlei cungah arak um ve tizong karak hngal lo nain tuzaan cu akut ka humkhawh.

X'mas zing ah Ahnu lei in karak hmuh. A nau hniang te aa pom pah caah nutung ah karak rel kha ai theih lemlai lo. Pumhchuah pah ah akedan karak lamh sual. Ka lamh hramhram cu asibak lo nain amah he naih deuh in kal ka duh caah ka ke aluan sual.

" Ah...."

" Aih! sorry...sorry, kan lamh sual. Sorry bak si "

Atlu luklak nain mibuu lak asi caah ichan pah in atlu thai taktak lo. Cuvial ahcun mit vialte ka cungah an hun tla dih. Ka ningzah ning cu mitau nak zong ka ngeilo. Faak nawn in ai nok caah mi tam nawn ava en chih hna. Ai khawn mi nakin aningzah mi afaak suaumau lai. A biangki sen ka hun hmuh ahkhin nutung ah ka rel mi kalung ahung hring. Ka bia ahun dihbaak ahkhin ahun ka zoh. Cucu kan i hmuh hmasat nak bik asi. Aban in tlaih ka hun timh ahkhin,

" Aa...apoilo ngah ko "

" Na khawng maw? "

" kaa khawng lo... ngahko "

Bei nawn tekhin hawi karlak in ai zukphiak. Hawi ningzah ngang lio ah mineng thla zong an rak tlawm ve lo. Ka hnu lei khin an van ka cheih colh.

" Saza pa, na men loh, Nungnak bak thluk na timh kha awh. ka dua khua zoh deuh".

" Maw Par nih avan ka hloh ko. Nain kai mirh ter sawh sawh. Tuzaan cu choi te laang titu in bia kai khiah cia".

Loriak ar bang phing nawn tekhin X'mas zaanlei rawldum nakah ka hmuh. Kan mit ai tong hoi. itong ding reng reng in ka hei ngiat pah ve cuh. A phiing chinchin. Amit athuh lengmang nain athup kho thailo. Leeklaak saling tecu si ve kaw, rawlchap le tawnlek ahcun kan ithelh chuachuah hmeteh. Apawng tein va dirhnawh i buhchap ka duh ngai nain ka thisa nih achei deuh lo. Apawng ah Maw Par athut caah ka ral atha deuh ngai. Maw Par tehe chungkhat an caah kai van that. Maw Par hi ka hawitha ngai asi caah an inn ahhin kei le Kawi Luai hi kan lutchuak dom tawn. An inn ah an tlung ti ka theih caah ka hna angam chinchin. Cuticun pehtlaih nak thar ser kaatim.

Zapi khim phutmat rawlcawih pawl an ithawh ahkhin rawlcawih ihrawkhrawl in khuahriang lei Maw Par tein ah kan pelrel.

Cucu kan ipehtlaih nak hramthawk nak arak si. Ni tlawmpal chung teah faak piin kan i tlaihchan nak ahung t'hang. Cun ihlamnak hrihhram hna zong ti awk t'haloin kan karlak ah thlauhkhawh loin an hung kheu. Cucun kai pheh ngam tilo. Sonia iang nih ka thinlung chungah zeitin dek rian at'uan aduh ko. Cu ruangah pei tuzaan akut ka hum fam hi. Kut hum lawng kai zaa tilo. Athinlung zong hum chih ka duh nain ka thintur nih aka tlauh lengmang.

Saunawn kan holh veve lo. Ka hum mi akut zuh zialmal atimh ahkhin kakut hnih in ka hun hum caah azuk ngam tilo. Van thlipi le teek bang a thinlung acawl kolai. Aruangcu a mithmai ah sum thiamlo mi ningzah nak biangki ahung sen.

" Sonia "

Din tein ka kawh sin khin aa buk mi alu ahun cawipah. Hawi nih cun Sonia tiah an ko lemlo. An mi min kawh nih aka simh ngang nain acaak kai sum bia. " Nia te " hei ti " Ania" hei ti hrawng i kawh ahmang mi zong an um len nain keicu "Sonia " bak in ka kawh. Tuzaan hnu in mindang he kakawh tawn. Cutucu kai chiah rih.

" Hmmm zeidah "

Amirh pah in aka zoh lio asi nain kai biatak caah ka mirh ve tilo. Kahum liomi akut tu fek tein kahun hum chin.

" Namin bak hi akawh kan cim lo ee "

" Hee sitak ma eih?"

" Si ee, kacim baklo. Voikhat in kan ko than kho tihnga maw? "

" Mmmm... ngah ee!

A lu asuk. Cun kai biatak ahngalh caah athawpi ahun chuah pahkhin alu akhun than.

" Sonia "

" Kan Duh Tuk "

Aka hawih manh hlan ah ka biathup ka ka peh cawlh caah alau tuk! Voidang ka biachim mi lakah adin bik bia asinain athinlung chungah athang bik asi lai cu. Pheh ka thiamlo mi ka thinlung chung thildik, tuzaan ah kaka chungin achuak. Ka chim ballo mi bia asi caah Ka ka nih aa ziak tuklo. Din telawngin ka chim ngam.
Caan tlawmpal te cu vawlei adai. Vawlei pumpi hlah maw aa din taduak khi bang. T'uanglai t'him tlak thawng hmanh khuari ah kan ruahsual menhnga.

Cuticun athlanfim tete acal ah an hung pawt. Thuhkhawh lomi thintur hna zong, leng leiah thir thliahmah in athawchuah he an hun ihrawlh. Zeiti hlei in leh awk bia akawl len lio ah ka bia peh pah in abiang ka hun naih. Ahna hram ah ka lungne bik bia hmualngei in ka hun chap.

" Nangmah lawng...... Kan duh bik. Sonia... na thinlung innkhar hunpiak dingah ka tlai loh ti koh... ?"

A umtu aa remh hnik nain faak piin ka reh chih cang mi apum, ka nawlzul in ka sinah ahun ibeek lawlaw.

" Maw... ka chimta "

Apum hngir pah in hngakchia thil hauh bang ka hun hal hramhram. Biadangah pial aa tim hnik nain ahlet lei in karak phih kanh caah abia aa nawnnok.

" Zei cu hen....?"

Meitil sen azoh lio ahkhin asen tukmi abiangki sel/tinh in kahmur khual atlawng. Ai phet caah ka phan lo. Cun ka bia ka peh t'han...

" Sonia... Zeiruangah dah kan thim tihi ka hngal lo nain kan herh mi narak si tucu kafiang. Nifatin te kan hlam nak aphi hi kan duh ruangah asi tininglaw zakhat ah zakhat ka dik bik hnga. Nangteh adik ningtein naka let khove hngamaw....?

Caan tlawmpal kan dai veve t'han. Kareh chih nak kakut hna, din zialmal tein ahun phen pahkhin a um sia ahun iremh. Ai tuai pah mi ahmaileisam hna ahun isiam hnu ahkhin keimah leiah din mikdik tein ahun imer. Chimhnik aa timhmi abia nih voikhat cu a umtu apalhter. Cun hitihin_

" Cu maw? Keizong.... aheem" ( akhuh ta )

" Na chim mi bia vialte hi tlawmpal tehmanh hrelh loin kaa hrawm dih ve "( palhlo tein achimkhawh )

" Biatak?"

" Mmmm ( A luasuk ) "

Amah lei hoi in ka zaa ka zo pahkhin ka taang cungah ibeek dingin ka hun sawm....

" Naa hrawm man "

******

" Sonia kailawm "

Amirh i apiangmi mithmai nih chozoh in ahun ka zoh. A mittial pum tlimtliam tehe zumhngamnak le bochannak nunlum put in ka taang cungah ahun ibeek. Hi mittial pum, lungthiang takin kat'aang nih acohlan. Ton ballo mi chimtlinh lo thintur tem in, kan karlak ah Duhdawtnak alumsa. T'heplo tein zoh ka duh peng mi Sonia, Amittial Pum....

Lengkawite
Yangon
1/1/2016

Na Hawi Le Sin Ah Share Ve!

• Tweet
• Share
• Share
• Share
• Share