KHUASIK MANG

A thlum khuasik zing ah
Ka biangcung na hmurthlum nih
Ruah lo piin aka hlauh...
A cin mi ka biang.
a phi hnik cang..
Poi lo,
Dawtnak hleice asi;
Cun,
hi khuasik zing
Zing dang nakin,
A thaw khun...

"Aaa bua"

"Hawi ttha, hawi ttha, Uu..., tho cang hen! Na thawh tlai tuk, nang bak cu",
tiah hnoh nawn in Dawt nih ahun ka tthangh. Tuzing cu a Hakha holh ahun chuak ngai. Hakha holh hmanh aphilh dengcang rua ka tilio ah. Ka tho huam lo akik tuk rih. Mi khuate ahcun thawh tuan an tam caah thawh tlai ka lo tawn i asi. Hawi cu an tho, inn rian an ttuan hna. Kei bel cu ka chantling he kan i siang bak rih lo. A kik tuk rih fawn. Ka puan nih thawh aka thlauh fawn. Dawt tucu coka ah ka nu he an i tuai lio pi asi. Ka pa zong innleng ah a meithal a hnawt cuahmah lio. Tuchun hi khanhnawh asi lai ti phunphai in ka thei. Nain khanhnawh phunphai cu amin kai za. Zeipi ka ruat huam lo. Tuni cu ka sianghngakchia pawl camipuai an dih ve lai. An dih cun, ka rian kai lim lai va si kaw, zaanlei zeidah ka tuah hnga aw., kai ruat len... zei pipa ngai tuah ding ka thei lo.

"Ee! a tho rihlo tih, khawi titawih cang ning ". coka lei in avan au cang.

Aw! ka tho tak rih lo hme cu. Hlut tiah ka puan chungin ka hun chuak. Lekmalak pokhlet leiah. Hmaiphiah lai ka zenh ngai nain thlalang hmai ka khah deuh lo caah ticawk te ka hun banh.

"A zaw... akih ning!"

Ka hmai cin hnawh pah in coka lei ah ka hei kal. Meh atuah lio asi. Dir buin cabuai ah mehthur arak tuah cuah mah. A dirnak he hmaitonh ahkhin thlalangawng fate pakhat a um. Thlifim ahung hrang. A rian ah aruah deuh caah asi rua, thlithiang hnimh a uar tuk tawn mi ka dawt, tuzing cu arian tu ah ai phum. Meikhu he aa zi lengmang mi asam, nutung puitling ngai bangkhin a hnu leiah aa tom vecang.

Tithah hrai he a pawngah ka dir. Ka paw kai muai pah khin,

" Ka paw tam eh, na chum thlu deng maw ".

" Kal koh, na thawh tlai pi leh, hawi rian an tlai dih cang hi na thei lo ma? Nangbak cu".

A kut cin thikpah khin a hun ka siik. Ka holh ve lemlo.

" khoi na fa teh?

Biadang kai hal ter. " Zingka te'n Sung Sung nih aa puak diam kolo ma?".

"tuzing zeimeh?

ka bia hal atam chua chuah." Ngapih". " ngeh ", ka hmur ka van euh hnawh pah khin atai in kuh ka hun timh.

"tho hih, hawi riantuan lio ah", tiah ka kut a hun ka phen pah in taphram ah a tuah lio mi meh kheng he ai tthial.

" Tuni cu chunhlan lawng nan kai la silo ma"

" Mm, ziah?

" aw, tuzaan lei cu nang nih Ar tuah
law ka ti ii "

" Aa, kai manh lo tuk eh ka dua, ih caan hmanh ka ngei tilo eh. Ka fa le ca hi chek thlutuan ahau eh". Khuazei maw Khuabawi rian ai khinh bang kaimanh lo nak chim buin ka van hrang pah.

" Ziah, zei Aar dah?

tiah ka biahal nak ka hun peh. Buh bel ahnur pah khin, "Uu, nang bak cu". A bia a peh tilo.

Lukmalak ah thaithawh kan ei. Kan khim cun ka Pa cu a meithal he khanhawt nak lei ah ai thawh. ka nu nih, "khah! Tluntuan van izuam te ca; tiah ahei ti khi ka theih. Ka pa nih, "Awh! zapi he ramleng chuah ahcun tlun tuan hna cu chim khawh asi lo cuh! zapi ruahnak le hual van thu hna asi lai cu" tiah din nawn khin a hei leh. Inn leng ah Zing Tha le api an i hawh. Ka dawt cu ai tuai cuahmah. Kei, ka kutput zal tehe sianginn lei ah kai thawh ve. Khuasik zing asi. X'mas hmang dingin khualei arak tlung tuan cheu khat pawl mithmai alang pah cang. Ka nau le zong an camipuai phit tuan i zalong te um an i ngaih ngai. Ka nu nih apom lio mi kafa nute nih akut ahun ka chanh. " Papa " ahun ka ti.
Ka hni hring fenh pahkhin, "hawilaw,
ka dawt te ", tiah ka hei hnamh. Zing Tha nih "Papa, Pupu " ti athiam nak asau rih lo. A nu zong, cuti " Papa" tiah ahun ka auh caan ahkhin ahna atun tawn ve. "Nunu, Pipi" tizong thiam zau seh ti aduh tuk lai. Kum sau nawn chunmang karak manh tawn mi Sonia he chungkhar dirh hi Ka thlawlh sual lai ti ka rak phang tuk. Nain, naihrawng cu Sonia ai nuam rua lo. Kai manh lo tuk ee ti he khin inn karak lawi caan paoh ah ka tlokciar ve tawn. Sonia a holh lo. Inn lei rian ka bawmh ti lo nak a kum in asi cang lai.

Ruah lo lengin tuchun kan naule an camipuai piht atluang. An phit cia mi ca chek pah in Saya te pathum nih kan hngah hna. Nain pakhat cu ahnar pah cang. Sayamah pakhat zong innleng afa he an i tuai lenko. Kei an lakah kai chawk nain, ka thinlung cu akenkip ah vai ve. Kan khua ah private saya ttuan hi tanghra ka kai hlan in ka rak i ruah cia. Ruah lo pi ah kum hnih ka tlai. Ka thlakhat thlahlawh te cu rasen tunkhat cawk nak fangfang, khuami nih laksawng an ka tuah nain, khua le ram caah asi, ti tukhin ka thinlung a um caah ka rian kai lunghmuih khun. Dawt zong nih kai lunghmuih mi rian asi ahngalh ve caah ka thlahlawh kong achim ballo.

Ka khuaruah mi ah ka pil ngai. A luancia mi kum thumli lio i sianginn kan rak kai nak kong hrawnghrang le X'mas lai khua tlun hrawng hrang. Zing cirik, Dawn-Zaang lei tlun tluk bak khin kan rak ithawh i Lahva kuang ah cei in khuasik nih arak kan den tawn. kan zal ken ne zei maw te kan hun dolh hnukhin kan khua ahung lum. Khi tluk Lahva kuang khuasik ahkhin kan khua a hung lum hnu cun kan hirha ahei kawh khawh ning. Khual nungak hmai ah an kal ko ti kan theih bak cun kan kal kan i ranh ciammam i kan phak hna hlan lo kan dawi tawn hna. Kan far le cheukhat an tha arak ba tuk. Khuapi um kan ti cu an ke dil vialte akak dih hnik. Cu laklai ahcun sianginn ah ai ngiar pah hrulhhralh mi tlangval cheukhat lampi ah ai zuanhnawh tawk zong an rak tlawm velo. Kumthar hnu Khuapi lei i thawh arak har ning hna kha rak mak ngai ve hoi. Kan rak uai ngai ve hoi hna. Nain kei cu ka uai lemlo. Akir lei ko ka rak i ngaih khun. Sonia nih arak ka don ttheo lai ti zumh nak he Khuapi lei fuh ka tha arak nuam chuachuah.

"Saza...saza...saza "

"Aw, aa! zeihme? kan dih cang".

"A ze, zeikar ah hme, nan phit thlu maw?
" Mm, phi thlu".

Ka khuaruah nak ka nau le Camipuai dih le dih lo hmanh ka thei tilo. An zapi ngacha in an rak dih cang. Caan tlawmpal hnu ahkhin darkhing an hun tum. Inn lengkhin kan nau le authawng athang. Innhmai ah an zapi an hun i dingtlar i Saya pakhat nih X'mas caan chungah zoh dawh tein tthut um nak kong le sianginn hun tthan nak kong a hun thanh hna.Cu dih cun an zapi,

" Lawi!"

tiah an au i a zaal hlirh buin inn lei an panh cio hna. Zungkhan ah memu phomh kan hun ei ta. Memu ei pah ah tukum X'mas tuah nak kong he biasawng kan hun tlawrh ta hna. Kan ei dih cun hnathiang in inn lei ah kan lawi cio.

Inn ah Dawt lawng arak i tuai cuah mah. Kan rak i umh lio i a maw le nih laksawng ( lehphuaih ) akan pek mi
chantling khuh le Ihphah khuh, bantlang ah arak zar cuahmah. Kai put mi ka zal cu innleng thutdan cungah ka hei thui.

"Kulung"

" Na umtu hih, nau na tthang la lo ma?". a van ka hro nawn. Innchung ah athlim mi Zing Tha atap.

" Na tthangh tak cang khah"

Puanphen in aka meet nawn hnu ahkhin ka zal le ka cauk cheukhat aa thek mi ahun char hna. Kan ihnak khandal ah amah telawng ai thal i attap mi Zing Tha lei ah kan hei lut. Nau lem a thiam lo tak mi ka holh hak piin nau cu ka van hawh len.

" Nunu, ngam seh, ngam seh. Apa nih maw aw, kung! tiah an tthangh. hawilaw, kafa... " hnuk dinh pah in nute cu ahun lem.

" Dawt, ka nu teh? Thlalang bih pah in ka van hal.

" Ee! ka philh deng tak cang khah. Kanu dum ah akal. Veimu Hawittha, na thil i thleng zok law, Aar cu nang nih na tuah to ahau ko. Ka nu nih muuh, tuzing ar hren ka philh i, a thah fawi deuh ding Arkhong le Arpi sen kha rak tuah te seh an ti tak kha., Khah! a tuan tilo hih, i tim zok kun! ".

Ka thawpi chuah pah khin, " hawkhe ". Ka thil kaa thleng dih. Chai le tthaitholh he ka chuak. Archaih ahcun athiam lo cem ka si la. Innpa hngakchia pawl he thingtan le lungtum bawm in kan dum hna hnu ah awk awk fak fak in kan tlaih khawh hna. Kai buai sek. Kan coka mei akhu dom. Dawt zong holh lo tein abuai ve. Ka nu zong dum in arak tlungtuan. Nau zun ek fimtawl ah ai za khim ve. Ka pa zong tuan deuh ah a hung tlung kho. An hual attha. Saza bak an van kah. Upa vo ah tiah achungzaang
an hun phurh ter. Lungthu keem in
in an hnawh. aithing an hun ttamh. Anthur kawksen an hun ttoh colh. An cawi lai ah hamhhuai le zeimaw an hun thlak. tuzaan lei cu Kan tappi ai manh lo ngai .

Muilai a si cang. Arfi zong an kai atuan. Rawl akan hrawng ding kan chungkhat le Pastor te zong kan inn an hun panh cio hna. kan terual ngai hrim. voidang rawlhrawn kawh ahcun zaanriah ei dih hnu ah pumh nak kan tuah tawn. Tuzaan lei tucu ei lai tu ah thlacam nak kan tuah.Tuzaan kan inn pumh asi ka philh dep hoi! Rawl ei nak an ser chungah kan pumh nak tawite an hun thawk. " Chungkhar dawtnak um ahcun, zeizong te a nuam", timi hla kha a Bass lawngte ti awk in kan sa hna. Chairman thiah hau loin Pastor nih a van thawk cawlh ko. Amah belte a Bible cangthim mi Deuteronomy chung thit umh nak kong hna kha ai tel. Biatawi chim nak ahun ngeita.

"Nan nih chung hi mi van tha bak nan si. Pathian nih an dawt tuk hna. December thla chuak hi hngar awk an si"... avan tibak ahkhin ka lung ahung pem. Elaw! cu ka thin, Ka fanu chuah cam hmanh ka theih tilo hi, aka molh tak ko rawh hi teh.

Tuni hin Zing Tha, kum hnih atlin asi. Ka lu kai kheuh pah khin Pastor pa bia ka hun ngai than. Cun, tuzaan ah nan hun kemh chih mi Saya Leng te nupa tthit-umh nak camtuak , avan ti bak ahkhin ka lau tuk!

Elaw..., Cu ka thin! Ka dawt. Ka palh tuk. ka lung ahung pem. Zei khua hme ka ruah tawn le hitluk hin ka mawlh. Hi innchungkhar dirh nak dingah ahram lawng karak dirh i keimah lila nih ka philh hi...Ka dawt, ka ngaithiam mu.

Dai zirziar tein ai pom mi nufa hna ka zoh hna ah ka thinlung ai chir cikcek. Pastor pa bia ka hun ngai tthan.

" Innchungkhar kip kan i zoh cio tikah hin, i tthit i laak hnu hnu ahcun, Kan nupi lele kan va le cio hi kan hram te ah an um na koko in kan philh theo tawn hna. Cu nihcun, Dawtnak ahnawl a hnawl ter a hnawl ter i adonghnak ahcun a philh in kan i philh tawn. I thit-umh ni thengmang te ah a camtuak kan tuah khawh lo hmanh ah, kumkhat voikhat tal chungkhar dirh ni hun thar ter tthan le hun theih tthan nak tuah nak hin, Nu le va karlak i dawtnak a hram tuk athlak ter i, i dawtnak afek khun. Tuzaan i nan thil tuah hi cawn awk atlak i lawmh zong a phu tak tak. Hi pin lei zongah bi tetal in pehzulh khawh i zuam cio hna usihlaw, tiah " abia ahun peh.

Ka chung le hmai ka khah hna lo zong khat. Ka nu thlacam cah mi ko nih a ka phuhrun ter chin.

" Bawipa attha! nihin tiang kan nih innchung khar, dam nak he akan hruai lawng siloin thluachuah lian ngan fanu rosung zong akan chap rih. Nizaan tih ni ahkhan ZingZing nu hehin kan chungkhar kong bianuam kan hei iruah. Cuticun bialam ah Pathian nih tthit-umh nak caah akhua khan nak kong khi kan hei i ceih len. Cunih ka lung aka pemter micu, innchungkhar dirh ni camtuak tuah kong hi asi. Kan fale hi mino an si. An i daw ko rua kan ti lio ahkhin micheukhat cu bia zumhar pakhat ruangah ai ilh khiak tawn. Cu caah ahcun kan fale caah hin dawtnak tharchuah tthan nak ah Pathian sin ah thlacam cah kan duh hna. Cun, "

zei dangdang thlacam cah nakin a bia ahun peh. Kan zapi thla kan cam hna.
Thlacam kar ah zaanriah an rak ser dih.

Kan hmai ah aa hung mi zaan riah kan purh pah khin rawl aa khaih cuahmah mi nufa hna ka hei zoh lengmang hna. Kai phuhrun tukah khin ka ka hmanh athaw leilo. Tuzaan zeibia in ah Dawt ka hnemh lai, timi bia i ruat bu khin rawl ka pur.

Kan rawl ei chungah pumh arak i thawh mi mecheu an hung lut manh cang hna." Khua hnuai te dawng, tulawng maw nan ei " tiah an van kan capo pah khin Innpi leiah an lut hna. Kan i fimtawl dih ahkhin cun mi an hung chuak phutmat cang hna. Khuang tum thawng le X'mas hla nih kan inn a hun tlirh. Tuzaan kan inn pumh cu kai ziak set lo. Leiba liang ngan ka ngei, timi ruahnak nih ka thinlung aka khuh deuh. Pumh dih hnu, kan inn a kin hnu tiang hmanh kai ziak hrim lo.

Atlai cang. Ih aza. kanu le Zing Tha an i awi. ka pa a it tuan. kan nih pahnih, thutdan le zeimaw kan hun fim.

" Hawittha, Ka thil zaar mi kha van luh ta ko hen nang" . tiah hnawm kuih pah khin a van ka fial.

Thlapa nih a ceuh mi kan innleng ah caan tlawmpal ka dir ta. Arfi hna zong thlapa ceu bawmh awk ah hmun kip in an rak lek cio hna. Tualpar ah ka hei chuak deuh. Faak piin van ka cau. Tuzaan ka thilton cu ka lung aka suk tuk. Dawt sin ah ngaihthiam hal nak dingah ka biafang hna nih an thlinh lo. Zeitin, Dawt sin biahram ka dawmh lai. Kaa put mi thilpuan he tualpar ah ka dir.

Hei! ra lut cang hen. zeidah na zoh? atlai cang hi". Innka ah alu manh buin ahun ka auh hnu lawngah khin ka lung afim. Asam fimtawl pahkhin innleng leiah arak chuak. kutphiar angkilum banfual chungah akut athuh. Kaa put mi thilpuan ka bah hnu ah

" A tlai rih lo, rak ra rih hmanh Dawt"

" Mmmm, ka mit a kuuu, a bababa".

A angki banfual chungah athuh mi akut chuah in aka ahun i aka huh/bengh pah. Keimah lei ah aa hnoh nawn mi lamkal he a ka naih thluahmah. Ka mirh kho na loin ka van mirh ta. Ka za ka zo hnu ahkhin ka ttang cungah ahun i bek dingin ka hun sawm. A mirh bukhin,

"Cu thluhthalh cu" tiah a lu alei . Faak piin ka za ka zo tthan. Ka hmaizoh
bu khin ka ttang ah ahunbi beek hnu ah,

"A tlai rih lo, lomei". Din tein ka chim
Ka liang he aa zawn mi thlapa azoh bu khin,

Zei cu hen?. A nem mi ka ban tha rengh buin ka hun rehchih.

"Mmmh, a faak". Aa chang. Cun, ka reh chin chin hnu ah, A hleice dawtnak in a hmur ah ka hnamh. A holh lo. A ning azak nain kai theihter lo.

"Sonia"

A hna hram in ka auh. A pum ningpi in duk alau. Hi min in ka auh tilo nak kumkhua in asi cang.

"Hmmm", A lu asuk. A lusuk ning a hmaan theng lo.

" Ka tlai rihlo tiko".

" zei hen? ih pei atlai cang kan ti ko cu ".

" Siloh, na tlai rih lo ti ta kun "

" Sile bia kan hal ta lai, ziah naihrawng hi voidang he nai lawh lo. kan hua pah deng hi awh. a reng reng ah ziah Nute chuahcam hi na philh khawh. Cupin ah Kan i umh nak camtuak na philh mi zonghi ka khuaruah na har ".

Ka ningzah ning hi khuk i bil i ngaihthiam hal bak ka duh. Ka ban kar te khin a kut ahun khumh hnu ah ka keng lei ah akut ahun sih.

" Ka ngaithiam mu dawt". A tai khin faak piin ka hun kuh.

" Uu, na tlai lo ee ". A mirh bukhin ka keng ahun ka muai.

" Ka tlai tuk rua tiah na ruah lio caan khi na tuanh bik lio caan asi, lomei?
na tlai lo hawittha".

Kan pahnih in kan dai. kan pawngkam zong adai. Ka dir ning ka sia kai remh hnu ah. faak piin ka hun reh.

" Dawt "

" Chim ". Ka liang ah akhabe ahun chiah pahkhin,

" Kan Duh tuk".

"Ssh, Uu...Hngakchia kan si tilo. A pum in a hun ka en nawn. Ka bia ka peh tthan.

" Cun, umm ti ta ".Din madik te, a khuh aw khin,

"Umm"

"Kan dawt tuk"

" Ka Uu te aw, ziah hen mah bia cu tuzaan ahcun naka chimh i? Na ka dawt tuk ka theih ruang, cun Sonia zongnih midang nakin kan dawt bik ruangah da kaw nihin tiang na pawng te ah ka um peng hi. Uu, Kan dawt tuk ve ko".

A ngaknut lio bialeh dan te bakkhin avan ka leh tthan. Nain keimah tu ka ning azak chinchin.

" Dawt, ka ngaithiam muh. Ka palh tuk" . A biang ah a tla mi asam hna siam pah khin ka chim.

" Tuzaan Pastor le kanu bia lebang kha cu keimah hlah maw a ka chalh hnik rua ka ti ko lo maw? Veimu Dawt..., ka ruat thiam ko mu. Vawlei cungah hin keimah lawng minung ah kaaruah caan atam pi. Cu nih cun, nangmah le ka innchungkhar athlum hnga tluk in athlum ter kho lo. keimah palh si mu ". Ka dang aka khar pah. Zei dang bia hun char in hun hnemh ka thiam ti lo.

Thlapa nih aven mi rilipi bang amit ah mitthli fim tete an hung i dil. Kei zong, hi bia ka chim hlan in ka zia kai huat nak le kai uah nak vialte hna, i chir nak mitthli ah an hun cang hna. A dang akhar buin aka ahun an nain aa sum tthan. Faak piin kan i kup. Caan tampi cu Kan dawt ti kachim ko bu ah, ka bia hna hi thlicung bia vaivuan an si caan a tam pi tak tak. Ka pawng te ah dai tein kan chuangkhar nunnak zalam aa hrawm mi Sonia, ka philh ttheo tawn. Ka sinning kaa hua tuk! Sonia, ka zaang afak tuk. Kai chir ti pin ah biadang ka ngei tilo. A mitthli hai bu in avan mirh ta hnu ahkhin a chuak kho lo mi a aw avan remh. Aa zawn lomi ka angki kep siam pah khin,

"Vei mu, Hawittha., Nangmah lawng na palh thlu lo. keizong ka palh ve lomei. Minung cu kan der nak zawn cio a um i, a bik in Nu le Va kan kar ah hi te hi abia pi tuk. Ka lu in ka phurh khawh lo mi thil kha nang nih na liang in, Na liang nih ai hnek khawh lo mi kha kei nih ka phei in. Cuticun kan chungkhar zaang adam lai. Nangzong na bialawng siloin na tuahser nak in kan chungkhar kan lumh sat law. Zeitik hmanh ah na pawng teah kan um peng ko ti hi philh hlah mu. Uu, kan nu le kan pa an upa cang. Siarem tein le lung nuam tein kan chungkhar kan kan feh ter awk pei asi cu. Um ta rih! kan biakam te kha na philh lo lomei? chungkhar nuam kan ser lai kan timi kha...

Zaan khua tlai hnu ah kan tualpar in Dawtnak kan lumsat ter sin, Thlapa zong firuk hna he tlanglet ah an i thawn hna. Bantlang ah ai zar mi puan luh pah in innchung lei ah kan lut tthan. Zing Tha zong api le sin in a nu nih a hun cawi luahmah. Chun nilin nih arim athawt ter tthan mi kan ihphah khuh le kan chan tling cungah Kan nu pa farual tein merem kan thawk. Kaa hngilh lai te ah huamsam tein ka lu ka cawi. Kan karlak ah aa hngilh mi Zing Tha, a cal ah ka hnamh.

Tuzaan cu kadawt zong aa dawh khun tthan. A biangki nem cungah ka hmur ka hun chiah sin... Kan sianginn Devotion darkhing nih a ka hlauh.

Get up... get up!

" Tho zok! tuzing nangmah chairperson na si khah".

Haaa! Um tarih tunai cu! ka mit kaa hnuai. Zeihmanh ka hmu lo. Ka pawngah puvom bang kawi Luai tu arak i thal.

Aw!, tuzing ka mang., A luan cia kum nga lio, a kik bik December zaan ah chungkhar ser karak sawm mi Sonia... Khuasik mang he na rak ka leng mu. A tu cu, Van kil deng ah chungkhar nuam aser nak asau cang an in ti. Aw... Caan nih afenh i ka philh hnga cang mi, Sonia he kan rak manh tawn mi Kan chunmang kha Khuasik mang lawngah manh khawh asi cang. Thangh siang ti loin manh ka duh hringhran hi Khuasik Mang.

Lengkawite
Yangon
1/12/2015

Na Hawi Le Sin Ah Share Ve!

• Tweet
• Share
• Share
• Share
• Share