A PALHKHOLOMI PATHIAN LE A BIA LAWNG LAWNG A HMUN LAI

Evan. Rual Uk

A PALHKHOLOMI PATHIAN LE A BIA LAWNG LAWNG A HMUN LAI

Pa le Fapa le Thiang Thlarau cu Pathian pakhat sining phunthum in â langhnâk a si tiah na hrilhfiah i Amen an pek tik ah i lunghmuih theng hlah.

Zeicatiah 'sining phunthum' timi hi a palh khomi minung nih țawnchom in an hrilhfiahning a si.

Baibal Cathiang ah 'sining phunthum' timi a um lo.

Pa le Fapa le Thiang Thlarau cu Pathian pakhat rianțuanning phunthum in a langhnâk a si tiah na hrilhfiah i Amen an pek tik zongah i lunghmuih theng hlah.

Zeicatiah 'rianțuanning phunthum' timi zong a palh khomi minung nih țawnchom in an hrilhfiahning a si.

Baibal Cathiang ah 'rianțuanning phunthum' timi a um lo.

Pa Fapa le Thiang Thlarau cu Pathian pakhat muisam phunthum in a langhnâk a si tiah na hrilhfiah i Amen tiah an ti tikah i lunghmuih theng hlah.

Zeicatiah 'muisam phunthum' timi hi a palh khomi minung nih țawnchom in an hrilhfiahmi a si.

Baibal Cathiang ah 'muisam phunthum' timi a um lo.

A palhkholomi Pathian Bia țialnâk Baibal Cathiang ah a ummi cu "Zeitintiah van ah khin Hngalhpitu pathum an um: Pa, Bia (Fapa) le Thiang Thlarau an si i hi pathum hna hi pumkhat (pakhat) an si", ti hi a si.

Hihi Pathian pakhat ah mi pathum Pa, Fapa le Thiang Thlarau zungzal zungzal in a rak um cang i a um lio i a um peng ding cu a si.

Sining phunthum, rianțuanning phunthum le muisam phunthum timi hi Baibal Cathiang ah a um lo.

Pa, Fapa Thiang Thlarau cu Pathian pakhat ah mi pathum minung sinah a langmi an si.

BAIBAL AH DEBATE

BAIBAL AH DEBATE Matthai 4:1-11

Evan. Ruak Uk

Zuamcawhtu........Sehtan
Zuamcawhmi......Jesuh
A hmun................Jordan Ramcar
A cân....................A.D. 30 hrawng

An i debate ning

Zuamcawhtu:- "Pathian Fapa na si ah cun, hi lung hna hi changreu ah cang dingin nawl pe hna ngat", Mt.4:3.

A sullam cu rawlțâmmi nih a herh bikmi rawl kha pek a timh tinâk a si.

Zuamcawhmi:-"Minung hi changreu lawngin a nung lai lo, asinain Pathian kâ in a chuakmi bia in a nung deuh lai, tiah țial a si" Mt.4:4.

A sullam cu Sahtan pekmi taksa rawl ei nak cha cun Pathian pekmi thlarau rawl ei kha a duh deuh tinâk a si.

Zuamcawhtu:- "Pathian Fapa na si ah cun zuang, "Zeitintiah nangmah kongah a vanmi kha a thlah hna lai i na ke lungah nâ khawn nâkhnga lo an kut in an in cawi lai, tiah țial a si" Mt.4:6.

A sullam cu Cathiang chimning merh i timh kha a si

Zuamcawhmi:-"Jehovah na Pathian na hneksak lai lo, tiah țial a si țhân" Mt.4:7

A sullam cu Cathiang cu Cathiang lila in fianter ding tinâk a si.

Zuamcawhtu:-"Bawk in na ka biak ahcun, hi vialte hi kan pek lai" Mt. 4:9

A sullam cu lei chawva rumduhnâk in a lem tinâk a si.

Zuamcawhmi:- Satan, lo ko in tli! 'Zeitintiah Jehovah na Pathian kha na biak lai i amah lawng lawng na rianh lai, tiah țial a si.Mt.4:10

A sullam cu a pennâk le dinnâk kha kawl hmasat ding tinâk a si.

Khuachia nih a kaltâk...vancungmi a ra...Mt.4:11

A sullam cu zuamcawhmi Jesuh nih zuamcawhtu Sehtan cu țial ciami Cathiang hmangin a tei cikcek tinâk a si.

Jesuh nih țial ciami Cathiang kha tluangtlam tein a lâk ko. A background e, a context e, a theology e, a sullam e, Lai khal e, Mirâng khal e, a tinhmi e a ti lo.

A ngai ngai ti ahcun Jesuh cu minung tling a si lio ah Pathian tling zong a si i a chimmi pauh kha Pathian bia a si dih.

Asinain Jesuh nih debate a zuamcawhtu Sehtan teitu le teinâk ah bia thar a hmang lo. Țial ciami Cathiang kha tluangtlam tein a hman.

Kei zong nih debate aka zuamcawhtu Salai Samuel he kan i debate tik ah țial ciami Cathiang dah ti lo cu zeihmanh hman ka tîm lo.

Like le commen tuahtu cheu khat nih ziah Pathian pakhat ah Mi pathum, Pa, Fapa le Thiang Thlarau a dang cio in an umnâk Baibal cacâng hmun 12 ta kha na țial lo, tiah an ka ti.

A lehnâk cu "kan i debate rih lo cu teh' ti a si ko. Nannih like le commen a tuahtu cu debate aka zuamcawhtu nan si țung lo.

April ni 29 Bawipa ni zanlei suimilâm pakhat hnu ah țial ciami Cathiang kha a dal le a câng le a bia tiang in ka lâk lai i Pa le Fapa le Thiang Thlarau hi zungzal zungzal in Pathian pakhat ah an rak umnâk kong kha ka chim te lai.

Teinâk le teitu cu "ȚIAL CIAMI CATHIANG LAWNG LAWNG" a si te lai.

Dawn Khua Primary Sianginn saknak ding caah MMK (Sing 200) a cozah nih a bawmh hna.

Thawngpang thar
Dawn Primary School nih Bawmhnak MMK 200 sing (Nuai 200) an hmu.

Dawn primary school tharsaknak ah a tu bantukin sing 200 senson a si tik ah, kan mah laimi chung in contact an lak i a hmunhma hi a tu primary sianginn thlang rawn ah khan Sing 6 dihin an cawh hnu ah, Primary sianginn kai mi nulepa nih a hmuhhma an duh lo i complaint nak an tuah i a si ahcun a hmunhma, nan duhnak i thim u la nan mah thazang in i cawh  uh an ti hna i khua nulepa nih le an i cawh khawh fawnlo caah  Saya Kyi Muan Awm le Khua bawipa zungnih an auh hna i cunglei nih nan mah thazang tein nan duhnak hmunhma i kawl u law i cawh an ti hna i kan mah nih cun kan i hmunhmathar cu kan i cawh khawh lo an ti hna i a si ahcun, an cawh cangnak ah sa ko uh an ti hna.

Mah sianginn hi building in sak ding a si i a thilri vialte contact la tunih rin viar i a sak lawng ah sing 55(nuai 55) an thap i khua minih mah contact hi an lak ngamlo caah April 8 thawk in lungler nih contact an lak i sak a si cang lai.

Kan myanmar cozah zong duhsah tein, khua te lei sersiamnak rian a tuan cuahmah ve cang.

Baibal debate

Pathian pakhat ah mi pakhat, Jesuh lawng lawng ah a tling,  Pa a dang  tein a um hlei lo, tiah a titu Salai Samuel nih:-

Pathian pakhat ah Mi pathum, Pa, Fapa le Thiang Thlarau a dang cio in an um ko, tiah a titu Rualuk:-

Baibal debate dingin a zuamcawh i

"Aw, si seh"

tiah ka rak timi hi Pathian hnatlâknâk a si lai. Zeicatiah a hmunhma le a ni le cân zong tlam a tling dih cang.

Felfai tein record zong tuah i Live i thlah dingin Hakha Post zong timhlamhnâk felfai tein an ngei dih cang.

Chair Person, asiloah Time keeper a kan țuanpiaktu ding zong tlam a tling cang.

AG pastor Rev. Mang Peng a si lai.

Thaizing zingkâ ah i hmuhtonnâk kan ngei lai i debate tikah cân hman lainâk kong he pehtlai in ceihmainâk ngeih a si lai.

Minit zeizat veve in dah an chim lai timi le bia an i hal veve lai maw timi le zapi teh  biahalnâk kan onh lai maw timi te hna le a herhmi dang dang ceihmainâk kha ngeih a si lai.

A hmun.....CACC Hall
A ni............ April ni 29, Zarhpi ni
A cân.........Zanlei Suimilâm pakhat

Ram chung le Hakha khua chungah a ummi cu a duhmi pauh i tel khawh a si lai.

Debate dih ah cun Baibal Cathiang cawnpiaknâk in lam a pialmi cu a fiang bak lai.

Zumh duh le duh lo tu cu phun dang.

By
Evan Rual Uk

Baibal ah voi 50 hrawng Pathian pakhat timi a um chan.

Baibal ah voi 50 hrawng Pathian pakhat timi a um chan

Evan. Rual Uk

.

Miphun caah a thîmmi Judahmi le a ro cotu ding ah Fapa Jesuh thisen in a kawh i Thiang Thlarau in a thleidanmi a Kawhhran (Khrihfabu a si lo) cu relcawk hmanh a si lomi milem pathian umnâk Vulei ah an um ti hi Sertu Jehovah Pathian nih fiang tein a hngalh.

Cucaah A hawikawm Moses le A profet hna le A Lamkaltu hna hmangin atu le atu Amah lawng lawng Pathian a sinâk le a dang an um lonâk kong kha Voi 50 reng lo a rak chimh hna.

Cucaah Pathian pakhat timi voi 50 reng lo Baibal ah a ummi hi Pa, Fapa le Thiang Thlarau Pathian pakhat dah ti lo, rel cawk lo ser chommi milem pathian pakhat te hmanh a umlonâk VAN LEI HOIH IN CHIMMI A SI BAL LO.

Kum zali chung sal ah an tân hmun Izip ram le an ca ah pekmi Kanân ram cu serchommi milem pathian tampi umnâk hmun Vulei a si caah Pathian pakhat timi voi 50 reng lo Baibal ah a chimmi hi cu serchommi milem pathian umnâk VULEI HOIH IN CHIMMI A SI.

A ngai ngai ti ah cun hmaisa bik le a pakhatnâk zong a simi Pathian pakhat timi kong a langhnâk Nawlpekțhânnâk (Deut) 6:4 i Mirâng ah ONE a timi hi Gen.2:24 ah ONE timi le Gen. 11:6 ah ONE timi le 1Kor.3:8 le 12:13 le Johan 17:22-23 hna i ONE a timi he â khat dih.

Pakhat nâk tam lawng te an si nain PAKHAT (ONE) a ti dih.

Gensis 2:24 i Adam le Evi cu pahnih an si ko nain taksa pakhat tiah a timi bak kha Matthai 19:6 ah Jesuh nih "Cuticun pahnih an si ti lai lo i titsa pakhat an si cang" tiah a timi kha țha tein rel law ruat hmanh.

Nu va a simi mi pahnih cu MI PAKHAT (single) ah an cang tak tak bal maw?

A dang tein a ummi mi PAHNIH a si pengmi nu va kha pei PAKHAT tiah Jesuh nih a ti cu.

Cucaah MI PATHUM a simi PA, FAPA, THIANG THLARAU a dang cio in a ummi kha pei Baibal nih Pathian PAKHAT tiah a ti cu.

PATHIAN PATHUM A SI LO.

PATHIAN PAKHAT AH MI PATHUM A SI.

NU VA PAHNIH KHA TITSA PAKHAT A SI BANGIN

PA, FAPA THIANG THLARAU MI PATHUM KHA PATHIAN PAKHAT A SI.

Cucu Baibal nih voi 50 reng lo Pathian pakhat a timi cu a si.

Jesuh lawng lawng Pa dang a um lo tinâk a si lo.

A dang cu debate tik ah ka chim te lai.

Hmanthlak 22|4|2018

Camera thar an lomhnak

ZEI SET DAH KAN I ÊL LAI?

Evan Rual Uk

ZEI SET DAH KAN I ÊL LAI?

Pathian pakhat ah Mi pathum Pa, Fapa le Thiang Thlarau kong fb ah ka țialmi a rel i like le commen a tuahtu u le nau vialte hna nan cațialmi ka rel tikah Salai Samuel he kan i êl ding hi zei set dah a si tiah a hngaltu zong nan um bangin a hngal lotu tam deuh dawh nan si. Cucaah fianter a herh ko tiah ka ruah.

Cathiang nih a chim bangin Pathian pakhat lawng a um ti hi za ah za ka zumh.
Cun
Cathiang nih a chim bangin Jesuh hi Pathian a si tiah za ah za ka zumh.

Hihi Salai Samuel zong nih a zumh ve lai tiah ruahchannâk ka ngei.

A si ah zei set dah kan i el lai?

Kan i el ding cu:-

Salai Samuel nih Pathian pakhat ah Mi pakhat lawng lawng a um. Cucu Jesuh lawng lawng hi a si tiah uk 66 a simi Cathiang hmangin a fianter lai.

Kei nih Pathian pakhat ah Mi pathum an um. Cu hna cu Pa, Fa, Thiang Thlarau an si i a dang cio in an um tiah uk 66 a simi Cathiang hmangin ka fianter lai.

Kan i el ding tak tak cu cucu a si.

Sehtan le Jesuh an i debate lio zong ah Sehtan nih Cathiang chung Sam 91:11-12 kha a lâk i Jesuh zong nih Cathiang chung Nawlpekțhânnâk (Deut) 6:16 kha a lâk ve.

A donghnâk ah Jesuh nih hmun thum ah a lâkmi Cathiang hmangin Sehtan kha a tei.

Salai Samuel nih uk 66 a simi Cathiang hmangin aka tei ah cun 'Haleluijah' ka ti te ko lai.

Cun kei nih uk 66 a simi Cathiang hmangin ka tei ah cun 'Haleluijah' ti te ko seh.

Zeicatiah Cathiang nih a teimi si cu minung caah thluachuahnâk ngan bik le duh a nung bik mi a si.

Cathiang nih a tei lomi minung si hi pei chiatserhnâk ngan bik le țih a nung bik mi a si cu.

An i hua lai! An i ral lai! Bu khat le bu khat huatnâk le ralnâk remlonâk a chuahter lai! Țhathnemnâk a chuahter lai lo tiah a titu vialte hna nan lungput chiatkhât ning le țhatloning kha nanmah tein nan langhter mi a si.

Minung caah a țha bik, a sunglawi bik le a biapi bik cu Cathiang a sining te theih le hngalh le i nunpi le i thihpi hi a si.

Relremlonâk dang a um lo ah cun hmai Zarhpi Ni (April 29) ah CACC Hall ah Pathian Biatak theih le ngaih le hmuh khawhnâk cân rem a um te lai.

Relremlonâk a um sual ahcun theihter nan si te lai.

Thiang Thlarau bomhnâk kha i bochan in

Evan. Rual Uk

Thiang Thlarau bomhnâk kha i bochan in Baibal Cathiang hi țha tein na rel i na dothlat tak tak ahcun:-

Pathian pakhat ah Mi pathum chungin Mi pakhat a simi Thiang Thlarau cu:-

Thlacampiaktu le Bawmtu si dingin zûmtu thlarau he an i fon i zungzal ca in zûmtu chungah a um

timi le

Pathian pakhat ah Mi pathum chungin Mi pakhat a simi Fapa Jesuh Khrih cu:-

Amah zûmtu a simi caah Nawlpiaktu si peng dingin van ah Pa sinah, Pa bawițhutdan ah a țhu

timi le

Pathian pakhat ah Mi pathum chungin Mi pakhat a simi Pa cu:-

Thiang Thlarau le Fapa Jesuh Khrih nih zûmtu caah an nawlnâk kha ngai ding le a herhning i tuahpiak lengmang dingin thihnâk in a thawhtermi Fapa Jesuh Khrih he van ah an um

timi hi

Fel le fiang tein na hngalh lai i cuka ah cun kâmlo châncha bangin na dir ko lai.

Zeicatiah hihi lei le van a rawh hmanh ah zungzal in a hmun ding a simi, a palh kho lomi Cathiang cawnpiakning a si.

Pathian nih rem a ti i Salai Samuel he Baibal ceihținâk kan ngeih ah cun hi țhiam țhiam hi a Baibal cacâng he ka chim te ko lai.

Zumhnâk kilvêngtu zong a simi mithiang Paul nih cun,

"Kanmah kan si zongah, vancungmi a si zongah kan in chimhmi hna thawngțha he â dangmi thawngțha an chimtu hna cu, hell ah tla ko hna seh" tiah a rak ti.
Gal.1:8.(Lai Baibal Thiang zoh)

Zumhnâk kilvên rian hi Pathian nih akan fial i țuan kan i timh a si ahcun a palh khomi leicung minung hmai lawngah si loin van i a ummi vanmi hmai zongah a palh kho lomi Baibal Cathiang hi dirpi a herh lai.

Pathian pakhat ah Mi pathum, Pa, Fapa le Thiang Thlarau a dang cio in an um tiah a zûmlotu nih cun a dang tein Baibal an ngeih dih.

Evan. Rual Uk

Pathian pakhat ah Mi pathum, Pa, Fapa le Thiang Thlarau a dang cio in an um tiah a zûmlotu nih cun a dang tein Baibal an ngeih dih.

Pakhatnâk ah cun Judah biaknâk a tlaihmi Judah mi an si. Yahweh Pathian le Thiang Thlarau cu an pom ko nain Yahweh nih a thlahmi Yashua (Jesuh) an zumh lo caah Biakam thar Baibal uk 27 hi an cohlang lo i a dang tein Baibal an ngei.

Pahnihnâk cu Islam biaknâk â tlaihtu Muslim hna hi an si. Zeizong vialte sertu Allah Pathian a um ti kha fek tein an zumh. Biakam hlun i Abraham le Profet te hna zong ah zumh i Jesuh zong profet pakhat ah an cohlân ve. Asinain Jesuh Pathian a sinâk cu an cohlâng duh lo. Anmah tein Baibal Koran timi an i ngei i cucu vancungmi nih Mohamet sinah țial cia bak in a chanhmi a si tiah an ti.

Pathumnâk cu Jehovah's Witness tiah â timi hna an si. Jehovah Pathian le Thiang Thlarau huham le țhawnnâk cu an pom i Jesuh cu Jehovah sermi pathian pakhat a si tiah an ti. Cucaah anmah tein Baibal an i ser ve i New World Translation tiah an ti.
Johan dalkhat câng khatnâk ah "A hramthawh ah Bia a um, Bia cu Pathian sinah a um, Bia cu Pathian a si" timi khi "bia cu pathian pakhat a si", tiah an ti.

Atu lio fb ah cațialtu Laimi cheu khat nih "Pathian" tiah țial ding a simi kha "pathian" tiah an țialmi khi Jehovah's Witness hlah maw an si tiah ruah sual a fawi te.

An nih zong nih a dang tein Baibal an ngei.

Cucaah Pathian pakhat ah Mi Pathum Pa, Fa le Thiang Thlarau a dang cio in an um ti hi na zumh lo ah cun a dang tein Baibal na ngeih a herh te men lai.