Zeizong zaa a dai i ka Nu aw zong a dai ve!

A sang bik van ah khin.
An ceu fidi le thlapa.

Sermi thil vialte nih, an caan cio an hlam tawn.
Hmanhseh, nang bal zeitik tianghme tikcu caan ser lo'n.
Na len rualhawi sin in, na bau rih lai?
Ngaihnak biazai phai le, sunghno na chuahsempi ruun inn tang dai in kingriang mang in saal nun na hluan kun rih lai.

Maw... sian lo fa dawt aw!
Kir caan a cu cang.
Nang zuun ngaih in, kan lilennak nikhua caan a rei zo.

Tiktu caan nih hin, kan lileennak vialte duhsah tein a liampi ko lai tiah ruahchannak nganpi kan ngaih lio ah, kan i ruah bantuk in zeizong vialte hna hi an sithlu ko lo.

Tu kum Christmas le bang cu, Iang tawi te chungkhar nih an tuah lai. Zingzaan in Iang tawi cu kan inn a pal kai lengmang Iang tawi ka hmuh ko ah hin ka celh tawn lo. Aw... Nan hngakchiat lio i kan dum thei nan rak tawh lio ka thingphur tlun he aa tong ngelcel kan rak vuak hna kha duak tiah ka vun hmuh than i kha lio caan hna kha ka ngai i a caan ahcun, ka ngaih hna a chia pah tawn.

Ka lung si vangh caan ah hin zei ti awk theih lo ah, in khan dal chungah ka lut i thla ka cam tawn na pa n'h hin le a fale kong a ruah caan paoh ah hin tihin a um tawn a thluak dactor sin chek ter a hau lai ti tiangin kan inn a leng kaimi sin ah biasi a phai leen hna.

A taktak tiah cun, na pa tu hi a tuar kho lo deuh cu a si. Iang tawi te inn in phone nan van kan chawnh caan zongah a ra tuk bal lo hi, ka hna a tha lo a tihter i a si naisai lo, nan kan chawnh ah hin kan i lungumuih tuk tawn i na pa le bang cu inn ka tiin le cangka in bia hmanh ka ruah ngamtawn lo an ngaituk hna i hawn kir cang uh kan in ti leen ko hna nain hi kaa t'ang kan phak lawlaw cang a dihdongh tiangin kan hngah a hau ko nan kan ti hoi than. Ka fa na nulepa nih nan caah kan in duhpiak bik hna cu, na caah a tha bik in thil hi si viar seh law, nan saduhthah mi a tlamtlin khawh kha kan nih zongnih kan in duhpiak cemmi hna a si ko.

Zu-et-e e nan tileng mangmi zonghi va phan kho u law ti kan in duhpiak mi hna a si ko nain, nan nulepa zong kum upat lei kan phan cang i chun hlan minung kan si cang. Tangka nan kan kuat mi zong kan duh tuk ko, cun nai na pi le pu lung nan van phunmi zong kha ramdang ahcun um hlah u law nan nulepa nih cun zeitik hmanh ah kan phunpiak kho dingmi a si lo. Si nain kan chungkhar caah nan tuahmi le nan i zuamnak vialte hna, tangka nan kan kuattawn mi hna hi kan duh lo tinak a si loin, nan nulepa nih kan duh bik mi cu hawn tlung u law hmun khat teah khua sa ti hna u sih law hmun khat te ah lairel ti hna u sih ti hi kan thih hlan ahcun kan duh bikmi a si.

Nai cu ruah lo ding hna ka ruat len, zang lei rawl kan ei lai ah, iang tawi nih a kan leng i, fei buk in ti i nan hman thlak a kan hmuh i na pa he cun rawl zong ei thiam loin, a phone cu kan zoh i kan rawl ei hna kan tloh viar.

Hello...... Helllo..... Myanmar phone line chiat ning hi cu aw...

Zeizong zaa a dai, van a thiang i
Fidi le thlapa an ceu.
Kanbuk pong ''thainu khat'' bal te lunglen hram a thawk ceo khi asi.
Tiva pi lei hoih in kan rawl einak cabuai cungah ka to, daitein zaan boruak thiang tangah khuangbai hramthawng nih Christmas caan kan naih tuk cangmi fiangte in a ka chimh.

Chim thlizing n'h kan buk tivapi kuang cu kik zialmal tein duhsah te khin a van hrawn ziahmah ka suimilam 2:30am a rak si mah i buk chung ahcun uai ngai khi ka kir than.

ZAAN ṬIM MITTHLI

  

  A liam lengmang mi caan sinah “Senri” he zingnu lairelnak thawngin dawtnak ni le thla, khua caan kan  kan relnak hi a sau ve ngai cang.

 Ho van hai loin nang lawng tiin, cuticun nuam ngai le ruah channak ngan pi he caan a sunglawi tuk mi caan kan hmang ṭi. Ka tleih chan, ka dawt, ka duh tuk fawn. Cuticun, dawtnak cu kan pahnih kar lak ah ṭemṭawntu hri ah hmangin vuleipi theih ah pahnih si ti loin pumkhat kan hung si. Kaa ruah chan mi vialte le ka saduhthah mi vialte an tling dih cang tiin ka khupṭhi rual hawi sin ah phailen cim loin ka kaa a rak thaw kho hringhran, ṭhen lai cu chim lo a ruah hmanh kan rak  ruat bal lo. Caan kar lak i hmuh lo hmanh kan rak celh ruam lo. Hi vulei cung hi kan caah arak sunglawi kho tuk.

 Kei hi pa deuh ka si ko na tein ka unh caan a tam deuh i lungsau tein a rak ka hnemh lengmang, unh duh ngai ṭungah cun hnemh fawibik ka si lai dah, cun kei hi biachim holhrel phun ah cun a thiam lo ngaimi ka si. Ka duhmi hmanh ṭhate le bia dawh tein a chim thiam lomi ka rak si ko nain “Senri” nih cun ka um tu, ka hawiher le ka mit au in, ka duhmi vialte a rak ka thei thiam piak dih. Kei tu nih cun ka dawtnak tilo cu a tu tiangah hin thil ti piak mi zei hmanh ka ngei rih lo, ka philh khawh lomi thil pakhat te a caah ka rak tuah lengmang mi cu zan kan ih i zinglei kan thawh hlan te ah hin kan dawttuk “Senri” tiin a cal ah holy kiss ka rak pek tawn. Cucu a hrangah thil pakhat te ka rak ti piaktawn. Ka dawttuk timi hi a hngalh ko na tein na ka daw maw? timi bia halnak hi a rak ka pek lengmang tawn, atu hnu ka van ruah ṭhan ah hin kei nih kan dawttuk karak ti tawn mi biate kha ngaih a rak cim lo bia asi timi hi ka hna thlam ah a cuang zungzal, cun, kei mah zawngnih zei tluk in dah ka rak dawt le a mah tel loin ka nunnak hi zei hmanh a si lo timi hi ni chiar in ka nunnak ah a thar in ka tem zungzal. 

Cu ticun, i daw ngai le i duh ngai in khua caan kan rel lio ah cun zing atam zaan atam caah ruah lopi khin hnu lei her in ṭhennak lam lei ah a kal thluahmah ko e. Hi vuleipi ngai hi dah sian lo zongah zei santlai lo ṭah len zawngah zei santlai lo ti phun khin a mah kal ning tein a kal ve lengmang. Senri cu a zungzal in ka ngai, ngaih lo awk pei a ṭhat lo fawm cu ka zei zawng vialte, ka ruah channak, ka lungpi le ka hna ngamnak pei  asi fawm cu tiah. Khupṭhi rual hawi hna bel an dawtmi hna he nunnak dot hnihnak lei ah sempuak cawi in hovan hai lo nuam chialmal an len ṭi zawnah ṭhennak lo hma lei ah na ka kalpi. Ka hmur, ka lei le dang hna nih kan philh in ti hna hmanhsehlaw ka lungthin tak le ka um tu hawiher hna nih cun kan philh khawh lo le kan dawt zungzal timi hi an langhter zungzal. Zanmang chia bang ka hlau neh zungṭhing hna nih an hmun kei ka sin ah. Sunghno ka nu chuanrawl hna hmanh an thlum al kho ti rua lo nang tel lo ngai cun. Ka lung dongh caan ah ruah channak a ka petu ka lungre theih vansan lio ah a ka hnem zungzal tu nang bel nih cun neh bang khrih ṭhan ser hin loin ee.. A kuaimi thlalang hrai bang kuai dih a zal kei thinlung. Na duhmi paoh a ṭha na timi cu ka cungah hin tuah ko asi nabeltein ṭhennak hlei bel kan kar lak ah ka donhpiak sawhhlah tiin kan nawlnak bia le hla hna kha ṭio tichum bang van ah kai in an lo dih ai rua. Nang thlimnak dingah kei siangṭang hna le sawm ai ha hi an hme tuk sual rua.

 Tintling cung i khua zaza ruat in tuar a har ngai mi nang zun cu kei thin lungah thin lung in mit ah mit in avan luang thluah mah mi mitthli hna hi nang mah caah khawn mi pei an lawh hi. Hi ngaihnak mitthli hna sin i ngaihchiatnak hmun “mui” hi mui padap lak ah hin khua caan rel ko cang ning law mui seh mui ngai sehlaw  nang mah zawng in hmu kho lo tiang in muiseh. Cunticun nang zawng a zuang lengmang mi va bawng na duhnak hmun paoh ah zuang ai kun law. Cungzing nu tu nih ṭha ati si cun caan rem kan serpiak te seh. Kei zawng nang mah tel loin nun khawh kai zuam ve cang lai, tuzan ah hin ka mitthli hna ni hnawt cawk hlah hmanh ning law thaizing ah cun tla ṭhan ti ko dingin ka ven zungzal cang hna lai.

             Zan tlai thlapa nih hliah tu ngei loin a dawhnak vialte a chuah.

 Maw… Zan thlapa aw kei thin lung chungah faktuk in ai chun cang mi “Senri” ka dawtnak vial te hi la bang ka zelh piak ko law tiin nawl lenser hmanh ning law an kaa leh thawng zei hmanh a um lo. A kingtuk khuangte rit awnh thawng dah ti lo cu zei thang hmanh a leng ti lo. A tlai tuk cang ko rua, tintling cung ah merem thiam lo khua zaza ka ruat kham len le thlauh len zawngah zei san a tlai lo nang zunngaihnak mitthli hna cu lenglei hoih in an luang thlauh mah a luang thluahmah mi mitthli hna le hin maw zan khua ka dei ṭhan hawi ne lai.

 

Hi thluk remruam kei lungfak in ka ṭuarnak le ka hramnak vialte hi”Senri” thei thiam in neh bung khrih ṭhan um te hnga maw???
Maw harnak ram…..
Duh thlin lonak le….
Ṭhennak ram nasi VULEI: 
20/10/2015C L Thang

CO KHAWH LO NANG ZUNGTUAR FAH HI

                                                                    

 2007 Febuary12 zanlei zong cu, voidang bantuk in zanlei ni nem lawmṭhan dingin ka hawi pa he thlang lei sangah cun kan hei zuang kan lungrawn zalam ah cun cheu khat hna cu vollyboll an rak beng luh malh ko. Ka hawi pa he cun kan hei zoh ve hna i cheu khat an dawt mi he zalam an hrawn zanlei ni nem an lawm hna kan nih zong cu vollyboll kun kam ah cun kan hei ṭhu ve zanlei ni nih liam aizal cang ka hawipa nihcun kan tṭn pah cang hnga maw, a hei ka ti ka vawn tho lai ka ti bak ah khin khua ka hei zoh zawn ah khin, khat lei ah thin lung vialte amir in amir tertu lengnu dawhte cu an inn ka ah khin a hei mang ko kih ka hei hmuh!! Amah nu cu ka ti le ka nunnak le ka thinlung nih a hlamkhi ai ruang cawlh ko!

A nih hnianghniang hi chaklei thantlang ah sianghleirun kai mi arak si ka mit cun ṭhep lo te cun ka zoh peng,  tlawmpal ah cun an inn chungah cun a hei lut cawlh kan sanglei ah-cun ka hawipa he-cun kan hei kai. Duhnak timi hi theithiam a rak har ko, kan nih hna caah cun mah zan lei thawk cun ka ruahnak le ka thinlung ah hin donghngal hin ti lo-in a mah lawngte cu a cam cang ko ni caan cu dinlo tecun a vawn kal liah mah kan nunnak zawng cu nile-caan nih cun a kalpi ve thluamah Hnianghniang hi ka duh ti hi, chim ninglaw zeitin an ka tih hnga ti lawngte cu ka thinlung ah cun ka buaipi cemmi cu si cang kawh! Mah cu lio can ah cun, Lai khuatet cakuat uar lio cingling cu va si kaw cakuat tal in ka duhnak hi chim ko ning ka ti ka hawipa he zaan mi reh cu kan vawn i bawm i cakuat ṭialhram cu kan vawn i thawk.

 Dear… Hnianghniang

ü  Na sinah duh dawtnak cabi te ka vawn ṭial ka ca nih na thinlung anhliam sual a si ahcun na rak ka ngaihthiam lai mu…

ü  Pelep te cu a nunnak dihlak le a ruahnak dihlak in tlangza mual liam in nang lyly par dawhte kan kawl ee, Lyly par tizu dop dingin rak i zuamve ninglawn na anka ṭha leh um hngak maw? Chokhlei par zawng khi zingdap ti nih a cawm loh ah cun aa dawhnak a chuakpi khawh loh bantukin kei zawngnih na dawtnak tel lo ah cun, ka nunnak hi zei hmanh santlainak a ngei lo e..

Ti ka vanṭial i ka hawipa cu, nang thaizing ah na ka pekpiak lai mu ka hei ti aw a hei ti zaan cu zei tin a ka tih hnga ti ruah in zaan khua ka dei, thaizing ah cun ka hawipa nih cun a hei pek a mah lei cun zei lehnak a um loh kei nih le ṭhal caan nih ni chiar ni lin a zual chin leng mangbang ka duhnak cu a zual chin lengmang ve ṭhal can a si bantukin awllen lio can cu ka hawi le nih, Paral le Patluang nih mizo ram tal ah awllen chung i hlawh ah kal hna usih ca, an kati i  kal dingzawng si ve ko ka hei ti hna, Hnianghniang aan ka tawn ta lo kal ni le ka sia a herh ṭung si nain  ka tawn ahcun kal loh hau dawhdang a si caah, ka hei ithawh vetop.  Kan kal pah cu a mah lawngte cu ka ruah khawh kan khua hi hmu ṭhan tilo dingtluk ah khin kai ruah kan hei kal zaan lei sangpi ah Hngarchip kan hei phan kan chung le inn ah cun kan hei i ṭhum i hlawhnak um hnga maw? Kan ti, van ṭhat ngelcel ah hngarchip khua hlun an VCP Zonuna nih saiten cawh ding a rak ngei ngelcel a thaizing cu a riak in pawk cwlh ko u sih kan ti Cerhlun le Tarpho i kar ah khin a si rian cu kan tuan hna kan i nuam ngai ko hna, sina belte in ka thinlung dihlak cu ai nuam kho loh Hnianghniang kha zei tin si lai tilwngte cu ka ruat ko thlakhat kan tuan dengcang kan um deuhdeuh lunglen le Hnianghniang ruah nih a fak deuhdeuh Hnianghniang te siangiin kai kal a zaa dengcang ti nih le thinlung nih cun a theihfawn kan ṭuan mi le kan lak lawh zaan khat cu thlapa lai zaan kan ti cu si kaw, kan pu ṭingṭṭng hei kan phur kan ti a vṭwn kan phurmi cu rawl ei khim thlapa chak tlang a vawn man ah  kin ṭingṭang cu kai van lak i kan riahbuk in pin deuh ah khin ka hei kal i kan thing tihding cungah ṭhu in dinnawn tein ka ṭingṭang cu ka van cheih.

Koi Hmung phua mi hla :

 Ni le thla ka rel tawn zoram ser tlang phei hrawn ah,

 zanmang ah dawt hniang cu ka tawn tawn,

cerlian ni liam tuan law, Dawthniang ton lonak a sau cang

lungrawn khua khir lai ni le thla ka rel tawn.

 dawt hniang ngaih a zual chin zoram in

 Maw lunglen le zoram dang hram hi

ram um cinrang tlerlung huho tiang in

 rung awn atwn hna kei bawng lileng in

A kan phenh mual le tlang cim law kan chuah tlang lang in,

 dawtmi sam thlai rem te lang hnga maw?

hei cuan lang lung ngamnak dawthniang mi za tial tlei can ah

 a lang rua lai lo khua chin tluang dang cun.

ka cung kai ṭiava tal biazai cah lang lungrawn ah

 va zuang law hiti hin na vang ti lai

Santlai lo valpa cu hmui zum thirfung sabul he

ngun tang ka a kawl tiah vang chim law.

Tih cu ka van tawngh cun ka hawi le pawl cu ka kam ah cun an tur len ko, ni le can cu a vawn liam kan nih zawng kan rian ka vawn dih kan khua lei ah cun tlun cu kan vawn i thawh ve kan khua phak lai kai ngaih tuk ah hin um awk cu ka hngal ti lo, zaanlei ni nem tlang a liamaa zalh cuah mah lio caan ah kan khua cu ka vawn phan Hnianghniang a kal cang hnga maw ti lawng te cu ka thin lung cun ka vawn ruat tlawmpal ah kan in cu ka vawn phan.

BY

Mampui

Pehnolh ding.

Țhal Khua Pau.

+++++++++++
Hmaw carau in, zaihla dawh ka theimi ka cang le ka mang hmanh a si theih loin, khing ringmang in a kui mi aw dawhte cu, ka theih belmi aw a lo ko e... tiin, mitkut vuai lo ngai khin, ka ihnak hmun cun ka ţho, a maa hlei lo a fiang deuhdeuh ka mit cu ka van i hnuai i ka itnak kam darthlalang cun, zing ni cerhnih a van ka hlauh! Suimilam ka van zoh i laikhua teah cun, thawh a rak zaa diam cang.

Hmaw carau loin ka theimi awdawh te cu, țha tein ngaih kaa timh ah khin, daidap in a reh ţhan kan inn kam sanseh khulh-khulh... tiin, awnh hram ai thawk ka hnak a ka doh ngai zeidah asi hnga tiin chikhat te cu, ngangko in ka ţhut hmun cun, riiva ngai in ka um sanseh aw thawng lo cu zeihmanh ka thei tilo, ka van tho i ka hmai kaiphiah khawh in, inn thlangah zunzun ah ka hei kal.

Ka zun dih cun, kan dum chungah ka heipial pah kan dum chung tisik anhnah kan cin mi tete cu, zing ni ceu nih a van kah hna i zaan ah dapti nih tlawmpal a rak cawmhna caah dapti cu lei ah an tlarih lo, ka zoh i tleu dildel tete khin ka hei hmuh hna. Hmaw carau in ka theihmi aw kha: ka hnak a ka dohpeng rih zeidah si hnga ti lawngkhi ka ruat a si nain ka thei kho fawnti lo.

Kan khua lu tlangcungin duh sahtein a van kai liah mahmi chun uktu ninupi cu duhsah tein a sang lei a van panh ziahmah ko khi ka hei hmuh, ka zohnak cu tlanglei deuh ah ka mit ka van țhial ţhan i khuasik cu a dih tuk rih lo ti a langhter tu, Ţio chum cu maw chilchal tein le dawh ngai in Ţio kuang cu a van zamh lul ko khi ka hei hmuh.

A zaam lulhmi cu zingceu dawh nih a van kah chih ko khi zoh ka cim hrim lo chikhat te cu cawlcang khin ka khuaruah a thawtuk mi hna khi ka lo. Cung deuh ah ka mit ka van țhialţhan i fiangtuk loin a langmi mizoram inn tete cu an i cerh len khi ka hei hmuh.

Maen.... rawl ei a zaa cang rawl ei kan tuah lai tiah sunghno ka nu a ka auhnak cu ka van theih, duhsah tein, ka kar ka van hlang inn chungah cun chikhat te rawl an tuah chung kan sofa cungah cun ka to.

Kan in pawng sanseh zawn a rian ai liim cangrua aidin ve, hna a thiang ngai cang, kan cabuai duum tleu lal in a ummi cu kan chungkhar cun kan van kilhna. Țhial caan a neih tuk cangti cu kan din eimi kan dinhhang le kan meh hna nih an van langhter khun.

Biazaa kan i ruahpah cun, tunii zeidah ka tuah laitimi cu ka hei i ruat pah rianţuan awk a umlo lio caan te asi i ka nau le zong an sianginn in an i dihka te asi, ka nau a hniangcem dottu nih meh lo rawl ei cu a hartuk U Uu... Tuni cu ram ah vak usih ca mehmua kawl usih caa a vanti a poi lo kalding asi ko, tiah ka van tii i rawl ei hlan ah tamlak te a ţholhţhang a hlummi cu a tho zau i meisalak ah cun, thirpheng in a van reo cawlh i a rawl ei cu a vanpeh ţhan, rawl ei zong chung a pil khohrim lo ka Nu nih nan cau awksual lai ati i chawncaw a kan funh i mehfunh awk aumti lo i ka pi thanthling a kan funh. A hau lo ti ka duh nain, ka nau le zawt ka ruatţhan i ka holh ţhan lo.

Pehnolh Ding

• KA SIAN LOMI KA MITTHLI

Part 1

Tuanphung ah an phai ṭheu tawnmi zingnu “Samhrisih” timi hi a um lai lo tiah a pom vemi ka si hoi le komh hna he biasawng tlawrh caan zongah. Mah biahalnak hi ka hmai kaah a chuak caan hi a voitam cang bantuk in ka lehnak hna zong kei cu “Zingnu Samhrisih” timi cu ka pom bak lo a um hrimhrim lai lo tiah ka bia lehnak asi tawn. Nang na pomve maw/na zumh mi a si maw?

Nu ngak/Tlangval kan sibantuk in khat le khat kar ah duhnak le uarnak ai semning hi, pianthar he ka lawh ter a si nain minung cu kan i lo cio lo ti hi theih hmasat ah aṭha. Dawtnak hi ruah setmat pi in maw a chuah tihi biahalnak um sehlaw, iruah ciammam hnu ah duh dawtnak hi ai semmi a si kan ti cio hnga I a palh zong kan palh lai lo.

Sihmanhsehlaw uarnak, duhnak, dawtnak tbt hna hi cikhat loah a rami asi kan ti khawh hnga i a tonzong kan tawn cemmi asi ko lai, kan uar hna ah le kan duh hna hnu lawngah kan duhdawtnak cu kan uarmi le duhmi sin ah kan duh dawtnak kong kan phuan  cu ti cun khat le khat  kan lungthin kan i chimh hnuah kan i theih thiam hnu ah hna ngam tein duh dawtnak zalam kan zawh ṭi. Cuti cun, i duhmi kan si hnu ah inn chungkhur khar tiangin kan ser khawh. Duhnak le uarnak timi cu cikhat lo ah a ra i kap hnih hna tlaknak le lungtlinnak in Duh dawtnak taktak kan tem caah  duhnak le uarnak hna hi pianthar he aa lo ka tinak asi.

2005 March 3 ni ah ka thinlung chungin Nungak a hlam hmasat cemni le caan hi cu ka cin pengko. Kan sianginn kainak in kumpi kum khat adih deng cang hi ka thinlung nih a hlam mi Cer Ku zonghi a hlan zongah a kom ṭimi kan si tawnnain hi ti ka thinlung a hlam belmi zong a si lo i hi bantuk in ka hlam te lai timi zongruah channak ka rak ngeibel lo sihmanhsehlaw hi ni le caan theng te ah hin sianginn khar cang ding kan si caah sianginn rian kan ṭuanṭi hna cunak cun, ka thinlung chungah hmunhma faktuk in a la i umzia hrim ka thiam colh lo! A voi khatnak asi ve cu mu, Cakei!! Cu ni thawk cun, zing, chun zaan in Cer Ku rumro cu ka ruat i ka mithlam ah a cuangcang sianginn kharpi kan vanphan. Cucun, helh hram kai thawk i hngakchia cu ka va sirih kawh midang chim lo ka hawi le zongnih an ka theih sual lai ti ka phang rih cu mu.. ka thin hi!!

A mah lila zong cu, cu ni thawk cun, ka zah nain ka uartuk mi Cer Ku sin ah cun ka duhnak kong chim le phuan lo ah cun, tleu! dingphun khi ka si cuh! Zaan khat cu vanṭhat ah kan khrihfa bu nih Gospel khual kan ngei i chun ah i hoikomh mi kan si caah capo biatak khin i pum hna usih ka ti pumh ding cun kan um hna, nulepa chim lo hoi le theih zong kan phang ngaimi a thli tein Cer Ku khawm kal ding cu an in pong burphen cun ka hei bawmh a khu hlu rahtlan a chuak hlan lo tiin kai benh Cer Ku cu a hawinu “Nu Ṭha” an inn pongah a ummi a hei sawmpah i an in ah a lut khi ka hei hmuh cu cun, ka thin tur cu phu dut phu dut ti khin a tur cang mithla nih  ṭhih mi hna ka lo.

Cer Ku le Nu Ṭha cu a van ra, hngap tiin ka fuk cawlh rih hna lo an lan, an sin ah kai fonh lai maw fonh lai lo ti kai ruat ta ka ngam ciah lo. A har ve tuk cu, mah mi duh mi a si zongah hngakchia tuk cu kan va sirih kawh.

Pasal ka min chal in an hnu cun chikhat te ka zulh hna hnu a ka hei dawiphak hna, biachim awk cu a har an ka hmuh cang ṭung nan va tuanve Cer Ku ka ti annih zongnih an ka let lo ka lu cu arbawm a ngaw rua.

Kan hei kal deuh i nan i uahnning cu, tuzaan cu kan sawm hna hi tipah cun, ningzak nawn khin Cer Ku puan cu kai zawnve. A siang na loin ka hei i bek chih thinlung cu a tur in aa tur ko cucu tleirawl ti cu cikhat lo cun an tlan nain an i thiam thlu lo a si lai, an sin ah cun ka hei fonh khawh ṭhan nain a puan cu kai zawn kho ti lo. Biak inn kan phan hnu lei ah kan ṭhu hna Cer Ku pawngah cu ka ṭhu a ka remziar lo maw si hnga a ning dah zakdeuh ka thei lo zei ti deuh khin dek aum laikhua te kan ti cu mei ṭhaṭhin in a ceu lo caah kan umnak cu, a muihnak asi i puan tang cun a kut ka van tleih piak cikhat lo cu a cawl nain, ka tleihchih caah mitheih lai a phang caah a cawl ngam tilo a kut cu kan i pumh chung cu ka tleipiak.

Phungchim tu a van dir cun, hlasa ding an umti lo ti theih cia asi tik ah phungchim tu thlacaam lio ah kan chuak hna i kan lawi hna kan lawi pah ah cun ka duhnak kong cu ka chimh i kaa khat hmanh holh lo cun an inn kam tiang cu kei mah lawng bia kai ruah ko! Ka duhnak kong ka chimh lio ah cun, ka thin cu phu dut phu dut tiin a awnh thawng hmanh a theih khawh lai ka zumh.

Cer Ku sin ah ka lungchung i ka uammi ka phuan hei ti phun khin lawi pah cu a vor in kai vorh. Cer Ku sin ah ka uarnak le ka duhnak kong ka chimh lio ah holh lo hmanhsehlaw, Cer Ku ka duhnak a sin ah ka phuan caah ka hna a ngam tuk zei tiin dah a ka ruahpiak lai aw tipah cun, ka thintur hmanh a cawlh hlan ah kan inn cu ka hei phan. Ka nunih ziah hngakchia zaan ah len lo ding ka ti kha na thei lomaw tiin ceilak in a rak auh! Asinain ka nu au khuan thawng cu ka chungah a pilhrim lo. Ka nu nih a ka sik, fai nakcun, Cer Ku ka ruatdeuh ka kutke kaa ṭawl i ka it cawlh.

Caan saupi chimphuan ka rak duh cangmi ka chimphuan zaan le ka tehte ka chimzaan cu lungdai hna ngamtein zaan mangṭha he thawtein i hngilh laipei tiah chinh khat hmanh kaa hngilh lo Friday 15/ 4/ 2005 zaan. “Duhnak khur chungah zaan khua ka dei zaan” ( Ka Diary ).

Pehnolh ding >>

KAI KHRIH TIK AH CUN.

Malaysia 2011

Zaam chan si ti loin, tlun chan, kir chan nih kan nunnak ah Malaysia um chinmi hna kan kung cungah ai 

khinh cang bantuk in, kei zong ni nikhat khat ah cun, semnak lungrawn khua nuam ah kai khirh caan a phan vete lai.

A hrim ah! a ngaih zong ka ngaihnak caan a sauve cang reng cu! ka zaanmang hrim ah voitam tuk karak tluncangnak kan lungrawn khua hrim nih a ka hlam tuk ve cang fom cu.

Ralzaam dirhmun in adir mi kan van ai dang cio bantuk in kei ka vannih ramthumnak lanh kal cu a kuai ruam lo. CAKEI!! a kumpi in kum 5 leng ka awrhmi UN thlawchuah cu, micheu khat caah cun, lu le taw hngal lotiang in lawmhnak in an khat lio ah. Kan nih UN thlawchuah cove lo pol cu khua in kan rak i thawh lio ah, “0” in kan rak i thawh hna cio kha mu a tu zong “0” in kir ṭhan dingah kan nun khua nih lai a rel cangve.

Sihmanhselaw UN thlawchuah ka co khawhve lomi ah ka buai lo, a ruang cu ka banh phaktawk ah thiltampi semnak laitlang ah tlunpi dingmi ka ngei ve ko. Kei mah le sitawk in kei mah bantuk in a kir/tlung dingmi tampi nan um lai zong ka zumh. Cucaah cun, vawlei chawva a ramhnihnak in tlunpi lai ding cu nan i ruah ngamcio cu ka zum lemlo, nain na lungfak hlah u, a ramhnihnak na um lio ah, na khua le ram caah a ṭhahnem dingmi kha tampi in le seikhat piin i phurh tu kha i tim ve.

Ṭap buin kan i ṭhen hna i, lawmhnak in hau chuah ah kut zaa kan i chan ṭhan canglai, ka kal lio i khua hau chuah ah tar nu/pa hna nih aw nemtein kut tleih buin a rak ka thlah tuhna kha a cheu cu, kik zil lei daiah zalh cangmi zong an tawm ti lai lo.

Ka khupṭhi rual hawi hna zong sempuak cawi in hau chuah ah an rak ka dong cang lai, mi cheu pa thum a ti cang na, a cheu a puar lio na an si hna lai. Kan nau hniangte zong ka kal lio ah zei thei hua ha loin a rak ummi zong. kai khirh tik ah cun, tleirawl nun ah a nun caan a rak hman saling a si vecang lai, ka u a siti cu fiang tein a ka theih ko lai nain hmuh lonak caan sautuk cang kaw, a ka ngaituk ko lai nain, ṭhaṭhi in a ka chawnbia ngam lai lo zakzum nawn tein ka nu kiangah a hel len lai. Ka nu ka pa zong caan an liam bantuk in upat lei sangah cun, an sam hna zong cu an rak par dih ngawt cang lai.

Kal lai ah! sianlonak mitthli he kan rak i ṭhennak hau chuah ah khan, a tu cu thin lungchung lunglawmhnak he kan i kup rek in kan biak Pathian sin ah lawmnak bia chimbu he lunglawmhnak mitthli a tla cang lai.

Kan i ngaihnak zong chim thiam loin khua mipi nih a borh in an rak ka borh hnga khaw zei khual lian 

bantuk, mi lian ngan mangbawi bantuk in, na dam maw ti kut tleih pah in, nai va dangve ti cu khat lei khat lei in bia cat loin ai pheh lai ti ka ruah lio ah.

A tu chan cu, an cangkang tuk cang a hlan bantuk in hau chuah ah i don le i thlah a um tilo, Tuluk siam a ril kho minih na ṭumbut ah an ṭhumh colh lai, na khua mi nih na tlun le tlun lo hmah an thei tuk lem lai lo ti a si ṭhan cang!!!

Sian longai in kan rak i ṭhennak kan sak run chungah ah hna ngam ngai in ka van ṭotop ka kal hlan ah kan rak ngeih bello mi ṭhutdenh sau nawnpi Sofa chah tak cungah thaw chuak huai in kai hngat top hnga mah ko cun an cankannak a langhter ka hei ti hnga, palik, sa hngar kut cun a pakhatnak ah ka luat phawt ti cu kai van fiang chinchin hoi lai, cu lawng hlah law, anpei ṭuankan relnak Malaysia cu a siti lo ti zong kai van fian fawn rih lai. Ka rianṭuannak ka pu holh tam ngai zong tu zaanlei cu a zai lengmang mi a aw zong kha aum ti hnga lo i dai dipdap tein lawmnak he kan sak ruun chungah inn pa chak thlang hngakchia polh nih an van kan leng lai i a bur in an hei ka zel lulh hnga.

A tu tik hrawng hi kan rianṭuan mi an compalen lio tawn caan te kha asi, tawn bantukin, a tuah cun compalen tu a um hnga lo nain, ka hnathla ah mileng holh thawng le hmur ka hna cu, a zai lengmang mi ka rianṭuannak ka pu hmur ka le a zaithawng khi ka hei lawh ter hna hnga i ka mitthlam ah a hei cuang khun hnga ka lunghna a van lengpah ngai la. huiiiiiii.

Cerlian ninupi zong liamzal ser in nitlak lei a hei pahziah mah, cu ko cu kan rian ṭuannak in kan lawi lio 

caan i U Repit KL Buss station ah ninu pi liam lai caal ngai in a kan ceuh lio ko khi ka hei lawh ter, sautuk ka rak pil manh tuk rua ka kawi nih bia a rak ka ruah lenko zei tiin dah ka leh zong thei loin ka khuaruahnakah thuk tuk in karak luttuk khi a rak si. Cakei!!!

Kai van khawlh ṭawl hnu ah kan in thlang kan dum chungah thaw i daihpah in ka hei lut duat ka kal lai 

ah ka rak cinmi kan serpi hna zong tamlak in a thei an rak tlai cang lai, kai van chawk deuh. Malaysia rumro ah um mi kai hei i ruah hnga ka mangbantuk ka cang bantuk in cawhhrup nun in k arak um timi i theih nakah motor nih peetpeet a titawn mi ai awh ah kan Arhli khong khat tawk ah kurku ukuk…. Tiah a hei awn lennak aw nih cun Malaysia a si tilo ti cu piang ngai in a hei ka theihter khun hnga.

Ninupi liamnak zong a saupah cang, sunghno ka nu chuanrawl thawtak mi kum caan saupi zeitik ah dah ka ei ṭhan khawh hnga tiin chunzaan in karak ruah tawnmi cu, atak in kan cabuai cungah kan chungkhar tling tein kan hei kilthup hnga. A thawt tuk lai ning ka ruah lio ah Malaysia ah k arak um rih cu!! Cakei!!!