Fing37nk
************
Liam cia kan hnu
Neh nang khrih zawn
An hung thar than
Na aan pau mi biathli hna kha,
Liam cia caan hrim hi
Philh cang kaa zuam.
Pheh awk um lo
A hawn tharthan
Kei thin lungah.
17/9/2015
Zeizong zaa a dai i ka Nu aw zong a dai ve!
A sang bik van ah khin.
An ceu fidi le thlapa.
Sermi thil vialte nih, an caan cio an hlam tawn.
Hmanhseh, nang bal zeitik tianghme tikcu caan ser lo'n.
Na len rualhawi sin in, na bau rih lai?
Ngaihnak biazai phai le, sunghno na chuahsempi ruun inn tang dai in kingriang mang in saal nun na hluan kun rih lai.
Maw... sian lo fa dawt aw!
Kir caan a cu cang.
Nang zuun ngaih in, kan lilennak nikhua caan a rei zo.
Tiktu caan nih hin, kan lileennak vialte duhsah tein a liampi ko lai tiah ruahchannak nganpi kan ngaih lio ah, kan i ruah bantuk in zeizong vialte hna hi an sithlu ko lo.
Tu kum Christmas le bang cu, Iang tawi te chungkhar nih an tuah lai. Zingzaan in Iang tawi cu kan inn a pal kai lengmang Iang tawi ka hmuh ko ah hin ka celh tawn lo. Aw... Nan hngakchiat lio i kan dum thei nan rak tawh lio ka thingphur tlun he aa tong ngelcel kan rak vuak hna kha duak tiah ka vun hmuh than i kha lio caan hna kha ka ngai i a caan ahcun, ka ngaih hna a chia pah tawn.
Ka lung si vangh caan ah hin zei ti awk theih lo ah, in khan dal chungah ka lut i thla ka cam tawn na pa n'h hin le a fale kong a ruah caan paoh ah hin tihin a um tawn a thluak dactor sin chek ter a hau lai ti tiangin kan inn a leng kaimi sin ah biasi a phai leen hna.
A taktak tiah cun, na pa tu hi a tuar kho lo deuh cu a si. Iang tawi te inn in phone nan van kan chawnh caan zongah a ra tuk bal lo hi, ka hna a tha lo a tihter i a si naisai lo, nan kan chawnh ah hin kan i lungumuih tuk tawn i na pa le bang cu inn ka tiin le cangka in bia hmanh ka ruah ngamtawn lo an ngaituk hna i hawn kir cang uh kan in ti leen ko hna nain hi kaa t'ang kan phak lawlaw cang a dihdongh tiangin kan hngah a hau ko nan kan ti hoi than. Ka fa na nulepa nih nan caah kan in duhpiak bik hna cu, na caah a tha bik in thil hi si viar seh law, nan saduhthah mi a tlamtlin khawh kha kan nih zongnih kan in duhpiak cemmi hna a si ko.
Zu-et-e e nan tileng mangmi zonghi va phan kho u law ti kan in duhpiak mi hna a si ko nain, nan nulepa zong kum upat lei kan phan cang i chun hlan minung kan si cang. Tangka nan kan kuat mi zong kan duh tuk ko, cun nai na pi le pu lung nan van phunmi zong kha ramdang ahcun um hlah u law nan nulepa nih cun zeitik hmanh ah kan phunpiak kho dingmi a si lo. Si nain kan chungkhar caah nan tuahmi le nan i zuamnak vialte hna, tangka nan kan kuattawn mi hna hi kan duh lo tinak a si loin, nan nulepa nih kan duh bik mi cu hawn tlung u law hmun khat teah khua sa ti hna u sih law hmun khat te ah lairel ti hna u sih ti hi kan thih hlan ahcun kan duh bikmi a si.
Nai cu ruah lo ding hna ka ruat len, zang lei rawl kan ei lai ah, iang tawi nih a kan leng i, fei buk in ti i nan hman thlak a kan hmuh i na pa he cun rawl zong ei thiam loin, a phone cu kan zoh i kan rawl ei hna kan tloh viar.
Hello...... Helllo..... Myanmar phone line chiat ning hi cu aw...
Zeizong zaa a dai, van a thiang i
Fidi le thlapa an ceu.
Kanbuk pong ''thainu khat'' bal te lunglen hram a thawk ceo khi asi.
Tiva pi lei hoih in kan rawl einak cabuai cungah ka to, daitein zaan boruak thiang tangah khuangbai hramthawng nih Christmas caan kan naih tuk cangmi fiangte in a ka chimh.
Chim thlizing n'h kan buk tivapi kuang cu kik zialmal tein duhsah te khin a van hrawn ziahmah ka suimilam 2:30am a rak si mah i buk chung ahcun uai ngai khi ka kir than.
Khual Tlawnnak Diary (Part 1)
2010 October 27
 |
| Balentik Camp kal pah Date: 8/10/2015 4:42:24am rei lote thingpi dingtur in kan indinhnak ani hi. Pu. Kam Sang he. |
zinglei suimilam 4:45 hrawng ah malaysia kan agen pa inn hna hngam te in kan phan.
Kan suimilam hi Myanmar ramin kan raknak caan kha si. Kan khual lam suimilam vialte hi myanmar time lawngte a si.
A ruang cu cu ni khua caan thlennak remhnak dingah kan umnak ni khua caan kan theih lo caah Myanmar caan in kan um kal hi asi.
Zarhkhat chung ramtang le motor chung ah vok kawm erh in an kan erh caah, kan bâ kan tha a dih ngai. Inn chungah kan lut, an phai Malay cu kan phan taktak kan i fiang i hna a ngam, kan tha a dih i kan cau ngai caah ho hmanh i chawn biak lo in kan mah le saremning cio in kan it top hna i kan i hngilh cawlh.
Zing khua a dei kan it manh lo kan rim haw cu a turû kan mawh lo zarhkhat chung i kholh țawllo kan si. Kan rim a chia kan hingdih a tu hnu ka ruah țhan ah hin, ka nih maw a chuak zei dek. Cakei!!
Ka hawi le cu an tak an i kholh an thil an i thleng an mah bon le kel rimhaw cu a ziam hlei lo! Ka tho duh lo ka it rih midang zong thuhluahmah in a itrihmi an um 10: 30am hrawng a si. Rawl an kan pek malay tirawl ka voi khat einak le temnak a si.
Meh an kan pekmi ka khuaruah a har ngai, ( Arthin) bak an kan pek khawzei tadah mah vialte Arthin hi an ngeih hnga ka ti minung 12 hrawng ei dingah Arthin an kan pekmi cu Lai khuate in a voi khatnak khuapi phanh ramleng lamh nihcun, khua ruah har lo awk a țha fom lo cu mu!
Hal mei ka duh nain, ka sum țhan kan pu cazin he a rak chuak interview hlah maw a kan tuah deng ti awk in, interview zong cu a kan tuah pah reng cuh. Kan min cazin a rak si, min a kan auh UMMMM.....! Kan ti hna.
Malay ka rat tiang ah hin, Sunday school ka kai rih, Sunday school kaimi ko kan lo ka ti. Khua ruah a tam ngai.
Min a kan auh thluk in, malay kalnak tangka pekzat le pe lo hna a kan hal kawlram ah nang zeizat na pek? Ho nih dah an lak lai an in țhit lai ti asi. Kannih cu a bâmi kan um lo nain, latu kan ngei lo i chunni tlak te lungsi vangin in inn ah kan um a kan la tuding kha zing rianțuan an kal manh caah zaan lei an rianțuan lawi hngah an hau jakhan vaipa Thailand motor chungah a ka luak hnawh-nak riimhaw pi hi cakei ka chung a no dih.
Dawn Baptist thawhkehnak le Khrihfa tuanbia
Dawn Baptist Khrihfabu Tuanbia
Tawi le Pathian rianțuan Tu hna
-----------------------------------------------------
AD 1920 ah Rev. Van Lo le Rev. Chawn Tur hna cu Dawn Khua ah Pathian thawngțha bia chim ah a ra hmasa bik an si. An chim mi Pathian thawngțha bia cu Pu No Thawn le Pu Al Chum hna nih an rak cohlan hmasa bik i Khrihfa ah an cang colh. Cu hnu Tlawmpal ah Mizoram Cerhlun khua mi Evan. Ro Thang le Pu Kap Dai hna cu an rak phan i Dawn Baptist Khrihfabu cu an Hruai hna. AD 1927 ah Dawn Baptist Biakinn cu a hmasa bik an rak sak hi a si.
Evan. Ro Thang nih Solfa a chimh hna i Pu Lian Lung ( Than Cung pa) nih a thiam colh i amah nih Khrihfabu cu hla a hruai hna.
Evan. Ro Thang nih Mizo lengkhawm hla cu a Cawnpiak hna i Dawn Khrihfabu cu bia he hla he an rak țhangcho ngaingai.
Evan. Ro Thang le Pu Kap Dai sinin Dawn khua mi nih fimthiamnak tampi an rak i lak khawh. Pu Kap Dai cu an khua Cerhlun i a kir hnu zong ah Evan. Ro Thang nih a hruai ko hna. AD 1939 ah Evan. Ro Thang zong cu an khua ah a kir ve cang. Asinain Pathian Thawngțha bia nih Dawn Baptist Khrihfabu cu a nun ter cang i fek tein anmah tein an dir kho ve cang.
Cu lio Dawn Baptist Khrihfabu upa Hruaitu upa hna cu: Upa Pu Hmet Thang Church Chairman a si i hruaitu Upa Pu Hram Al le Upa Pu No Thawn hna an si. Christmas le Kum Thar puai hna cu Upa Pu Hmet Thang inn ah kum fatinte rak tuah lengmang a si. Pu Hmet Thang cu pulpit a kai tikah a chim tawn mi cu Ni Thla rel ning kong hi a si. Cucaah nu ngak tlangval hna nih fawi tein ni thla relning kong cu an rak thiam dih. Cun Pathian Thawngțha bia a chim bik mi cu Jesuh Khrih bia țha tein a zul i aa nunpi mi cu nan thih tikah Vancung khua ah nan kai hrimhrim lai a rak ti.
Pu Hmet Thang a thih hnu ah a rian a hun chawng tu cu Upa Pu Hrang Pawng le
Upa Pu Ral Mang hna an si. An rianțuannak Pathian nih thluachuah a pek i Khrihfabu cu an țhang cho ngai ngai. Dawn khua cu nu ngak le Tlangval cu Khrihfa an si dih cang. Zu din le i sikvelh cu a um ti lo ti awk a si. Hi lio caan ah Khrihfa a si lo mi paoh cu i nihsawh deuh le zeirel lo deuh khi an si ko cang.
Dawn Khrihfabu hla hruaitu Pu Lian Lung a tar pah cang caah Pu Thang Vung le Pu Kio Ir nih Biakinn Khuanghla tlaih an hun chawn ve. Nu ngak Tlangval awțha hlasak thiam zong an tam i Biakinn khawmh le Christmas, Kum thar pumh le lengkhawm hla sak ahcun aho khuachingchan mi van hai lo an rak si.
Christmas le Kum thar caan ahcun zarh khat chung bak chun chun zan zan in pumh le lengkhawm a si caah an rak i nuam tuk tawn hna. Ni chiar sathah le rawl ei, fangmeh ei in Chun chun Zan Zan puai cu an rak hmang tawn. Christmas ni in Kum thar ni tiang chun zan peh in Khuang hla an dai bal lo.
Pu Hmet Than chan in Dawn nu ngak tlangval cu an lungthin an i purup i khua chung cu kan mah kan hun țuan tiang in a rak nuam ngai ngai. Zu din le i sik i velh cu a rak um tuk ti lo. Dawn nu ngak tlangval sin i lengkhawm cu nuam an rak ti tuk caah kan khua chingchan tiangin Christmas le Kum Thar hman ah an ra tawn. Cu lio ahcun Dawn khua cu inn 120/ hrong kan rak si. Nu ngak (40) le Tlangval (50) hrong kan rak um.
Nu nih pa dawi le pa fanh hi a rak um bal rih lo. Nihchuak Saihthiam mifim Pu Huat Hmung le Pu Ngun Kio hna an si. An mui hmuh ahhin nih an chuak colh i thinhunnak hi a um kho hrimhrim lo. Bia an chim i nihchuak capo an saih ahcun mipi cu an rak i nuam tuk hringhran. Pathian thawngin ti le rawl zong tampi kan ngei hna i kan pam tuk bal lo. Hi lio caan i a rak i dawh tuk mi te kha a tu cu ni bang a liam riangmang ai e.
" Dawn țhangthar leng le val no rual nih kut Zațial tlaih in remh țhan hna u sih, Kan chuahsennak kan Lai lungrawn khua dawh te cu, Par țha ennak ah"
(By Rabbi Ephriam Lian Rum)
Credit :
Pu Thang Vung (Za Kung pa)
1924-- 12/3/2018
JESUH ṬUANMI RIAN PHUN THUM
JESUH ȚUANMI RIAN PHUN THUM
1.Profet rian.
Profet a sinâk kong amah Jesuh nih a chimmi. Mat.13:57. Mak.6:4. Luk.4:14
Mizapi zong nih Jesuh kha Profet bangin an cohlân. Mat.16:13-14
Muslim zong nih Jesuh hi Profet pakhat bangin an cohlân.
Pathian kong minung sinah phuan hi
Profet rian a si.
Phun dang in Profet nih Pathian sinin a hmuhmi bia kha minung sinah a phuan tawn.
Cucaah Jesuh nih "Ka Pa sin in ka hmuhmi kha ka chim tawn" tiah a ti. Joh.8:38.
Johan 12:50 zongah Jesuh nih, "Cucaah ka chimmi hna hi a ka thlahtu Pa nih aka chimhning tein ka chimmi a si" tiah a ti.
Cuticun Kum 3 hrawng Kanân ram tung le vâng kha țol in Jesuh nih minung sinah bia a chimmi le a cawnpiakmi hna kha Profet sinâk in a țuanmi rian a si.
A thlahtu Pa sin in a hmuh i a chimmi bia hna kha lei le van a rawh hmanh ah zungzal in a hmun laimi Pathian Bia an si.
Mat.24:35.
2. Tlângbawi rian.
Jesuh cu zungzal Tlângbawi a si. Heb.5:6-10.
Heb.8:1-2
Tlângbawi rian cu Profet rian bettaling bak a si.
Zeicatiah Profet nih Pathian kong kha minung sinah an chim lio ah:
Tlângbawi nih cun minung kong kha Pathian sinah an chim tawn.
Profet nih Pathian thianhlimnâk le dinfellnâk le zângfah-dawtnâk kong kha minung sinah an chim lio ah:
Tlângbawi nih cun minung thûrhnomhnâk le dinfellonâk le tlinlonâk vialte kha saram thisen he lei Țempal Hmunthiang bik ah Pathian sinah an chim tawn.
Jesuh zungzal kan Tlângbawi zong nih minung sualpalhnâk le thurhnomhnâk vialte kha Amah thisen hrim hrim kha i put in Van hmunthiang bikah Pa Pathian sinah akan chimpiak i:
"Ka Pa, annih hi ngaithiam hna..." tiah Vailamtahnâk thing cungin a luangmi a thisen he akan nawl piak. Luk.23:34. Heb.9:11-12
3. Siangpahrâng rian.
Pailat nih Jesuh sinah Siangpahrâng na si ko lo maw? tiah a rak ti lio ah Jesuh nih, "A dikmi na chim. Siangpahrâng ka si" tiah a ti. Joh.18:37. Joh.19:19.
Siangpahrâng nih cun Ram or Miphun pakhat khat kha a uk or a pen tawn bangin Jesuh zong nih (Zângfahnâk cân a dih tikah) Pathian miphun hna cu kum 1000 chung a uk te hna lai. Bia.20:4-6
Kum 1000 chung Siangpagrâng sinâk in Jesuh nih Pathian miphun Judahmi a uk dih hnu ah vawlei hlun le vanhlun cu a dong lai i Fapa Jesuh nih Pa Pathian sinah Pennâk kha a chanh te lai tiah Cathiang nih a ti. 1Kor.15:24.
Cuticun Jesuh nih:
Profat bangin rian a rak țuan cang i
Atu Tlângbawi bangin rian a țuan liopi a si i
Ni ni khat cu Siangpahrâng sinâk in rian a țuan țhân te lai.
BAIBAL le MAH LE MAH I THAH
BAIBAL le MAH LE MAH I THAH
"...lainawngmi cu zungzal nunnâk an chungah a hmun lo ti kha nan hngalh". 1Joh.3:15b
Mah le mah i thah hi tlângrai bangin vawlei cungah a vak cuahmah i Kristian ram a simi Chin miphun umnâk zong a kan phâk cuahmah lio ah Baibal ah zeitiset in dah mah le mah i thah hi a chim ti hi kan zoh a herh.
Lungtlâp cungah Amah Pathian hrim hrim nih a țialmi Nawlpek Pahra (Ten Commendments--kan pa le nih Nawlbia pahra tiah an kan lehpiak mi) chungah paruknâk ah:-
"Lai nawng hlah" tiah Sertu Pathian nih sermi minung sinah nawl a rak pek. Chu.20:13..Naw.5:17
Zeicatiah minung nih kan ngeihmi nunnâk hi Sertu Pathian nih a cheuhmi nunnâk a si. Hra.2:7
Cucaah Sertu Pathian nih a cheuhmi minung nunnâk lakpiak, "Lainawn" hi Sertu Pathian ralchanhnâk phunkhat a si.
Cuticun Sertu Pathian kha ralchanh in midang nunnâk, asiloah mah nunnâk zong a latu cu Sertu Pathian sinah an phân hrim hrim lai lo ti hi Baibal cawnpiakning a si.
Midang nunnâk a latu cu sual ngaihchihnâk cân țha ngei in Pathian an panh ah cun Pathian nih ngaihthiam khawh lomi sualnâk a ngei lo ti hi Baibal cawnpiakning a si bangin ruahchannâk a um.
Asinain mah le mah i thah cu sualngaihchihnâk cân a um ti lo caah van cung kai dingin ruahchannâk a um kho lo.
Baibal ah hri in ai awk i mah le mah ai thatmi cu Jesuh Lamkaltu 12 chungin mi pa khat a simi Judas Iskariot kha a si. Mt.27:3-5. Lam.1:18-19.
Judas Iskariot zong van ah si loin hell ah a kal bak ti hi Baibal ah tehte pa thum a um.
1...chuak loin rak um seh law a caah a țha deuh..Mt.26:24.
Chuahchan a ngei lo tinâk a si.
2...nannih cu nan thiang, nan dihlak bel si loin. Joh.13:10.
A thiangmi lakah ai tel lomi cu Judas Iskariot kha a si.
3...anmah lakah lotlau fapa dah ti lo cu pakhat hmanh an tlau lo.Joh.17:12
Lotlau fapa cu Judas Isksriot kha a si.
Khi a cunglei Baibal ah amah le amah ai thatmi Judas Iskariot kong khi a dihlak in Jesuh chimmi lawng te an si.
Cheu khat nih Israel Siangpahrâng Saul zong amah le amah ai that i van ah a kai lai lo maw tiah an ti.
Saul kha amah le amah ai thatmi a si lo. Pathian a hngal lomi, cuarpartanlo Filistin mi hna kut i thih a duh lo ruangah a si.
1Sam.31:4
Mah le mah i thah a duh ruangah a si hrim hrim lo. Zûmlotu kut chungin ai kilvennâk a si.
Cucaah Pathian minung a simi Samuel nih, "cun thaizing ah nangmah le na fapa cu ka sinah nan um lai" tiah a ti. 2Sam.28:19.
Mah le mah i thah duhnâk tiangin lungrawhnâk a ngeimi hna hi Bawmtu Thiang Thlarau le Pathian Biatak a ngei lomi an si.
Phundang in Thiang Thlarau (Joh.3:5) le Pathian Biatak (1Pet.1:23) ah a hrințhânmi
zûmtu cu mah le mah i thahnâk tiang tiang in lungrawhnâk an ngei kho lo.
Zeicatiah Kilvêngtu Thiang Thlarau le Pathian Biatak kha an ngei.
Cucaah mah le mah ai thatmi cu Thiang Thlarau le Pathian Biatak ah a hrințhân lomi an si bangin van ah si loin hell ah an kal lai ti hi minung ruahnâk men men si loin Baibal cawnpiakning a si.
..."lainawngmi cu an chungah zungzal nunnâk a hmun lo ti kha nan hngalh". 1Joh.3:15
![MS Office 2013 [ALL] Product Keys [LATEST!](https://lh3.googleusercontent.com/blogger_img_proxy/AEn0k_syLy_44mNfZ39LbN-6sdHeWRFR7Wji5qZVckV7SAhrYQplzJ5iOBXeNhXnUve6TRE21USwm8mRlu6c4ns5JchfLJz_vDkdGrQhd3GGpntNxia5XoLmCkGjivk=w72-h72-p-k-no-nu)
